សហភាពអឺរ៉ុប៖ ការចាប់ខ្លួន កឹម សុខា បញ្ជាក់ពីកំណើនស្ថានភាពនយោបាយដ៏គ្រោះថ្នាក់
- ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី០៣ កញ្ញា ២០១៧
- កែប្រែចុងក្រោយ: September 04, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ទន្ទឹមគ្នានឹងប្រតិកម្មនានា ដែលកំពុងធ្លាក់ចុះជាបន្តបន្ទាប់ ប្រៀបបាននឹងគ្រាប់ភ្លៀងនោះ សហភាពអ៊ឺរ៉ុប ដែលជាស្ថាប័នបណ្ដុំប្រទេសចំនួន២៨ នៅក្នុងទ្វីបអ៊ឺរ៉ុប ក៏បានចេញសេចក្ដីថ្លែងការណ៍មួយ កាលពីល្ងាចថ្ងៃទី៣ ខែកញ្ញ ឆ្នាំ២០១៧នេះ ជុំវិញករណីចាប់ខ្លួនប្រធានគណបក្សប្រឆាំង លោក កឹម សុខា ដោយអាជ្ញាធររដ្ឋាភិបាលកម្ពុជានោះដែរ។
ប្រសិនជាប្រទេស ដែលមានទំនាក់ទំនង ប្រទេសនិងប្រទេស ជាមួយកម្ពុជា បានបង្ហាញជំហរបែបការទូត ជាមួយរដ្ឋាភិបាលលោក ហ៊ុន សែន នោះ តែសម្រាប់សហភាពអ៊ឺរ៉ុប ដែលជាម្ចាស់ជំនួយ និងជាលំហរទិសដៅនាំចេញធំជាងគេ សម្រាប់ប្រទេសកម្ពុជានោះ មិនសូវជាប្រើប្រាស់ភាសាការទូតប៉ុន្មានទេ។
ដូចក្នុងសេចក្ដីថ្លែងការណ៍ដែលផ្សាយចេញពី «ការិយាល័យអ៊ឹរ៉ុប ដើម្បីកិច្ចការខាងក្រៅ (The European External Action Service ហៅកាត់ EEAS - ហៅកាត់ជាភាសាបារាំង SEAE)» ក្នុងរាជធានី ប្រ៊ុយសែល ប្រទេសប៊ែលហ្សិក បានប្រកាសឡើងថា៖
«ការចាប់ខ្លួនមេដឹកនាំគណបក្សសង្គ្រោះជាតិ លោក កឹម សុខា កាលពីយប់ថ្ងៃ ទី២ ឈានចូលថ្ងៃទី៣ ខែកញ្ញា ដោយរំលោភអភ័យឯកសិទ្ធិសភា បានបញ្ជាក់ពីការកើនឡើង នៃស្ថានភាពនយោបាយដ៏គ្រោះថ្នាក់ នៅកម្ពុជា។ បន្ថែមពីលើទង្វើ របស់អាជ្ញាធររដ្ឋាភិបាល កាលពីពេលថ្មីៗ ប្រឆាំងនឹងអង្គការក្រៅរដ្ឋាភិបាល និងអង្គការសារព័ត៌មាននានា ការចាប់ខ្លួននេះ ជាការចង្អុលបង្ហាញឲ្យដឹង អំពីការប៉ុនប៉ងរឹតត្បិតលំហរប្រជាធិបតេយ្យ ក្នុងប្រទេសកម្ពុជា និងលំហរអំពីការរាយការណ៍ព័ត៌មាន ការបញ្ចេញមតិ និងការិះគន់ ដោយភាពឯករាជ្យ។»។
សេចក្តីថ្លែងការណ៍ដដែលបានបញ្ជាក់ថា៖
«ដំណើរការប្រជាធិបតេយ្យ ដែលគួរឲ្យជឿជាក់បាន ចំពោះការបោះឆ្នោតជ្រើសរើសតំណាងរាស្ត្រ ក្នុងខែកក្កដា ឆ្នាំ២០១៨ខាងមុខនោះ ចាំបាច់ត្រូវមានបរិយាកាស ដែលគណបក្សនយោបាយនានា អង្គការសង្គមស៊ីវិល និងបណ្តាញព័ត៌មាន អាចអនុវត្តតួនាទីស្របច្បាប់ របស់ពួកគេរៀងៗខ្លួន ដោយគ្មានការភ័យខ្លាច គ្មានការគំរាមកំហែង ឬការរឹតត្បិត តាមតែអំពើចិត្តឡើយ។»
«សហភាពអឺរ៉ុបត្រៀមខ្លួនរួចជាស្រេច ដើម្បីបន្តជួយកម្ពុជា ក្នុងកិច្ចប្រឹងប្រែងនេះ។ យើងក៏រំពឹងដែរថា អាជ្ញាធររដ្ឋាភិបាលកម្ពុជា គោរពសិទ្ធិរបស់ពលរដ្ឋ និងបណ្ដាអង្គការនានា នៅក្នុងប្រទេសកម្ពុជា ដែលត្រូវទទួលបាន នូវនីតិវិធីការពារខ្លួន នៅចំពោះមុខច្បាប់។ យើងសង្ឃឹមថា អាជ្ញាធរនឹងដោះលែងលោក កឹម សុខា ជាបន្ទាន់ ដោយយោងពីអភ័យឯកសិទ្ធសភា នៅជាធរមាន របស់លោក។»។
លោក កឹម សុខា ប្រធានគណបក្សប្រឆាំងធំ តែមួយគត់នៅកម្ពុជា និងអង្គរក្សរបស់លោកចំនួន៨នាក់ ត្រូវបានកងកម្លាំងនគរបាល ចូលទៅចាប់ខ្លួន នៅវេលាម៉ោង ០០ និង៣៥នាទី យប់រំលងអាធ្រាត ឈានចូលថ្ងៃទី០៣ ខែកញ្ញា ឆ្នាំ២០១៧ ដល់ក្នុងគេហដ្ឋានរបស់លោក ដែលស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។ រហូតមកដល់ពេលនេះ អង្គរក្សទាំង៨រូបនោះ ត្រូវបានដោះលែងមកវិញហើយ ខណៈលោក កឹម សុខា ត្រូវបានបញ្ជូនទៅឃុំខ្លួន នៅឯពន្ធនាគារត្រពាំងផ្លុង ក្នុងខេត្តត្បូងឃ្មុំ ជិតព្រំដែនខ្មែរ-យួន៕