គិតពីក្រោយថ្ងៃបោះឆ្នោតទី២៨ ខែកក្កដា រហូតមកដល់ថ្ងៃទី០៧ ខែតុលា ឆ្នាំ២០១៣ពេលនេះ ក្រុមមន្រ្តីរបស់គណបក្ស​ប្រជាជនកម្ពុជា និង​គណបក្សសង្រ្គោះជាតិបានជួបចរចាជាមួយគ្នា ចាប់ពីកំរិតទាបរហូតដល់កំរិតកំពូល យ៉ាងហោច​​ក៏​៥លើកដែរ តែគណបក្ស​ទាំងពីរនៅតែ មិនទាន់អាចបង្ហាញសញ្ញាវិជ្ជមានណាមួយ ដើម្បីទម្លាយភាពទាល់ច្រកនយោបាយ​នៅឡើយទេ ខណៈគណបក្សទាំងពីរនៅតែប្រកាន់គោលជំហរ«បញ្ច្រាស»គ្នា តែរៀងខ្លួននោះ។

ក្រុមអ្នកគាំទ្រគណបក្សសង្គ្រោះជាតិ នៅទីលានប្រជាធិបតេយ្យ កាលពីថ្ងៃទី០៦ខែសីហាឆ្នាំ២០១៣។ (រូបថត MONOROOM.nfo/ U. Bory)

រាជធានីភ្នំពេញ - ក្នុងពិធីសមាជរបស់គណបក្សសង្រ្គោះជាតិថ្ងៃទី៦ ខែតុលា ឆ្នាំ២០១៣ នៅទីលានប្រជាធិបតេយ្យ លោក កឹម សុខា អនុប្រធាន​គណបក្ស​ បានថ្លែងទៅកាន់អ្នកគាំទ្រថា បើទោះជារដ្ឋាភិបាល និងរដ្ឋសភាបានបង្កើតឡើងហើយក្តី ក៏ក្រុមអ្នក​តំណាងរាស្រ្តរបស់គណបក្សសង្រ្គោះជាតិទាំងអស់ មិនចូលរួមប្រជុំសភាជាដាច់ខាត ដរាបណាមិនទាន់មាន​ការ​ស្វែង​រក​យុត្តិធម៌ជូនប្រជាពលរដ្ឋ។

អនុប្រធានគណបក្សជំទាស់រូបនេះបន្តថា សមាជដែលរៀបចំដោយគណបក្សសង្រ្គោះជាតិ គឺមានដំណងចង់ឲ្យ​មជ្ឈដ្ឋាន​ជាតិ និងអន្តរជាតិបានដឹងថាការធ្វើសមាជថ្ងៃនេះប្រជាពលរដ្ឋចង់បានអ្វី។ លោក កឹម សុខា បញ្ជាក់ថា៖ «ប្រសិនបើគេមិន​ជួយដោះស្រាយ សមាជបែបនេះនឹងធ្វើធំជាងនេះទៅទៀត ហើយមហាបាតុកម្មនឹងមានទូទាំងប្រទេស»។

គណបក្សប្រជាជនកម្ពុជា ដែលជាគណបក្សគ្រប់គ្រងអំណាច រហូតមកដល់ពេលនេះ នៅតែអះអាងថាការបោះឆ្នោត​នៅ​កម្ពុជា ការបង្កើតរដ្ឋសភា និងរដ្ឋាភិបាលក្នុងនីតិកាលទី៥នេះ គឺបានប្រព្រឹត្តទៅដោយរលូន និងស្របតាមគោលការណ៍​ច្បាប់ ជាពិសេសច្បាប់រដ្ឋធម្មនុញ្ញ។ តែការអះអាងនេះ ត្រូវបានគណបក្សសង្រ្គោះជាតិធ្វើការច្រានចោល និងចោទប្រកាន់ ការបង្កើតរដ្ឋសភា និងរដ្ឋាភិបាលថ្មីដោយឯកបក្សនេះ ថាជាការរដ្ឋប្រហាររដ្ឋធម្មនុញ្ញ។

លោក សម រង្ស៊ី ប្រធានគណបក្សសង្រ្គោះជាតិ ក្នុងពិធីសមាជដដែល ក៏បានប្រកាសទៅកាន់អ្នកគាំទ្រដែរថា លោកនឹងធ្វើ​យុទ្ធនាការការទូតនៅបណ្តាប្រទេសលោកខាងលិច មានសហរដ្ឋអាមេរិក សហគមអ៊ឺរ៉ុប អង្គការសហប្រជាជាតិ និងបណ្តា​ស្ថាប័នហិរញ្ញវត្ថុអន្តរជាតិផ្សេងៗទៀត ដែលជាម្ចាស់ជំនួយ ឲ្យដាក់សំពាធលើរដ្ឋាភិបាលកម្ពុជាបច្ចុប្បន្ន។ លោក សម រង្ស៊ី បានបញ្ជាក់ថា៖ «បើរដ្ឋាភិបាលចង់បានជំនួយគេបន្តទៀត ទាល់តែប្រគល់អំណាចឲ្យប្រជារាស្រ្ត កុំលួចប្លន់អំណាច​ប្រជា​រាស្រ្ត​តាមរយៈលួចបន្លំសន្លឹកឆ្នោត»។

ទាក់ទងនឹងបញ្ហានេះអនុប្រធានគណបក្សប្រជាជនកម្ពុជា និងជានាយករដ្ឋមន្រ្តីថ្មីលោក ហ៊ុន សែន ធ្លាប់អះអាងក្នុង​ពេល​កន្លងមកថា កម្ពុជាមិនត្រូវការជនបរទេស ឬឯកអគ្គរដ្ឋទូតប្រទេសណាមួយ ប្រមុខរដ្ឋប្រទេសណាមួយ ទទួលស្គាល់​លទ្ធផលនៃការបោះឆ្នោត នៅកម្ពុជានោះទេ ព្រោះកម្ពុជាជារដ្ឋអធិបតេយ្យ។

គួរម្លឹកថាការបោះឆ្នោតជ្រើសតាំងតំណាងរាស្រ្តនីតិកាលទី៥ ដែលបានប្រព្រឹត្តនៅថ្ងៃទី២៨ ខែកក្កដា ឆ្នាំ២០១៣ និង​ការ​បង្កើតរដ្ឋសភា និងរដ្ឋាភិបាលជាបន្តបន្ទាប់ ត្រូវបានប្រទេសមួយចំនួនវាយតម្លៃថាមានភាពល្អប្រសើរ ដោយធ្វើការអបអរ​សារទរ និងប្រកាសទទួលស្គាល់។ តែទន្ទឹមនឹងនេះ ក៏មានប្រទេសមួយចំនួននៅតែសម្តែង ការស្ទាក់ស្ទើរក្នុងការទទួល​ស្គាល់រដ្ឋសភា និងដ្ឋាភិបាលថ្មីនេះ ហើយទាមទារឲ្យមានការស៊ើបអង្កេតពីភាពមិនប្រក្រតី ដោយតម្លាភាព ក្នុងដំណើរ​ការ​បោះឆ្នោតដ៏ចម្រូងចម្រាសនេះ ក្នុងនោះរួមមានសហរដ្ឋអាមេរិក សហគមន៍អ៊ឺរ៉ុប ដែលមានសមាជិក២៧ប្រទេស​ជាដើម៕

---------------------------------------------
ដោយ៖ អ៊ុំ បូរី - ថ្ងៃទី៧ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ