ប្រធានគណបក្សប្រឆាំង ដែលកំពុងរង នូវការស្វែងរកចាប់ខ្លួន ដោយដីកាបង្គាប់ឲ្យចាប់ខ្លួន របស់តុលាការ​រាជធានីនោះ បានរងនូវដីកាកោះហៅមួយទៀត របស់ចៅក្រមស៊ើបសួរ ឲ្យចូលបង្ហាញខ្លួន នៅថ្ងៃទី០៤ ខែធ្នូ ឆ្នាំ២០១៥ ខាងមុខនេះ ក្នុងសាលាដំបូង នៅរាជធានីភ្នំពេញ ជាកំហិត។ ចេញនៅថ្ងៃទី២០ ខែវិច្ឆិកានេះ «ដីកា​បង្គាប់ឲ្យចូលខ្លួន» មានពាក់ព័ន្ធក្នុងសំនុំរឿងសមគំនិត ក្លែងបន្លំឯកសារសាធារណៈ ប្រើប្រាស់ឯកសារ​សាធារណៈ​ក្លែង និងញុះញង់បង្ក ឲ្យមានភាពវឹកវរធ្ងន់ធ្ងរ ដល់សន្តិសុខសង្គម កាលពីថ្ងៃទី១២ ថ្ងៃទី១៣ ខែ​សីហា ឆ្នាំ២០១៥ កន្លងមក។

ចៅក្រមស៊ើបសួរ សាលាដំបូងរាជធានីភ្នំពេញ លោក កោ វណ្ឌី បានធ្វើការបញ្ចាក់ក្នុងដីកានោះថា៖ «ក្នុង​ករណី​មិនចូលខ្លួន តាមកាលកំណត់ខាងលើនេះទេ យើងនឹងចេញដីកាបង្គាប់ឲ្យនាំខ្លួន ឬដីកាបង្គាប់ឲ្យ​ចាប់​ខ្លួន ទៅតាមច្បាប់»។

ការចេញដីកាឲ្យចូលខ្លួន របស់ចៅក្រមស៊ីបសួរនេះ ត្រូវបានលោក រស់ សួរ មន្រ្តីជាប់ខ្ពស់ម្នាក់ មកពី​គណបក្ស​សង្គ្រោះជាតិ ចាត់ទុកថា ជាការធ្វើឡើងតាមបែបនយោបាយ ហើយលោកមិនបាន បង្ហាញភាពភ្ញាក់ផ្អើល​អ្វី​ឡើយ។ លោកបានថ្លែងចំអកមកវិញថា បើបាន«ដីកា»ច្រើន រហូតដល់ថ្នាក់សែងលែងរួច​ទៀតនោះ លោក សម រង្ស៊ី នឹងក្លាយជាវីរបុរសមិនខាន។

លោក រស់ សួរ បានថ្លែងប្រាប់ទស្សនាវដ្តីមនោរម្យ.អាំងហ្វូថា រាល់ការចោទប្រកាន់ របស់តុលាការគ្មាន​មូលដ្ឋាន និងការសំអាងច្បាស់លាស់ជាដើម។ មន្រ្តីរូបនេះ បានបង្ហាញនូវចម្ងល់ ចំពោះដីកានោះថា ហេតុអ្វី​មិន​មានការបញ្ជាក់ ពី«កម្មវត្ថុ»នៃសំនុំរឿង ឲ្យបានច្បាស់លាស់ បានត្រឹមតែបញ្ជាក់ពីថ្ងៃ និងទីកន្លែង ដែល​មាន​«វិលាសភាព» ពេញទាំងភ្នំពេញនោះ? លោកបន្តថា ការចោទប្រកាន់នេះ ត្រូវបានធ្វើឡើងតាមបែប​នយោបាយ ជាមួយនឹងការចង់ឈ្នះ ចង់ចាញ់គ្នា ព្រោះតែគ្មានលក្ខណៈណាមួយបង្ហាញថា ជាបទល្មើស​ឡើយ។ លោក រស់ សួរ បានចោទជាសំនួថា តើរាល់សកម្មភាព នៃអ្នកនយោបាយធ្វើដើម្បីជាតិ ត្រូវតែ​មាន​ការ​ប្តឹង​ផ្តល់​គ្នា យ៉ាង​ដូច្នេះ ឬយ៉ាងណា?

លោកបានលើកឡើងបែបចំអក យ៉ាងដូច្នេះថា៖ «មុននឹងក្លាយជាវីរបុរស (សម រង្ស៊ី) ទាល់តែមានដីការ និង​លិខិត​លើកលែងទោស លើកលែងរួច។ (...) ដូចរឿងព្រះមហាក្សត្រលើកលែងទោសហើយ ហោ ណាំហុង និយាយ​ថា​មិនដឹង... រឿងដែលគេបោះចោលទៅហើយនោះ រើសយកមកនិយាយវិញ។ តើកាតព្វកិច្ច​អ្នក​នយោបាយ ធ្វើ​ដើម្បី​ជាតិ ត្រូវតែប្តឹងផ្តល់គ្នាឬយ៉ាងណា?»

លោកបានស្រង់សម្ដីវិភាគ របស់លោក កែម ឡី មកថ្លែងបញ្ជាក់ថា៖ «គណបក្សប្រជាជនកម្ពុជា សល់​តែ​ក្បាល។ (...) ដូចករណីធ្វើបាតុកម្ម (ទាមទារទម្លាក់លោក កឹម សុខា) យកចៅសង្កាត់យកអីទៅធ្វើ»៕