ប្រទេស​ទួរគី​បើក​ស្ថាន​ទូត​នៅ​កម្ពុជា ជា​ការ​ទទួល​ស្គាល់​រដ្ឋាភិបាល?

សាធារណរដ្ឋទួរគី បានបើកស្ថានទូតរបស់ខ្លួន ប្រចាំនៅប្រទេសកម្ពុជា កាលពីថ្ងៃទី០១ ខែវិច្ឆិកាកន្លងមក។ លិខិតមួយ​របស់រដ្ឋមន្ត្រីការបរទេសនៃប្រទេសទួរគី បានហៅព្រឹត្តិការណ៍ថ្មីនេះ ថាដើម្បី​ជម្រុញឲ្យកាន់តែខ្លាំងថែមទៀត នូវ​ទំនាក់​ទំនង និងកិច្ចសហប្រតិបត្តិការរវាងប្រទេសទាំងពីរ។ គឺជាភាពជោគជ័យមួយទៀត ខាងវិស័យការទូតរបស់ប្រទេសកម្ពុជា ដែល​ធ្វើឲ្យក្រសួងការបរទេសកម្ពុជា មានឱកាសយកព្រឹត្តិការណ៍នៃការបើកស្ថានទូតនេះ មកភ្ជាប់នឹងការបោះឆ្នោត​សកល កាលពីថ្ងៃទី២៨ខែកក្កដា។
Loading...
  • ដោយ: សេក មនោរកុមារ
  • កែប្រែចុងក្រោយ: November 10, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

សាធារណរដ្ឋទួរគី បានបើកស្ថានទូតរបស់ខ្លួន ប្រចាំនៅប្រទេសកម្ពុជា កាលពីថ្ងៃទី០១ ខែវិច្ឆិកាកន្លងមក។ លិខិតមួយ​របស់រដ្ឋមន្ត្រីការបរទេសនៃប្រទេសទួរគី បានហៅព្រឹត្តិការណ៍ថ្មីនេះ ថាដើម្បី​ជម្រុញឲ្យកាន់តែខ្លាំងថែមទៀត នូវ​ទំនាក់​ទំនង និងកិច្ចសហប្រតិបត្តិការរវាងប្រទេសទាំងពីរ។ គឺជាភាពជោគជ័យមួយទៀត ខាងវិស័យការទូតរបស់ប្រទេសកម្ពុជា ដែល​ធ្វើឲ្យក្រសួងការបរទេសកម្ពុជា មានឱកាសយកព្រឹត្តិការណ៍នៃការបើកស្ថានទូតនេះ មកភ្ជាប់នឹងការបោះឆ្នោត​សកល កាលពីថ្ងៃទី២៨ខែកក្កដា។


លោក អាហ្វម៉េត ដាហ្គូតូគ្លូ (កណ្ដាល) រដ្ឋមន្ត្រីក្រសួងការបរទេសទួរគី នៅក្នុងសន្និសិទស្តីពីការអន្តរកម្ម និងវិធានសាង​ទំនុក​ចិត្ត​ក្នុង​តំបន់អាស៊ី ថ្ងៃទី២៥ខែកញ្ញាឆ្នាំ២០១៣ ដេលមានប្រទេសកម្ពុជាចូលរួមដែរ។ (រូបថត cicaistanbul.org)

ការទូត - នៅក្នុងលិខិតអបអរសាទរមួយ ក្នុងឱកាសបុណ្យឯករាជ្យជាតិនៃប្រទេសកម្ពុជា របស់លោក អាហ្វម៉េត ដាហ្គូតូគ្លូ (Ahmet Davutoglu) រដ្ឋមន្ត្រីក្រសួងការបរទេសទួរគី ផ្ញើជូនលោក ហោ ណាំហុង រដ្ឋមន្ត្រីនៃក្រសួងការបរទេសកម្ពុជា បាន​និយាយថា ឯកអគ្គរដ្ឋទូតទីមួយ នៃប្រទេសទួរគី បានចាប់ផ្ដើមបំពេញបេសកកម្មការងារទូត របស់ខ្លួន ចាប់ពីថ្ងៃទី​០១ខែ​វិច្ឆិកា កន្លងមកនេះ។ នៅក្នុងសារលិខិតដែលសរសេរពីទីក្រុងអង់ការ៉ា នៃប្រទេសទួរគី ថុះថ្ងៃទី៩ខែវិច្ឆិកានេះ លោក អាហ្វម៉េត បានសរសេរបន្តទៀតថា «ការបើកស្ថានទូត ដែលមាននិវេសនដ្ឋាន នៅទីក្រុងភ្នំពេញរបស់យើង មុខជានឹង​ជម្រុញឡើងថែមទៀត ចំពោះទំនាក់ទំនងជាមិត្តភាពដែលមានស្រាប់ និងកិច្ចសហប្រតិបត្តិការលើគ្រប់វិស័យ ដើម្បី​ជា​ផលប្រយោជន៍របស់ប្រជាជាតិយើងទាំងពីរ»។

ការបើកស្ថានទូតក្នុងប្រទេសកម្ពុជា នៃប្រទេសណាក៏ដោយ ច្បាស់ជាបានបង្ហាញពីទំនាក់ទំនងដ៏ល្អមួយ រវាងប្រទេស​នោះ និងប្រទេសកម្ពុជា ហើយវាក៏នឹងច្បាស់ជានាំមក នូវផលប្រយោជន៍ទាំងសងខាងនោះដែរ។ ការដាក់ទូតនៅក្នុង​ប្រទេស​កម្ពុជា នោះទៀតសោធ ក៏ជាការសម្ដែងឲ្យឃើញ ពីការគាំទ្រនូវរបបនយោបាយក្នុងប្រទេសកម្ពុជា ពីសំណាក់​ប្រទេស​នោះដែរ ជាពិសេសរបបដឹកនាំដែលបានយករដ្ឋធម្មនុញ្ញជាគោល។ ប៉ុន្តែអ្វីដែលក្រសួងការបរទេសកម្ពុជា បាន​យក​ព្រឹត្តិការណ៍នៃការបើកស្ថានទូតរបស់ប្រទេសទួរគី មកថ្លែងនៅក្នុងសេចក្ដីប្រកាសព័ត៌មានរបស់ខ្លួននោះ គឺការភ្ជាប់ការ​ដាក់ចំណង​ទូតរបស់បរទេស ទៅនឹងការបោះឆ្នោតសកលថ្ងៃទី២៨ខែកក្កដា ឆ្នាំ២០១៣។

សេចក្ដីប្រកាសព័ត៌មាន របស់ក្រសួងការបរទេសកម្ពុជា ចុះក្នុងថ្ងៃដដែល បានសរសេរថា «ក្រោយពីការបោះឆ្នោត​ជា​សកល បានប្រព្រឹត្តិទៅ"ប្រកប"ដោយរលូន ប្រជាធិបតេយ្យ សេរី និងយុត្តិធម៌នៅកម្ពុជា កាលពីថ្ងៃទី២៨ ខែកក្កដា ឆ្នាំ​២០១៣ សាធារណរដ្ឋទួរគី បានសម្រេចបើកស្ថានទូតអចិន្ត្រៃយ៍នៅទីក្រុងភ្នំពេញ (...)»។ ឃ្លានេះត្រូវបានទី​ភ្នាក់ងារ​សាព័ត៌មានចិន ស៊ីនហួរ (Xinhua) ដកស្រង់យកទៅផ្សព្វផ្សាយបន្ត ដែលធ្វើឲ្យព្រឹត្តិការណ៍​នៃការបើកស្ថានទូតរបស់​ប្រទេសទួរគី និងការបោះឆ្នោតសកល ថ្ងៃទី២៨ខែកក្កដា ដោយទីក្រុងអង់ការ៉ា មានភាពទាក់ទងគ្នាកាន់តែខ្លាំងឡើង។

ទស្សនាវដ្ដីមនោរម្យព័ងអាំងហ្វូ បានព្យាយាមស្វែងរកការពន្យល់មួយ ពីស្ថានទូតនៃប្រទេសទួរគីដែលទើបតែបើកថ្មី នៅ​ព្រលប់ថ្ងៃទី៩ខែវិច្ឆិកានេះ តែគ្មានការឆ្លើយតបទេ។ ប៉ុន្តែអតីតមន្ត្រីមួយរូប ពីក្រសួងការបរទេសកម្ពុជា ដែលរស់នៅក្នុង​ប្រទេសបារាំងសព្វថ្ងៃ បាននិយាយថា នេះអាចជាកាយវិការដ៏ពិតមួយ ដែលប្រទេសទួរគីអាចទទួលស្គាល់​រដ្ឋាភិបាល​លោកហ៊ុន សែនសព្វថ្ងៃ ឬគិតថាការបោះឆ្នោតថ្ងៃទី២៨ខែកក្កដា មានភាពត្រឹមត្រូវ​យុត្តិធម៌។ ប៉ុន្តែអតីតមន្ត្រីអ្នកការទូត ដែលបកស្រាយក្នុងលក្ខខ័ណ្ឌមិនបញ្ចេញឈ្មោះ បានបន្តទៀតថា ក្នុងបរិបទនេះទោះចង់មិនចង់ រដ្ឋាភិបាលដែលដឹកនាំ​ដោយគណបក្សប្រជាជនកម្ពុជាសព្វថ្ងៃ ច្បាស់ជាយកព្រឹត្តិការណ៍នៃការបើកស្ថានទូតនេះ មកធ្វើអាជីវកម្ម ដើម្បីចំណេញ​ខាងនយោបាយក្នុងប្រទេស ហើយប្រកាសប្រាប់គេឯងថា រដ្ឋាភិបាលដែលកើតចេញពីសភាឯកបក្សកាលពីពេលថ្មីៗនេះ មានសភាព«ស្របច្បាប់»គ្រប់លក្ខណៈ។

មន្ត្រីដែលធ្លាប់កាន់តំណែងធំគួរសម នៅក្នុងក្រសួងការបទេសកម្ពុជារូបនេះ បានថ្លែងពន្យល់ឲ្យដឹងទៀតថា ការបើក​ស្ថានទូតរបស់ប្រទេសមួយ ជាការរឹតចំណងមេត្រីភាព រវាងប្រទេសនោះនិងប្រទេសជាម្ចាស់ផ្ទះ រវាងរដ្ឋនិងរដ្ឋ រវាង​ប្រជាជននិងប្រជាជន ដូចមាននៅក្នុងសម្ដីរបស់លោករដ្ឋមន្ត្រីការបរទេសនៃប្រទេសទួរគី យ៉ាងដូច្នេះ។ ផ្ទុយទៅវិញ គេមិនត្រូវនិយាយថា វាជាការភ្ជាប់ទំនាក់ទំនងការទូតរវាងរដ្ឋាភិបាល និងរដ្ឋាភិបាលនោះទេ ព្រោះនៅក្នុងប្រទេស​ប្រជាធិបតេយ្យ ដូចទួរគី និងកម្ពុជា រដ្ឋាភិបាលអាចធ្វើការផ្លាស់ប្ដូរ ដោយការបោះឆ្នោត។

អតីតមន្ត្រីបាន​សង្កត់ធ្ងន់ថា «ឯកអគ្គរដ្ឋទូតដែលតំណាងឲ្យប្រទេសនោះ គេយកសារតាំងពីប្រមុខរដ្ឋរបស់គេ ទៅថ្វាយ​ព្រះមហាក្សត្រ​កម្ពុជា ដែលតំណាងឲ្យប្រទេសនិងប្រជាជនកម្ពុជាទាំងមូល តែគេអត់បានយកទៅប្រគល់ជូនលោក ហ៊ុន សែន ឬលោក ហោ ណាំហុងនោះទេ បើទោះជាមានការចូលជួបសម្ដែងការគួរសម ឬការផ្ញើរលិខិតទាក់ទងគ្នាក៏ដោយ។ លោក ហ៊ុន សែន ឬលោក ហោ ណាំហុង គ្រាន់តែជាតំណាងឲ្យនិតិប្រតិបត្តិ ដែលមកកាន់អំណាចតាមអាណត្តិប៉ុណ្ណោះ។ ម្យ៉ាងទៀត ប្រសិនបើរបបរដ្ឋកម្ពុជា ឬសាធារណរដ្ឋប្រជាមានិតកម្ពុជា នៅបន្តរហូតដល់សព្វថ្ងៃនេះ សួរថាតើបរទេស​ទាំង​នោះ ក្រៅ​ពីវៀតណាម ឡាវ ចិន ... នឹងមកដាក់ទូតនៅស្រុកខ្មែរឬទេ?»

-----------------------------------------------------
ដោយ៖ សេក មនោរកុមារ - ប៉ារីស ថ្ងៃទី០៩ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...