សាលារាជធានីភ្នំពេញ បានស្នើឲ្យគណបក្សសង្គ្រោះជាតិ បញ្ឈប់សកម្មភាពប្រមូលស្នាមមេដៃ ពីប្រជាពលរដ្ឋនៅតាមផ្ទះ​ពលរដ្ឋ និងតាមទីសាធារណៈ ដូចជានៅតាមផ្សារជាដើមនៅទូទាំងរាជធានី ព្រោះវាប៉ះពាល់ដល់សណ្តាប់ធ្នាប់សាធារណៈ និងការរស់នៅរបស់ពលរដ្ឋ។ ជាមួយនឹងការអំពាវនាវនេះ មន្រ្តីរដ្ឋាភិបាលបានស្វាគមន៍ចំពោះសំណើនេះផងដែរ។ តែ​មន្រ្តី​បក្សប្រឆាំង អ្នកតាមដានស្ថានការណ៍សង្គម បានលើកឡើងថា គ្មានហេតុផលណាមួយ ធ្វើឲ្យប៉ះពាល់ដល់សណ្តាប់ធ្នាប់​សាធារណៈឡើយ។

រូបថតជំនួស- បង្ហាញពីមេដៃដែលផ្ដិតរួច។ (រូបថត MONOROOM.info)

រាជធានីភ្នំពេញ - «គ្រាន់តែប្រមូលស្នាមមេដៃពីពលរដ្ឋដែលគាំទ្រ ក៏ធ្វើឲ្យខូចសណ្តាប់ធ្នាប់សាធារណៈដែរ ពិតជា​ហួស​ចិត្តណាស់» ជាសម្តីរបស់លោក ហូ វ៉ាន់ មន្រ្តីជាន់ខ្ពស់គណបក្សសង្គ្រោះជាតិ ថ្លែងប្រាប់ទស្សនាវដ្ដី​មនោរម្យព័ងអាំងហ្វូ។  ប្រតិកម្មរបស់លោក ហូ វ៉ាន់ ក្រោយការចេញផ្សាយលិខិតស្នើសុំ របស់សាលារាជធានីភ្នំពេញមួយ ដែលសុំឲ្យមន្រ្តី​គណបក្សសង្រ្គោះជាតិ បញ្ឈប់សកម្មភាពប្រមូលញត្តិនឹងស្នាមមេដៃ ពីប្រជាពលរដ្ឋនៅតាមទីសាធារណៈទាំងអស់ និង​នៅតាមផ្ទះរបស់ប្រជាពលរដ្ឋ នៅទូទាំងរាជធានីភ្នំពេញ ក្រោមលេសថា វាធ្វើឲ្យប៉ពាល់ដល់«សណ្តាប់ធ្នាប់»សាធារណៈ និងការរស់នៅរបស់ប្រជាពលរដ្ឋ។

លោក ហូ វ៉ាន់ បានប្រាប់ទស្សនាវដ្តីមនោរម្យព័ងអាំងហ្វូ ទៀតថា មិនមានហេតុផលណាមួយ ដែលសាលារាជធានីភ្នំពេញ ត្រូវស្នើឲ្យគណបក្សសង្រ្គោះជាតិ ឈប់ធ្វើសកម្មភាពនេះឡើយ ពីព្រោះការប្រមូលស្នាមមេដៃជាសិទ្ធិរបស់ពលរដ្ឋ គណបក្សសង្គ្រោះជាតិ មិនបានទៅបង្ខំប្រជាពលរដ្ឋឲ្យផ្តិតមេដៃនោះឡើយ គឺពលរដ្ឋជាអ្នកស្ម័គ្រចិត្តដោយខ្លួនឯង។ មន្រ្តី​រូបនេះ បានបញ្ជាក់ទៀតថា ក្រុមការងាររបស់គណបក្សសង្គ្រោះជាតិ នៅថ្ងៃនេះ នៅបន្តធ្វើ​សកម្មភាពរបស់ខ្លួន​ដូចរាល់​ដង​ដែរ ពោលគឺគណបក្សមួយនេះ ធ្វើយុទ្ធនាការបម្រមូលស្នាមមេដៃ ពីពលរដ្ឋនៅតាមទីសាធារណៈតទៀត។

សូមរម្លឹកថា កាលពីថ្ងៃអង្គារម្សិលមិញនេះ សាលារាជធានីភ្នំពេញបានផ្ញើរលិខិតមួយច្បាប់ ដែលចុះហត្ថលេខាដោយ​អភិបាលរងរាជធានីភ្នំពេញ លោក ឃួន ស្រេង ជូនគណកម្មាធិការប្រតិបត្តិរបស់គណបក្សសង្គ្រោះជាតិ បានបង្ហាញថា ក្នុងរយៈពេលប៉ុន្មានថ្ងៃកន្លងមកនេះ គណបក្សសង្គ្រោះជាតិ បានដើរបម្រូលស្នាមមេដៃ ពីប្រជាពលរដ្ឋនៅ​តាមទី​សាធារណៈ និងផ្ទះរបស់ប្រជាពលរដ្ឋ នៅទូទាំងរាជធានីភ្នំពេញ ដែលធ្វើឲ្យប៉ះពាល់ ដល់ការរស់នៅរបស់ពលរដ្ឋ និង​សណ្តាប់ធ្នាប់សាធារណៈ។ ម្យ៉ាងទៀត គណបក្សនេះមិនបានសុំការអនុញ្ញាត ពីសាលារាជធានីភ្នំពេញនោះទេ។ នៅ​ក្នុង​លិខិតដដែរនោះ បានប្រាប់ឲ្យមន្រ្តីបក្សប្រឆាំង ឈប់ធ្វើសកម្មភាពបែបនេះទៀត ដោយឲ្យគណបក្សនេះ ប្រមូលស្នាម​មេ​ដៃពីប្រជាពលរដ្ឋ តែនៅទីស្នាក់ការរបស់ខ្លួន នៅក្នុងរាជធានីភ្នំពេញតែប៉ុណ្ណោះ។

ទាក់ទិននឹងបញ្ហានេះ លោក កែម ឡី ដែលជាអ្នកតាមដានស្ថានការណ៍នយោបាយនៅកម្ពុជា បានអត្ថាធិប្បាយ​ប្រាប់​ទស្សនាវដ្តីមនោរម្យព័ងអាំងហ្វូថា ការប្រមូលស្នាមមេដៃរបស់គណបក្សសង្គ្រោះជាតិ វាជាសិទ្ធិគណបក្សនយោបាយ ហើយពលរដ្ឋដែលជាអ្នកផ្តិតមេដៃឲ្យគណបក្សនេះ វាជាសិទ្ធិរបស់ពលរដ្ឋចូលរួមក្នុងឆាកនយោបាយ។ ដូច្នេះប្រសិន​បើ​ពលរដ្ឋគាំទ្រចង់ផ្តិតមេដៃ ជូនគណបក្សសង្គ្រោះជាតិ វាជាសិទ្ធិរបស់គាត់ ហើយមិនអាចឲ្យនរណា​មកហាមឃាត់បាន​ឡើយ ទោះបីធ្វើឡើងនៅក្នុងទីសាធារណៈ ឬផ្ទះរបស់ពលរដ្ឋក៏ដោយ។ អ្នកវិភាគរូបនេះបានបន្តថា ការធ្វើបែបនេះ វាកាន់​តែឆ្លុះបញ្ចាំងឲ្យឃើញពីភាពលម្អៀងរបស់អាជ្ញាធរ ដែលមិនមានភាពឯករាជ្យ និងបាត់បង់តម្លៃរបស់មន្ត្រីរដ្ឋាភិបាល។ លោកថា ប្រសិនបើខ្លាចប៉ះពាល់ដល់សណ្តាប់ធ្នាប់មែននោះ រដ្ឋាភិបាលគួរដាក់សមត្ថកិច្ចឲ្យជួយមើលការខុសត្រូវ ជួយ​ការពារចំពោះសកម្មភាពនេះទៅ។ លោក កែម ឡី បានបន្តថា កន្លងមកមន្រ្តីគណបក្សប្រជាជនកម្ពុជា ក៏ធ្វើសកម្មភាព​ បែប​នេះដែរ តែគ្មានអាជ្ញាធរឬស្ថាប័នណាថា ប៉ះពាល់សណ្តាប់ធ្នាប់នោះទេ។

ឆ្លើយតបនឹងបញ្ហានេះ ទស្សនាវដ្តីមនោរម្យព័ងអាំងហ្វូ មិនអាចសុំការបកស្រាយពីលោក ឡុង ឌីម៉ង់ មន្រ្តីអ្នកនាំពាក្យ​សាលារាជធានីភ្នំពេញបានទេ នៅថ្ងៃនេះ។ តែលោក ទិត្យ សុធា មន្រ្តីទីស្ដីការគណរដ្ឋមន្ត្រីនៃរដ្ឋាភិបាលកម្ពុជា បាន​លើក​ឡើងថា លោក​ស្វាគមន៍​ចំពោះការស្នើរបស់សាលារាធានីភ្នំពេញ លោកថា គណបក្សសង្គ្រោះជាតិ គួរតែគោរព​តាម​ការ​ណែនាំនេះ ដើម្បីរក្សានូវសណ្តាប់ធ្នាប់សាធារណៈ។ មន្រ្តីរូបនេះ បានបន្តថា «កុំដោយសារតែផលប្រយោជន៍របស់ខ្លួន ធ្វើឲ្យប៉ះពាល់ដល់ជីវភាពនិងការរស់នៅរបស់ពលរដ្ឋ ព្រមទាំងសណ្តាប់ធ្នាប់សាធារណៈ»។ លោក ទិត្យ សុធា បាន​ប្រាប់​ឲ្យគណបក្សសង្គ្រោះជាតិ ធ្វើការពិចារណាឡើងវិញ ជៀសវាងធ្វើសកម្មភាពដែលប្រាសចាក ពីផលប្រយោជន៍ពលរដ្ឋ និងសង្គមជាតិ។

បើតាមគម្រោងគណបក្សសង្គ្រោះជាតិ នឹងធ្វើការប្រមូលញត្តិ ដែលមានស្នាមមេដៃពីប្រជាពលរដ្ឋឲ្យបាន ៣លាន ៣សែន​នាក់ នៅមុនថ្ងៃធ្វើមហាបាតុកម្មលើកទី៣ របស់ខ្លួនដើម្បីជំទាស់ទៅនឹងការប្រកាសលទ្ធផលបោះឆ្នោត របស់​គណៈកម្មា​ធិការជាតិរៀបចំការបោះឆ្នោត។ ម្យ៉ាងវិញទៀតញត្តិ និងស្នាមមេដៃទាំងនេះ នឹងត្រូវដង្ហែយក​ទៅដាក់នៅអង្គការ​សហ​ប្រជាជាតិ តាមយៈឧត្តមស្នងការអង្គការនេះ ប្រចាំនៅកម្ពុជា និងយកទៅដាក់នៅប្រទេស ដែលជាហត្ថលេខី​នៃ​សន្ធិ​សញ្ញា​ក្រុងប៉ារីស ២៣ តុលា ឆ្នាំ ១៩៩១ មានអាមេរិក បាំរាំង ជាដើម៕

--------------------------------------------------------
ដោយៈ ជា ធីរិទ្ធ - ថ្ងៃទី ០៩ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ