ខណៈវិបត្តិនយោបាយកម្ពុជាបន្តជាប់គាំងនៅឡើយ គណបក្សសង្រ្គោះជាតិ ក្នុងពេលចុងក្រោយនេះ បានបង្ហាញ​គោលជំហរដ៏តឹងរឹងមួយ សម្រាប់ឲ្យគណបក្សប្រជាជនកម្ពុជាជ្រើសរើស បន្ទាប់ពីគណបក្សនេះបាន​សម្រេច​បង្កើត​រដ្ឋសភា និងរដ្ឋាភិបាលជា​ឯកបក្ស តាំងក្រោយបោះឆ្នោតមកនោះ។ នោះ ជាការធ្វើពហិការមិនចូលរួម​ក្នុង​រដ្ឋសភា​នោះទេ បើទោះជាមានការ​កែទម្រង់ គណៈកម្មាធិការជាតិរៀបចំការបោះឆ្នោត (គ.ជ.ប) ក៏ដោយ។ អ្វីដែល​គណបក្ស​ជំទាស់ចង់បានបំផុតនៅ​ពេលនេះ គឺការទាមទារឲ្យមានការបោះឆ្នោតឡើងវិញ។

លោក សម រង្ស៊ី (ខាងស្ដាំ) និងលោក កឹម សុខា នៅទីលានប្រជាធិបតេយ្យថ្ងៃទី១០ ខែធ្នូ ឆ្នាំ២០១៣។ (រូបថត MONOROOM.info/ O. Bory)

នយោបាយកម្ពុជា - អនុប្រធានគណបក្សសង្រ្គោះជាតិលោក កឹម សុខា នៅទីលានប្រជាធិបតេយ្យ ថ្ងៃទី១០ ខែធ្នូ ឆ្នាំ២០១៣ នេះបានថ្លែងប្រាប់ក្រុមអ្នកគាំទ្រថា ពីពេលមុនគណបក្សប្រជាជនកម្ពុជា បានបដិសេធការស៊ើបអង្កេត​ពីភាពមិនប្រក្រតី ក្នុងដំណើរការបោះឆ្នោត និងការកែទម្រង់(គ.ជ.ប)។ ប៉ុន្តែឥឡូវនេះ ក្រោយការដាក់សម្ពាធពី​បរទេស គណបក្សប្រជាជនកម្ពុជាបានយល់ព្រមថា នឹងសហការកែទម្រង់ (គ.ជ.ប) ប្រសិនបើគណបក្ស​សង្រ្គោះ​ជាតិព្រមចូលរួមក្នុងរដ្ឋសភា។

អនុប្រធានគណបក្សជំទាស់ ដដែលនេះបន្តថា អ្វីដែលគណបក្សសង្រ្គោះជាតិ និងប្រជាពលរដ្ឋចង់បាននៅពេលនេះ មិនមែនត្រឹមតែការកែទម្រង់ (គ.ជ.ប) នោះទេ គឺការបោះឆ្នោតឡើងវិញ ក្រោយការកែទម្រង់(គ.ជ.ប) និងស្ថាប័ន​សំខាន់ៗផ្សេងៗទៀត។ លោក កឹម សុខា បញ្ជាក់ថា៖ «គណបក្សកាន់អំណាច សូមឲ្យគណបក្សសង្រ្គោះជាតិ​ចូល​មក ដើម្បីធ្វើការកែទម្រង់ (...) បើអ្នកឯងមិនព្រមស៊ើបអង្កេតរកការពិត ហើយឥឡូវចង់កែទម្រង់ (គ.ជ.ប) អោយ​ឯករាជ្យ រដ្ឋសភា និងប្រព័ន្ធផ្សព្វផ្សាយជាដើម យើងគណបកសង្រ្គោះជាតិសុខចិត្តចូលកែទម្រង់ ប៉ុន្តែកែទម្រង់​ហើយ​បោះឆ្នោតឡើងវិញភ្លាម តែបើចាំប្រាំឆ្នាំទៀតអត់ចូលទេ បើបោះឆ្នោតឡើងវិញ អាហ្នឹងចូលទៅបោះភ្លាម»។

ជាមួយគ្នានេះ លោក សម រង្ស៊ី ប្រធានគណបក្សសង្រ្គោះជាតិ បានបន្ទរពីក្រោយអនុប្រធានរបស់ខ្លួនថា ប្រទេស​កម្ពុជាបច្ចុប្បន្នមានបញ្ហាច្រើនស្អេកស្កះ ហើយកំពុងតែបន្តដឹកនាំដោយមេដឹកនាំខុសច្បាប់ ដែលកើតចេញ​ពីការ​បោះឆ្នោតមានភាពមិនប្រក្រតីធ្ងន់ធ្ងរ។ ដូច្នេះកម្ពុជាត្រូវតែកែទម្រង់ស្ថាប័នសំខាន់ៗ ឲ្យមានភាពឯករាជ្យ និងរៀបចំ​អោយមានការបោះឆ្នោតត្រឹមត្រូវឡើងវិញ ទើបប្រទេសកម្ពុជាអាចដំណើរការទៅមុខបានល្អ។

ជុំវិញការទាមទារឲ្យមានការបោះឆ្នោតឡើងវិញ របស់គណបក្សជំទាស់នេះ ទស្សនាវដ្តីមនោរម្យព័ងអាំងហ្វូ មិនអាច​ទាក់ទងមន្រ្តីគណបក្សប្រជាជនកម្ពុជា និងមន្រ្តី (គ.ជ.ប) ដើម្បីធ្វើការអត្ថាធិប្បាយបានទេ។ តែជាគោលជំហររបស់ (គ.ជ.ប) និងគណបក្សប្រជាជនកម្ពុជា គិតពីក្រោយការបោះឆ្នោតរហូតមកដល់ពេលនេះ នៅតែអះអាង​ការពារពី​ភាពស្អាតស្អំ និងភាពស្របច្បាប់របស់ពួកគេ នៅក្នុងដំណើរការបោះឆ្នោតរដ្ឋសភានីតិកាលទី៥ ក៏ដូចជាការបង្កើត​រដ្ឋាភិបាល និងរដ្ឋសភាថ្មីផងដែរ។ ទន្ទឹមនឹងនេះគណបក្សប្រជាជនកម្ពុជា នៅតែប្រកាន់គោលជំហរបើកទ្វារចរចា ជាមួយគណបក្សសង្រ្គោះជាតិ ដើម្បីទម្លាយភាពទាល់ច្រក ក្រោយការបោះឆ្នោតដ៏ប្រទាំងប្រទើសនេះ៕

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី១០ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ