ស្របពេលដែលគណបក្សសង្រ្គោះជាតិ បានបន្តប្រកាន់ជំហរម៉ឺងម៉ាត់ បដិសេធការចូលប្រជុំសភាលើកដំបូង និងនៅ​តែ​ទាមទារឲ្យមានការបង្តើត គណៈកម្មការចម្រុះស៊ើបអង្កេតពីភាពមិនប្រក្រតី ក្នុងកំឡុងពេលបោះឆ្នោត អង្គការតម្លាភាព​កម្ពុជា ក៏បានបង្ហាញរបាយការណ៍ ភាពមិនប្រក្រតីពាក់ព័ន្ធ នឹងការបោះឆ្នោតដែលអង្គការនេះ បានរកឃើញនាពេល​កន្លងមក។

លោកសុខ សំអឿន និង លោក ព្រាប កុល នៅក្នុងសន្និសិទការសែតបង្ហាញភាពមិនប្រក្រតីនៃការបោះឆ្នោត។ (រូបថត MONOROOM.info/ U. Bory)

រាជធានីភ្នំពេញ - ថ្ងៃទី១៩ខែកញ្ញា ឆ្នាំ២០១៣ នេះនៅសណ្ឋាគារអ៊ីភើរៀល អង្គការតម្លាភាពកម្ពុជាបាន​បង្ហាញពីភាព​មិនប្រក្រតីជាច្រើន ដែលអង្គការនេះបានរកឃើញក្នុងអំឡុងពេលបោះឆ្នោត និងក្រោយពេលបោះឆ្នោត។ អង្គការនេះ​បានលើកមកបង្ហាញនូវចំនុចជាច្រើន ក្នុងនោះរួមមាន មានឈ្មោះស្ទួន ឈ្មោះខ្មោច ចុះឈ្មោះច្រើនលើសកម្រិត ខ្វះ​តម្លាភាពសម្រាប់គណបក្សនយោបាយ ក្នុងការប្រើប្រាស់មធ្យោបាយ និងធនធានផ្សេងៗ ៦០ភាគរយនៃ​ការិយាល័យ​បោះឆ្នោត អ្នកបោះឆ្នោតដែលមានអត្តសញ្ញាណប័ណ្ណត្រឹមត្រូវ មិនអាចរកឈ្មោះគេឃើញ និងការបដិសេធបិទបញ្ជី​ឈ្មោះនៅតាមភូមិមុនពេលជាដើម។

របាយការណ៍ដដែលនេះ ក៏ស្មើរឲ្យមានការកែទម្រង់ច្បាប់ និងស្ថាប័នសំខាន់ៗមួយចំនួនផងដែររួមមាន ច្បាប់ស្តីពីការ បោះឆ្នោតជ្រើសតាំងតំណាងរាស្រ្ត ធានាឲ្យបាននូវឯករាជ្យភាពស្ថាប័នរបស់រដ្ឋ ដើម្បីទទួលបានូវទំនុកចិត្ត ចំពោះការ​បោះឆ្នោតនៅពេលអនាគត។

ប្រធានអង្គការតម្លាភាពកម្ពុជាលោក ព្រាប កុល បានចាត់ទុកការឆ្នោតជ្រើតាំងតំណាងរាស្រ្តនីតិកាលទី៥ ក្នុងឆ្នាំ២០១៣ នេះថា៖ «ជាការបោះឆ្នោតដែលមានការចាប់អារម្មណ៍ មានការប្រកួតប្រជែង និងមានការឈឺចាប់បំផុត»។ លោក ព្រាប កុល អះអាងថាគណៈកម្មាធិការជាតិ រៀបចំការបោះឆ្នោត គ.ជ.ប មិនមានភាពឯករាជ្យ និងប្រព័ន្ធច្បាប់បោះឆ្នោត​របស់​កម្ពុជាមានភាពខ្វះចន្លោះ ដូចច្នេះចាំបាច់ណាស់ដែលទាមទារឲ្យមានការកែទម្រង់។

បើទោះជាបន្ទប់ស្ថានការណ៍ ដែលមានក្រុមអង្គការសង្គមស៊ីវិលច្រើនជាង៤០ បានរកឃើញ និងបង្ហាញពីភាព​មិនប្រក្រតី​ក្នុងកំឡុងពេលបោះឆ្នោតថា មានភាពធ្ងន់ធ្ងរជាបន្តបន្ទាប់យ៉ាងណាក្តី ក៏គណៈកម្មាធិការជាតិរៀបចំការបោះឆ្នោត គ.ជ.ប និងគណបក្សប្រជាជនកម្ពុជា តែងតែបដិសេធ និងលើកឡើងថាភាពមិនប្រក្រតី មានចំនួនតិចតួចបំផុត ហើយក៏មិន​បណ្តាលឲ្យមានផលប៉ះពាល់ ដល់លទ្ធផលបោះឆ្នោតនោះទេ។

បេក្ខជនតំណាងរាស្រ្តជាប់ឆ្នោត គណបក្សសង្រ្គោះជាតិលោកស្រី មួ សុខហួរ ដែលបានចូលរួមក្នុងកម្មវិធីបង្ហាញ​របាយ​ការណ៍​របស់អង្គការ​តម្លាភាពកម្ពុជានោះដែរ បានអះអាងថា ភាពមិនប្រក្រតីក្នុងកំឡុងពេលបោះឆ្នោតមានភាពធ្ងន់ធ្ងរ ហើយបញ្ហាដែលបាន​កើតឡើងនេះ មិនមែនជាបញ្ហារបស់អ្នកណាម្នាក់នោះទេ វាគឺជាបញ្ហារួមរបស់​ប្រជាពលរដ្ឋខ្មែរ​គ្រប់​រូប។ តំណាងរាស្រ្តរូប​នេះបញ្ជាក់ថា៖ «ចាំបាច់ណាស់ដែលកម្ពុជា ត្រូវធ្វើការកំណែទម្រង់ស្ថាប័នសំខាន់មួយចំនួន ដើម្បី​ធានាថាកម្ពុជា​នឹង​មាន​ការអភិវឌ្ឍន៍ត្រឹមត្រូវ​ តាមបែបលទ្ធិប្រជាធិបតេយ្យ»។

ចំណែកឯលោកសុខ សំអឿន នាយក​ប្រតិបត្តិ​នៃអង្គការក្រុមអ្នកច្បាប់ការពាសិទ្ធិកម្ពុជា បានថ្លែងឲ្យដឹងដូច្នេះថា៖ «ច្បាប់​បោះឆ្នោតមិនអាច ធ្វើឲ្យអ្នកដែល​ប៉ុនប៉ងបន្លំក្នុងការបោះឆ្នោត ខ្លាចបាននោះទេ»។ លោក សុខ សំអឿន បន្ថែមថានៅ​ពេលដែលគេរក​ឃើញ​ភាពមិនប្រក្រងងផងិងិង គេមិនអាចរកអ្នកមកទទួលខុសត្រូវ មកផ្ដន្ទាទោសបាន តែបែជា​មានតែ​ការសម្របសម្រួលនោះទៅវិញ៕

-----------------------------------------------------
ដោយៈ អ៊ុំ បូរី - ថ្ងៃទី១៩ ខែកញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ