បុរសដើមកំណើតខ្មែរម្នាក់ ត្រូវបានគេរកឃើញស្លាប់ដោយចងក នៅក្នុងផ្ទះរបស់ខ្លួន ស្ថិតក្នុងភូមិមួយ នៃតំបន់ជាយក្រុង​ប៉ារីសប្រទេសបារាំង។ ប៉ុន្តែអ្វីដែលចំឡែកនោះ គឺគេទើបតែរកឃើញសាកសពនេះ ខណៈដែលបុរសបានធ្វើអត្តឃាត​តាំងពី«ប្រាំបី»ឆ្នាំមុនម្លេះ ហើយសូម្បីតែញាតិមិត្តរបស់បុរស ឬអ្នកជិតខាង ក៏គ្មាននរណាម្នាក់ត្រូវបានធ្វើឲ្យសង្ស័យ ពីការ​បាត់ខ្លួនរបស់បុរសនេះដែរ។

តាំងពីប្រាំបីឆ្នាំមកហើយ ដែលតូម៉ាស ងិន រស់នៅក្នុងអាគារនេះ តែបានបាត់ដំណឹងសូន្យឈឹងរហូត។ (រូបថត Le Parisien)

ទីក្រុងប៉ារីស - ការសែតចេញប្រចាំថ្ងៃរបស់បារាំង មានឈ្មោះថា ឡឺប៉ារីស៊ីយៀង (Le Parisien) បានផ្សាយឲ្យដឹងនៅថ្ងៃ​ទី២៣ខែតុលានេះ ថាសាកសពបុរសដែលនៅសល់តែគ្រោងឆ្អឹង ត្រូវបានគេរកឃើញ កាលពីថ្ងៃសុក្រទី១៨ខែ​តុលា​កន្លង​ទៅ នៅក្នុងផ្ទះរបស់ខ្លួន ដោយចងកនឹងកម្រាលពូក។ បុរសឈ្មោះ តូម៉ាស ងិន (Thomas Ngin) ដែលនឹងមានអាយុ៥០ឆ្នាំ​ក្នុងប៉ុន្មានថ្ងៃខាងមុខនេះ បានធ្វើអត្ថឃាតតាំងពី៨ឆ្នាំមុនម្លេះ។

មានដើមកំណើតក្នុងប្រទេសកម្ពុជា តូម៉ាស ងិន បានចូលមករស់នៅក្នុងភូមិ ប៊ូស៊ី សាំងហ្សក (Bussy-Saint-Georges) ខាងកើតទីក្រុងប៉ារីស នៅពីឆ្នាំ២០០១។ នគរបាលបានឲ្យដឹងថា តូម៉ាស ទំនងជាបានសម្លាប់ខ្លួន នៅអំឡុងឆ្នាំ២០០៥ ដោយសារតែមានបញ្ហា«ប្រាក់កាស» និងបំណុលជាច្រើនជុំទិស។ បុរសបានចងក ជាមួយនឹងកម្រាលពូក នៅជាប់នឹង​ទ្វាចូលនៃផ្ទះរបស់ខ្លួន។

មុនពេលសម្លាប់ខ្លួន តូម៉ាស ធ្លាប់ជាភ្នាក់ងារសន្តិសុខមួយរូប ដែលបន្ទាប់មក តូម៉ាស ​បានប្ដឹងឡើងទៅតុលាការការងារ (prud’hommes) ក្នុងប្រទេសបារាំង ប្រឆាំងនឹងថៅកែរបស់ខ្លួន នៅក្រោយពេលដែល តូម៉ាស ត្រូវបានថៅកែនោះ​បញ្ឈប់​ពីការងារ។

តាំងពីប្រាំបីឆ្នាំមកហើយ ដែលបុរសមិនបានបង់ប្រាក់រំលោះ ដែលគាត់បានបណ្ដាក់ទិញផ្ទះនេះ ហើយធនាគារដែលបាន​ធ្វើ​កិច្ច​សន្យាខ្ចីប្រាក់ទិញផ្ទះជាមួយគាត់ បានសម្រេចចិត្តចាត់ការតាមនិតិវិធីតុលាការ ដើម្បីយកត្រឡប់មកវិញនូវបំណុល​ដែល​បុរសជំពាក់។ ដូច្នេះផ្ទះជាអាប៉ាតឺម៉ង់ (appartement) របស់គាត់ ត្រូវបានរឹបអូស ហើយអាគារស្នាក់នៅទាំងមូល ត្រូវ​បាន​ដាក់លក់ដេញថ្លែ និងបានលក់ដាច់ កាលពីថ្ងៃទី៣ខែតុលាឆ្នាំ២០១៣កន្លងមក ក្នុងតម្លៃ ៤១៥០០០អ៊ឺរ៉ូ។

នៅពេលដែលម្ចាស់ផ្ទះថ្មី បានចូលទៅកាន់អាគារដែលទើបនឹងទិញបាននេះ ស្រាប់តែបានភ្ញាក់ព្រើតនឹងទស្សនីយភាព​ដ៏រន្ធត់ នៃគ្រោងឆ្អឺងចងក នៅជាប់នឹងទ្វាដែលទើបនឹងត្រូវបានគាស់ឲ្យរបើក ដោយជាងធ្វើសោរមួយរូប។

ការសែតដដែល បានធ្វើសេចក្ដីរាយការណ៍ទៀតថា តូម៉ាស មានបងប្អូនប្រុសពីរនាក់ និងស្រីម្នាក់ រស់នៅក្នុងតំបន់​មួយ​ទៀតនៅជាប់នឹងទីក្រុងប៉ារីសដែរ។ នៅមុខនេះ១០ឆ្នាំ តូម៉ាស បានរស់នៅជាមួយបងប្រុសរបស់ខ្លួន តែក្រោយមកក៏មាន​ជម្លោះ​ទាស់ទែង ជាមួយនឹងបងប្រុសនោះ ដែលធ្វើឲ្យតូម៉ាស ចេញទៅទិញផ្ទះនៅក្នុងភូមិ ប៊ូស៊ី ស៊ាំងហ្សក និង​បានផ្ដាច់​ខ្លួនចេញពីគ្រួសារតាំងពីពេលនោះមក។

ចំណែកអ្នកជិតខាងវិញ បានគិតថា បុរសឯកោទំនងជាបានវិលត្រឡប់ទៅប្រទេសកម្ពុជាវិញបាត់ទៅហើយ។ អ្នកជិតខាង​ខ្លះទៀត បានទៅគោះទ្វាផ្ទះបុរសនេះជាច្រើនដង ដោយហេតុថា គាត់មិនបានបង់ថ្លៃបន្ទុកសម្រាប់អាគារស្នាក់នៅនេះ តាំង​ពីច្រើនខែមកហើយនោះ។ អាជ្ញាធរបារាំងបានឲ្យដឹងថា គ្រោងឆ្អឹងរបស់តូម៉ាស នឹងត្រូវគេយកទៅពិនិត្យ​ធ្វើ​កោសលវិច័យ ក្នុងថ្ងៃខាងមុខ ដើម្បីដឹងឲ្យច្បាស់ពីពេលវេលា និងហេតុការណ៍ពិតប្រាកដនៃមរណភាពនេះ៕

-----------------------------------------------
ដោយ សេក មនោរកុមារ - ថ្ងៃទី២៣ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ