RFA និង VOA អស់​អង់តែន​​រលក​ធាតុអាកាស​ផ្សាយ​បន្ត នៅ​កម្ពុជា

វិទ្យុផ្សាយសម្លេង នៅក្នុងស្រុកទាំងអស់ ដែលធ្លាប់ផ្សាយបន្ត នូវព័ត៌មានពីវិទ្យុអាស៊ីសេរី (RFA) និងវិទ្យុសម្លេងសហរដ្ឋអាមេរិក (VOA) ត្រូវបានក្រសួងព័ត៌មានកម្ពុជា លប់អាជ្ញាប័ណ្ណ និងចេញលិខិតហាម មិនឲ្យផ្សាយព័ត៌មានបន្ត ពីវិទ្យុអាមេរិកទាំងពីរខាងលើ។ ម្សិលម៉ិញនេះ វិទ្យុក្នុងស្រុក​ចំនួនពីរ បានទទួលបម្រាមនេះ ក្រោយគេបំផុត ឲ្យបញ្ឈប់ការផ្សាយព័ត៌មានឡើងវិញ របស់វិទ្យុខាងលើ ចាប់ពីថ្ងៃជូនដំណឹងនេះតទៅ។
RFA និង VOA អស់​អង់តែន​​រលក​ធាតុអាកាស​ផ្សាយ​បន្ត នៅ​កម្ពុជា
រូបសញ្ញាសម្គាល់របស់វិទ្យុសម្លេងសហរដ្ឋអាមេរិក (ខាងឆ្វេង) និងវិទ្យុអាស៊ីសេរី។ (រូបថតឯកសារ)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០៤ កញ្ញា ២០១៧
  • កែប្រែចុងក្រោយ: September 04, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

វិទ្យុអាស៊ីសេរី (RFA) និងវិទ្យុសម្លេងសហរដ្ឋអាមេរិក (VOA) នឹងមិនមានរលកធាតុអាកាស FM ផ្សាយបន្ត នៅក្នុងប្រទេសកម្ពុជាទៀតទេ បន្ទាប់ពីបម្រាមចុងក្រោយបង្អស់ចំនួនពីរច្បាប់ ត្រូវបានក្រសួងព័ត៌មាន ផ្ញើរទៅកាន់ម្ចាស់ស្ថានីយ៍វិទ្យុទាំងពីរ គឺវិទ្យុមណ្ឌលព័ត៌មានស្ត្រីកម្ពុជា ១០២ Mhz និងវិទ្យុសំបុកឃ្មុំ សង្គមប្រជាធិបតេយ្យ ១០៥ MHz។

នៅក្នុងលិខិតហាមពីរសន្លឹក ដាច់ដោយឡែកពីគ្នា ដែលចុះហត្ថលេខាក្នុងថ្ងៃទី៣ ខែកញ្ញា ឆ្នាំ២០១៧នេះ ដោយលោករដ្ឋមន្ត្រី ខៀវ កាញារីទ្ធ ក្រសួងព័ត៌មាន​បានពន្យល់ពីហេតុផល មិនឲ្យ​វិទ្យុទាំងនេះ ផ្សាយព័ត៌មានបន្ត ពី​វិទ្យុបរទេស​ទាំងពីរថា គឺដោយ​សារ​ក្រសួង​រក​ឃើញថា វិទ្យុអាស៊ីសេរី និងវិទ្យុវីអូអេ ពុំទាន់បានចុះ​បញ្ជី​ ការិយាល័យតំណាង​ស្របច្បាប់ ​នៅក្រសួង​ព័ត៌មាន។

លិខិតនោះបានបញ្ជាក់ថា ដើម្បីចៀសវាងការប្រព្រឹត្តិផ្ទុយពី «គោលការណ៍ច្បាប់» ក្រសួងព័ត៌មានតម្រូវ ឲ្យម្ចាស់ស្ថានីយ៍ បញ្ឈប់ការចាក់ផ្សាយឡើងវិញ នូវព័ត៌មានវិទ្យុអាស៊ីសេរី និងវិទ្យុសម្លេងសហរដ្ឋអាមេរិក ចាប់ពីថ្ងៃជូនដំណឹងនេះតទៅ។ លិខិតដដែលបានសរសេរព្រមានថា ប្រសិនបើ​វិទ្យណាមួយ នៅតែបន្តផ្សាយ​ព័ត៌មាន ពីវិទ្យុទាំងពីរខាងលើ នោះ​ក្រសួង​នឹងដក​អាជ្ញា​ប័ណ្ណ​វិទ្យុ​នោះ ឲ្យ​បញ្ឈប់ការផ្សាយ​ជាស្ថាពរ។

ស្រង់សំដីដោយប្រព័ន្ធផ្សព្វផ្សាយក្នុងស្រុក ម្ចាស់​ស្ថានីយ​វិទ្យុ​ទាំង​ពីរ ​គឺ​អ្នកស្រី ជា ស៊ុនដាណែត និងលោក ម៉ម សូណង់ដូ មិនមានជម្រើសអ្វីផ្សេង ក្រៅពីត្រូវធ្វើតាមបម្រាមនោះ ដោយ​លែង​ចាក់​ផ្សាយ​ព័ត៌មានបន្ត​ ពីវិទ្យុ​អាមេរិក ដែលផ្សាយជាខេមរភាសាទាំងពីរ។

ការហាមប្រាមវិទ្យុចំនួនពីរចុងក្រោយនេះ ធ្វើឡើងបន្ទាប់ពីក្រសួង​ព័ត៌មាន​ បាន​ដក​អាជ្ញាប័ណ្ណ ជាបន្តបន្ទាប់ តាំងពីថ្ងៃទី២៣ ខែសីហាមក បញ្ឈប់​ការ​ផ្សាយ​ទាំងស្រុង ​របស់​វិទ្យុ​ក្នុងស្រុក ​ជាង​១០ ផ្សេងទៀត ដែល​ធ្លាប់បានផ្សាយ​បន្ត នូវ​កម្មវិធីព័ត៌មាន របស់​វិទ្យុអាស៊ីសេរី និងវិទ្យុសម្លេងសហរដ្ឋអាមេរិក រួមទាំងវិទ្យុ​សំឡេង​ដើម្បី​ប្រជាធិបតេយ្យ (VOD) និង​កម្មវិធី​គោល​នយោបាយ ​របស់​គណបក្ស​សង្គ្រោះ​ជាតិ។ ក្រសួងព័ត៌មាន បានលើក​ហេតុផល​ថា ការ​​ផ្សាយ​កម្មវិធី​វិទ្យុ​​ពី​ប្រភព​ខាង​ក្រៅ បានធ្វើឡើង ដោយមិន​សុំ​ការ​អនុញ្ញាត​ ពី​ក្រសួង។

បណ្ដា​ស្ថាប័ន​ជាតិ និងអន្តរជាតិជាច្រើន ជាពិសេស​អង្គការ​សហប្រជាជាតិផង បានសំដែងប្រតិកម្មឡើងថា យុទ្ធនាការខាងលើ របស់​ក្រសួងព័ត៌មាន ធ្វើឡើងដើម្បី​រឹតត្បិតសេរីភាព និងឈានទៅបំបាត់សម្លេង របស់​ប្រព័ន្ធ​ផ្សព្វ​ផ្សាយ​​ឯករាជ្យ នៅមុនការបោះឆ្នោតជាតិ ដែលនឹងឈានចូលមកដល់ នៅខែកក្កដា​ឆ្នាំខាងមុខ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...