ស្តាប់ព្រះសង្ឃមួយអង្គ ដែលនិមន្តមកពីខេត្តកំពង់ឆ្នាំង ចូលរួមធ្វើមហាបាតុកម្មនៅទីលានប្រជាធិបតេយ្យ បង្ហាញពី​មោទនភាព ចំពោះការទទួលយកស្នាមមេដៃ របស់អង្គការសហប្រជាជាតិប្រចាំនៅកម្ពុជា ថានឹងមានសង្ឃឹម​ក្នុងការ​ស្វែង​រកដំណោះស្រាយនៃវិបត្ត និងភាពជាប់គាំងនៃបញ្ហានយោបាយ ក្រោយការបោះឆ្នោតថ្ងៃទី២៨ ខែកក្កដាឆ្នាំ២០១៣។

ព្រះសង្ឃ ញ៉ាញ់ លីម ក្នុងកិច្ចសម្ភាសខ្លីមួយ ជាមួយនឹងទស្សនាវដ្ដីមនោរម្យព័ងអាំងហ្វូ។ (រូបថត MONOROOM.info/ O. Vary)

រាជធានីភ្នំពេញ - បាតុកម្ម ដែលរៀបចំឡើងដោយគណបក្សសង្គ្រោះជាតិ មានប្រជាពលរដ្ឋរាប់ម៉ឺននាក់ មកពីតាមបណ្តា​ខេត្ត-ក្រុងទាំង២៤ មកចូលរួមនាទីលានប្រជាធិបតេយ្យ ដូចអ្វីដែលគណបក្សមួយនេះបានគ្រោងទុក។ ក្នុងចំណោម​ប្រជា​ពលរដ្ឋទាំងនោះ ក៏មានវត្តមានព្រះសង្ឃដែលមិនតិចជាងប្រាំរយអង្គដែរ បានគង់នៅផ្នែកខាងមុខ ក្បែរឆាកក្រោម​កំដៅថ្ងៃ​ដ៏​ក្តៅហែងស្ទើរតែរលាកកាយ និងមានព្រះសង្ឃប្រមាណជាជិតមួយរយអង្គ បានចូលរួមនិមន្តដោយថ្មើរជើង ជាមួយ​ដំណើរ​ដង្ហែរនាំ«ញត្តិ»ពីទីលានប្រជាធិបតេយ្យ ឆ្ពោះទៅកាន់ឧត្ដមស្នងការនៃអង្គការសហប្រជាជាតិ ប្រចាំកម្ពុជា ។

ក្រោយពីបានប្រគល់«ញត្តិ» និងទទួលដោយមន្រ្តីតំណាងអង្គការសហប្រជាជាតិប្រចាំនៅកម្ពុជា ព្រះសង្ឃព្រះនាម ញ៉ាញ់ លីម បានផ្តល់កិច្ចសម្ភាសជាមួយទស្សនាវដ្ដីមនោរម្យព័ងអាំងហ្វូថា នេះជាឱកាល និងពេលវេលាមួយល្អ ដែលអាចឲ្យ​សហគមអន្តរជាតិជួយដល់កម្ពុជាបាន។

ក្នុងព្រះជន្ម៣០ព្រះវស្សា ព្រះអង្គបានមានសង្ឃដីកាបញ្ជាក់ថា «មានតែអង្គការសហប្រជាជាតិ និងប្រទេសដ៏ទៃទៀត​ដែល​អាចជួយបាន»។ ព្រះអង្គផ្ទាល់ មានជំនឿជឿជាក់យ៉ាងខ្លាំង លើអង្គការសហប្រជាជាតិ ព្រោះគេក៏បានតាមដាន និងឃ្លាំ សង្កេត​មើលពីដំណើរការនៃការការពាសិទ្ធិមនុស្ស និងច្បាប់នៅកម្ពុជាដែរ នោះគេនឹងរកដំណោះស្រាយឲ្យ។ ព្រះអង្គគិត​ថាមិន​មានតែព្រះអង្គទេ ព្រះសង្ឃដ៏ទៃទៀត ក៏មានគំនិត និងអារម្មណ៍មិនខុសគ្នាដែរ គឺ ចង់បានឯករាជ្យ ចង់បានឲ្យមាន​យុត្តិធម៌​ក្នុងសង្គម។ ប្រជាជនកម្ពុជាភាគច្រើនមានការលំបាកណាស់ ដូចជាអ្នកសុំ«ទាន»(អ្នកក្រ) កាន់តែច្រើនឡើង រីឯ​អ្នកមាន (ប្រាក់អំណាច) ក៏កាន់តែ«មាន»ដល់កំពូល។ «ធ្វើយ៉ាងណាត្រូវឲ្យមានតុល្យភាពនេះ បានស្មើគ្នា។ (...) អាត្មា​រំពឹងថា គេ​នឹងជួយដល់កម្ពុជា កុំឲ្យមានតែអ្នកមាន ឯអ្នកក្ររង់ចាំតែការស្លាប់ និងការរស់នៅដោយភាពវេទនា ជាមួយនឹង​ការគាប​សង្កត់។»

មកពីខេត្តកំពង់ឆ្នាំង ព្រះអង្គបានបង្ហាញនូវទស្សនៈផ្ទាល់ព្រះអង្គ ដែលជំរុញឲ្យមានព្រះអង្គ ចូលរួមក្នុងមហា​បាតុកម្ម​ថា ដោយសារតែឃើញភាពអយុត្តិធម៌ក្នុងសង្គមច្រើន ដូចជាករណីសម្លាប់លោក ជា វិជ្ជា ជាដើម។ ព្រះអង្គបន្តរថា ពិសេស​នៅស្រុកព្រះអង្គផ្ទាល់តែម្តង រដ្ឋាភិបាលបានយកដីស្រែចំការ ដីព្រៃ ដែលប្រជាពលរដ្ឋធ្លាប់តែប្រកបរបរដាំដំណាំចិញ្ចឹម​ជីវិត កន្លែងស្មៅដែលធ្លាប់តែគង្វាល និងជាចំណីគោ ក្របី ដីព្រៃដែលធ្លាប់តែរកចំណី អុស ក៏ត្រូវបានធ្វើសម្បទានអស់​គ្មានសល់ និងក៏មិនមានដំណោះស្រាយណាមួយជូនប្រជាពលរដ្ឋនោះដែរ។

ការគង់នៅជាមួយនឹងការសិក្សា ក្នុងវត្តថាន់ នារាជធានីភ្នំពេញ ព្រះអង្គបានមានសង្ឃដីការបន្តរថា ព្រះអង្គនឹងបន្តរការ​ចូលរួមក្នុងមហាបាតុកម្មនេះគ្រប់បីថ្ងៃ ដោយចាប់បីម៉ោងប្រាំមួយព្រឹក រហូតដល់ល្ងាចទើបនិមន្តសឹងនៅវត្តវិញ។ ករណី​នេះព្រះអង្គបានបង្ហាញថា នេះជាសិទ្ធិរបស់ព្រះអង្គជាប្រជាពលរដ្ឋខ្មែរ ជាការសម្តែងមតិរបស់ព្រះអង្គ ព្រះអង្គនឹង​មិនខ្លាច​អ្វី ដែលព្រះអង្គមិនបានធ្វើខុសច្បាប់នោះទេ។ អ្វីដែលព្រះអង្គធ្វើ ព្រោះតែចង់ចូលរួមការពារនូវច្បាប់ និងការគោរពសិទ្ធិ​មនុស្សនៅកម្ពុជា ឲ្យបានពេញលេញ។

ព្រះអង្គបានរម្លឹកកាលពីល្ងាចថ្ងៃទី២៨ ខែកក្កដា ថាក្រោយការរាប់សន្លឹកឆ្នោត និងការប្រកាសប៉ុន្មាននាទីដំបូង ឃើញ​ថា​ស្ទើរគ្រប់ខេត្ត និងស្រុកទាំងអស់គណបក្សង្គ្រោះជាតិជាអ្នកជាប់(ឈ្នះ) ឯលទ្ធផលទើបតែប្រកាសបាន«បន្តិច» បែរជា​ធ្វើ​ការ«ផ្អាក»ទៅវិញ ហើយបានប្រកាសជាសរុប ដោយធ្វើការ«សន្មត» ដោយ គ.ជ.ប ថាគណបក្សប្រជាជនកម្ពុជា​បាន​៦៨កៅអីតែម្តង។ ទាក់ទិននឹងការហែរ«ញ្ញតិ»នេះ ព្រះអង្គបានបង្ហាញនូវការជឿទុកចិត្តថា «អាត្មាសង្ឃឹមមួយរយភាគរយ ជឿជាក់ថាបានលទ្ធិផលល្អ ក្រោមការជួយរបស់អង្គការសហប្រជាជាតិ។ (...) មានតែពេលនេះហើយដែលគេមើលឃើញ គេបានដឹងពីសង្គមខ្មែរ គេជួយ គេងើបឈរទាំងក្នុងនិងក្រៅប្រទេស ធ្វើការតស៊ូ។»

---------------------------------------------------------
ដោយ៖ អ៊ុម វ៉ារី - ថ្ងៃទី២៤ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ