បើទោះជាគណបក្សសង្គ្រោះជាតិ ដែលជាគណបក្សប្រឆាំង បានចេញសេចក្ដីថ្លែងការណ៍អបអរសាទរ សាលក្រមនៃ​សាលាក្ដីយុត្តិធម៌អន្តរជាតិ ដែលសម្រេចឲ្យកម្ពុជាជាម្ចាស់កម្មសិទ្ធិស្របច្បាប់ លើផ្ទៃដីជុំវិញប្រាសាទព្រះវិហារ​នោះ​ក៏​ដោយ តែ​មន្ត្រីរបស់គណបក្សមួយនេះ បានបញ្ចេញទស្សនៈថា កម្ពុជាឈ្នះក៏ពិតមែន ក៏កម្ពុជាមិនមានអ្វីប្លែក ឬបាន​ចំណេញ​អ្វី​ជាដំកំភួនដែរ។ មិនប្លែកដោយសារថា ព្រះវិហារជារបស់ខ្មែរ និងនៅលើទឹកដីខ្មែរ តាំងពីដើមរៀងមក។

ប្រាសាទព្រះវិហារនឹងនៅតែជារបស់ខ្មែរដដែល។ (រូបថត ឯកសារ)

រាជធានីភ្នំពេញ - គណបក្សសង្គ្រោះជាតិ ដែលជាគណបក្សប្រឆាំងនៅក្នុងប្រទេសកម្ពុជា ធ្លាប់បានសម្តែង​ការជឿជាក់​រួចហើយថា ប្រាសាទព្រះវិហារនឹងនៅតែជារបស់ខ្មែរដដែល ពោលគឺកម្ពុជា ជាអ្នកឈ្នះនៅក្នុងរឿងក្តីនេះម្តងទៀត។ ក៏​ប៉ុន្តែ គណបក្សនេះបានអះអាងថា បើទោះបីជាខាងភាគីកម្ពុជា ទទួលបានជ័យជំនះលើកនេះម្តងទៀតក្តី ក៏វាគ្មានអ្វីប្លែក ឬផលចំណេញសម្រាប់ភាគីកម្ពុជាប៉ុន្មាននោះដែរ។ ដោយសារថា ប្រាសាទព្រះវិហារនេះ ជារបស់ខ្មែរតាំងពីយូរយា​ណាស់មកហើយ ដែលស្ថិតនៅក្រោមការគ្រងដោយខ្មែរ និងជាពិសេសជារបស់ដែលដូនតាខ្មែរ បានកសាងសម្រាប់​ប្រជាជនខ្មែរទាំងមូល។ នេះបើតាមសម្ដី នៃមន្រ្តីជាន់ខ្ពស់គណបក្សសង្គ្រោះជាតិ លោក សុន ឆៃ ដែលបានថ្លែងប្រាប់​ទស្សនាវដ្តី​មនោរម្យព័ងអាំងហ្វូ នៅថ្ងែទី១១ខែវិច្ឆិកា មុនការប្រកាសសាលក្រម នៃតុលាការអន្តរជាតិ។

ដោយសារតែនៅនោះ សាលក្រមមិនទាន់បានសម្រេចថានរណាឈ្នះ នរណាចាញ់នោះ លោក សុន ឆ័យ បានបន្ត​ទស្សនៈរបស់លោកទៀតថា តែផ្ទុយទៅវិញប្រសិនបើភាគីកម្ពុជា បានទទួលបរាជ័យលើកនេះ វាជាការអាម៉ាស និង​ជាខាតបង់ធ្ងន់ធ្ងរសម្រាប់ប្រជាជាតិកម្ពុជាទាំងមូល ដែលមិនអាចថែរក្សាសម្បត្តិដូនតា និងទឹកដីរបស់ខ្លួនបាន។ មិន​តែប៉ុណ្ណោះប្រជាជនខ្មែរមិនអាចទទួលយកបានឡើយ នូវភាពបរាជ័យរបស់ខ្លួន នៅចំពោះប្រទេសថៃ ដែលជាប្រទេស​ទើបតែកើតម្ងៃនោះ។

ក្រៅតែពីសេចក្ដីថ្លែងការណ៍អបអរសាទរ ចំពោះការប្រកាសសាលដីកា របស់តុលាការយុត្តិធម៌អន្តរជាតិ ទីក្រុងឡាអេ ដែលចុះនៅថ្ងៃទី១១ខែវិច្ឆិកាដដែលនោះ គេមិនឃើញគណបក្សប្រឆាំង មានសកម្មភាពអ្វីប៉ុន្មានទេ។ ទោះ​បីជាយ៉ាងណា លោក សម រង្ស៊ី នៅក្នុងវីដេអូអបអរសាទរសាលក្រមនេះ ពីទីក្រុងម៉ានីស ប្រទេសហ្វីលីពីន បាន​រម្លឹកពី​គុណូបការៈ​​ដ៏​ធំធេង របស់អតីតព្រះមហាវិរក្សត្រ ថាគឺព្រះបាទ នរោត្ដម សីហនុ ទៅ​វិញទេ ដែលក្នុងឆ្នាំ១៩៦២ បានប្ដឹងឈ្នះទាមទារ​ប្រាសាទនេះពីថៃមកវិញ។ លោក សម រង្ស៊ី បាននិយាយថា បើគេ​ស្នេហា​ជាតិ ស្នេហាទឹកដីពិតមែន គេមិនត្រូវសម្លឹង​មើលតែព្រំដែនខាងលិច (ព្រំដែនកម្ពុជា-ថៃ) ហើយភ្លេចព្រំដែនខាងកើត (ព្រំដែនកម្ពុជា-វៀតណាម) នោះឡើយ។

រហូតមកដល់ពេលនេះ គណបក្សសង្គ្រោះជាតិ អ្នកគាំទ្រ និងសកម្មជនព្រំដែននៅក្រៅប្រទេសជាច្រើននាក់ តែងចោទ​រដ្ឋាភិបាលលោក ហ៊ុន សែន និងគណបក្សប្រជាជនកម្ពុជា ដែលមានចំណងមេត្រីភាពស្អិតរមួត ជាមួយវៀតណាមនោះ ថាបានកាត់ទឹកដីជាប់«ព្រំដែន»ខាងកើត ជាពិសេស«កោះត្រល់» ទៅឲ្យប្រទេសវៀតណាម។ គេបានចោទប្រកាន់ថា លោកហ៊ុន សែន មិនត្រឹមតែមិនបានលប់សន្ធិសញ្ញាខុសច្បាប់ ដែលធ្លាប់បានធ្វើ នៅក្រោយឆ្នាំ១៩៧៩ ពេលដែល​វៀតណាមចូលឈ្លានពានកម្ពុជានោះប៉ុណ្ណោះទេ តែផ្ទុយទៅវិញ លោក ហ៊ុន សែន បានបង្កើតសន្ធិសញ្ញាផ្សេងទៀត ទៅបំពេញបន្ថែម ដើម្បីឲ្យកាន់តែមានភាពស្របច្បាប់។

ការចោទប្រកាន់ របស់ក្រុមប្រឆាំងខាងលើ ធ្លាប់ត្រូវបានរដ្ឋាភិបាល បដិសេធជារាល់ដង ហើយលោក ហ៊ុន សែន ខ្លួន​ឯង ក៏ធ្លាប់បានទៅបកស្រាយនៅក្នុងមន្ទីររដ្ឋសភា ដល់ទៅជាង«ប្រាំ»ម៉ោង ដោយគ្មានការនឿយហត់នោះ​ដែរ៕

-------------------------------------------------
ដោយ៖ ជា ធីរិទ្ធ - ភ្នំពេញ ថ្ងៃទី១២ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ