ប្រជាពលរដ្ឋនៃសហគមមួយចំនួន មកពីតាមបណ្តាខេត្តក្រុងទាំង២៤ ដែលមានសមាជិកសរុប ប្រមាណជិតប្រាំរយនាក់ បានមកជួបជុំគ្នានៅទីតាំងខាងកើតជាប់ស្ពាននាគ ក្រោយពីបរាជ័យក្នុងការជួបជុំនៅលើទីលានប្រជាធិបតេយ្យ ព្រោះ​តែ​អាជ្ញាធរបានយកកន្លែងនោះ ធ្វើជា«សមយុទ្ធ» សម្រាប់ក្រុមបង្ក្រាបបាតុកម្មរបស់រដ្ឋាភិបាល។

ទិដ្ឋភាពសមាជប្រជាជន កាលពីព្រឹកថ្ងៃទី២១ខែតុលាឆ្នាំ២០១៣។ (រូបថត MONOROOM.info/ O.Vary)

រាជធានីភ្នំពេញ - «ចូលរួមធ្វើឲ្យមានសន្តិភាព គោរពសិទ្ធិមនុស្ស ប្រជាធិបតេយ្យ ឯករាជ្យ នីតិរដ្ឋអាស្រ័យរដ្ឋធម្មនុញ្ញ​ពិត​ប្រាកដ នៅកម្ពុជា» នេះជាប្រធានបទនៃការធ្វើសមាជប្រជាជនកម្ពុជា ដែលរៀបចំដោយបណ្តាញពហុវិស័យ ក្នុងគោល​បំណងស្វែងយល់ ពីស្ថានភាពប្រជាធិបតេយ្យនៅកម្ពុជា ដែលជាទិសដៅមួយ ទាមទារឲ្យមានប្រជាធិបតេយ្យពិតប្រាកដ មានគោលជំហរជួបជុំដោយអហិង្សា សន្តិភាព និងេចក្តីថ្លៃថ្នូរ មិនប្រឆាំងរដ្ឋាភិបាល មិនបំរើឲ្យគណបក្សនយោបាយ មិន​ប្រកាន់ពូជសាសន៍ តែទាមទាឲ្យមានដំណោះស្រាយរួម និងសម្រាប់ប្រយោជន៍រួម ។

លោកពូ ទីង តូវ ប្រជាពលរដ្ឋមកពីភូមិឈូក ស្រុកស្រែអំបិល ខេត្តកោះកុង ដែលរងគ្រោះបាត់បង់ដីស្រែចំការ ដោយសារ​ការរំលោភដីធ្លី ពីសំណាក់អ្នកមានអំណាច និងមិនមានការដោះស្រាយពីអាជ្ញាធរមូលដ្ឋានឡើយ។ លោកពូបន្តរថា ការ​ស្វែងរកការអន្តរាគមរបស់លោក ពីសំណាក់អាជ្ញាធរ ភូមិ-ឃុំ តែត្រូវបានពួកគាត់លើកឡើងថា «ហួសពីសមត្ថភាព​របស់​ពួកគាត់»។ លោកពូសង្ឃឹមថា មានតែមកដល់ភ្នំពេញនោះទេ ទើបអាជផ្តល់នូវព័ត៌មាននេះដល់ថ្នាក់ដឹកនាំបាន។

អ្នកមីង យឹង ខុម មកពីខេត្តកោះកុងដែរ ក៏រងការរំលោភបំពានដីលំនៅដ្ឋានតាំងពីឆ្នាំ២០០៩ រហូតមកទល់នឹងពេលនេះ។ អ្នកមីងថា សម្រាប់រូបគាត់ ក៏ដូចជាប្រជាពលរដ្ឋនៅទីនោះ មិនទាន់មាននណាម្នាក់មានប្លង់នោះទេ មានតែដំណាំ និង​លំនៅដ្ឋានសម្រាបើបញ្ជាក់តែប៉ុណ្ណោះ តែសម្រាប់ភាគីដែលបានប្តឹងអ្នកមីង គេមានប្លង់កម្មសិទ្ធិដីនេះ ហើយបានប្តឹង​ទៅ​តុលាការ រឹមអូសយកដីនេះ ។ ព្រោះតែការពារនូវដីលំនៅដ្ឋាន សមាជិកគ្រួសារអ្នកមីងបីនាក់ ត្រូវបានតុលាការ​សម្រេច​ឃុំខ្លួនអស់រយៈពេលជិតបីខែ ទើបបានតុលាការដោះលែងមកវិញ ដោយយោងលើការធានា ពីប្រជាលរដ្ឋក្នុងភូមិ​ជាមួយ​គា្នជាច្រើនធ្វើសាក្សី និងធានាលើការរស់នៅលើដីនោះ។ អ្នកមីងន្តរថា ទោះជាយ៉ាងនេះក្តីបញ្ហាដីរបស់អ្នកមីង នៅមានជា​បន្តរនៅឡើយមកទល់នឹងពេលនេះ ដូច្នេះក្នុងទិវាសមាជប្រជាជនកម្ពុជានេះ អ្នកមីងសូមថ្លែងពីទុក្ខ​លំបាករបស់ប្រជា​ពលរដ្ឋ ដ៏ដូចជារួមអ្នកមីងផ្ទាល់ ជូនដល់រាជរដ្ឋាភិបាលជួយដោះស្រាយ ពីទុក្ខលំបាកទាំងនេះជូនប្រជាពលរដ្ឋក្រីក្រ។

លោក ស៊ឹម សុបញ្ញា មកពីបណ្តាញនេសាទ បឹងទន្លេសាបបានបញ្ជាក់ថា «នៅពេលដែលគណបក្សនយោបាយ​មានភាព​ជាប់គាំង ប្រជាពលរដ្ឋមានសិទ្ធិក្នុងការក្រើនរំលឹក ទៅដល់គ្រប់គណបក្សដែលឈ្នះឆ្នោត ត្រូវធ្វើការគិតគូរ ពីតម្រូវការ និងសុខទុក្ខ របស់ប្រជាពលរដ្ឋ ជាចំបង ចង់ឲ្យមានការស្តាប់ និងទទួលយកនូវសំណើរ ជាមួយនឹងការឆ្លើយតប​ប្រកប​ដោយប្រសិទ្ធិភាព និងការទទួលខុសត្រូវខ្ពស់។ (...) ក្រោយពេលលិទ្ធិប្រជាធិបតេយ្យពិតប្រាកដមាននៅកម្ពុជា ពេលនោះ​រាល់បញ្ហាទាំងអស់របស់ប្រជាពលរដ្ឋ នឹងត្រូវបានដោះស្រាយជាស្ថាពរ។»

អ្នកស្រី សុខ ឌីណា មកពីស្រុក ស្វាយរៀង និងជាតំណាងឲ្យកម្មករកម្មការនី បានបង្ហាញថា ចង់ឲ្យគណបក្សដែលឈ្នះ​ឆ្នោតទាំងពីនេះ ធ្វើយ៉ាងណាគិតកូឲ្យបានច្រើនទៅលើបញ្ហា និងទុក្ខលំបាករបស់ប្រជាពលរដ្ឋ ក៏ដូចជាក្រុមកម្មករទាំង​អស់ទូទាំងប្រទេស។ មិនចង់បានភាពជាប់គាំងផ្នែកនយោបាយ ដែលនាំឲ្យបញ្ហាប្រឈមរបស់ប្រជាពលរដ្ឋ នៅតែបន្តរ​មានពិសេស ចង់បានលិទ្ធិប្រជាធិបតេយ្យមួយពិតប្រាកដ។

អ្នកស្រី ទេព វណ្ណី ដែលមានវត្តមាននៅក្នុងសមាជប្រជាជនកម្ពុជានោះ បានបង្ហាញជាថ្មីនូវការជាប់​ពន្ធនាគាររបស់​អ្នកស្រី​យ៉ោម បុប្ផា ថា ដោយសារតែការពារដីលំនៅដ្ឋានរបស់ខ្លួន បានតម្រូវឲ្យអ្នកស្រីធ្វើការតវ៉ារ ដោយអហិង្ស ដោយសន្តិវិធី​រហូតដល់មានការចាប់ដាក់គុក ដោយប្រព័ន្ធតុលាការកម្ពុជា ដែលមកទល់នឹងពេលនេះជាបមួយឆ្នាំតីហើយនោះ មិនទាន់​ត្រូវបានដោះលែងឲ្យមានសេរីភាពវិញនៅឡើយទេ។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្ស លីកាដូបានលើកឡើងថា បញ្ហាជាមក​ជួបជុំរបស់ប្រជាពលរដ្ឋ នោះជាការប្រើនូវសិទ្ធិរបស់ខ្លួន ដែលបានផ្តល់ជូនប្រជាពលរដ្ឋ ដោយច្បាប់រដ្ឋធម្មនុញ្ញ។ លោក​បានលើកឡើងជាដែលៗថា អាជ្ញាធរមិនត្រូវធ្វើការរឹតបណ្តឹង លើការសម្តែងមតិរបស់ប្រជាពលរដ្ឋ តាមរយៈការដាក់​កំលាំងដ៏ច្រើនសន្ធិកសន្ធាប់ធ្វើការតបតរ ឬបំបែងសូម្បីតែការជួបជុំក្នុងនាមបង្ហាញនូវទុក្ខលំបាករបស់ខ្លួន (ប្រជាពលរដ្ឋ) ដើម្បីឲ្យរដ្ឋាភិបាលបានដឹង នឹងជួយដោះស្រាយប៉ុណ្ណោះ។

ក្រោយពីការបង្ហាញនូវទុក្ខលំបាក របស់ខ្លួនរួចមក ប្រជាពលរដ្ឋទាំងអស់ ក៏បានស្នើឲ្យគណបក្សនយោបាយទាំងអស់ ដែល​ទទួលបានអសនៈនៅរដ្ឋសភា ធ្វើការរួបរួមគ្នា ដើម្បីប្រយោជន៍ជាតិ ប្រយោជប្រជាពលរដ្ឋជាធំ។ ជួយដោះស្រាយនូវ​បញ្ហា​ទុក្ខលំបាក របស់ប្រជាពលរដ្ឋដែលរាំរៃជាយូរឆ្នាំមកហើយ ជាពិសេសជួយជម្រុញឲ្យមានការគោរពច្បាប់ បំបាត់អំពើ​ពុក​រលួយ និងដឹកនាំប្រទេសឆ្ពោះ ទៅរកលិទ្ធិប្រជាធិបតេយ្យមួយដ៏ពិតប្រាកដ។

សូមរម្លឹកថា បណ្តាញពហុវិស័យ ជាបណ្តុំនៃបណ្តាញ និងសហគមន៍ ដែលមកពី២៤ខេត្ត-ក្រុង រួមមានដូចជា កម្មករ​រោង​ចក្រកាត់ដេរ កម្មករសេដ្ឋកិច្ចក្រៅប្រព័ន្ធ កសិករ ប្រជានេសាទ សកម្មជនដីធ្លី ជនជាតិដើមភាគតិច សកម្មជនសិទ្ធិ​សិទ្ធិស្រ្តី អ្នកប្រកបរបរផ្លូវភេទ សម្មជនយុវជន សកម្មជនប្រឆាំងនឹងការបណ្តេញចេញ សកម្មជនអ្នកស្រលាញភេទដូចគ្នា ក្រុម​សិល្បៈសហគមន៍ និងប្រជាជន។ នេះបើយោងតាមសេចក្តីប្រកាសព័ត៌មាន ស្តីពីសមាជប្រជាពលរដ្ឋកម្ពុជាចុះថ្ងៃទី២១ ខែកកញ្ញា ឆ្នាំ២០១៣៕

---------------------------------------------------------
ដោយៈ អ៊ុម វ៉ារី - ថ្ងៃទី២១ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ