ប្រធានគណបក្សសង្គ្រោះជាតិ លោក សម រង្ស៊ី នៅយប់នេះ នឹងធ្វើដំណើរតាមយន្តហោះ ឆ្ពោះទៅកាន់បណ្តាប្រទេស​នៅ​សហគមន៍អ៊ឺរ៉ុប និងអង្គការសហប្រជាជាតិ នៅទីក្រុងញ៉ូយក សហរដ្ឋអាមេរិក។ ដំណើរទៅក្រៅប្រទេសរបស់លោក សម រង្ស៊ី នៅពេលនេះ ត្រូវបានលោក កែម ឡី អ្នកវិភាគនយោបាយនៅកម្ពុជាលើកឡើងថា គឺជាជំហាន វិជ្ជមានមួយ​សម្រាប់​គណបក្សប្រឆាំង។

លោកសម រង្ស៊ី ចុះជួបពលរដ្ឋអ្នកលក់ត្រកួន មុនពេលលោកឡើងយន្ដហោះ ថ្ងៃទី០៧ខែតុលាឆ្នាំ២០១៣។ (រូបថត គណបក្ស)

រាជធានីភ្នំពេញ - អ្នកវិភាគនយោបាយឯករាជ្យនៅកម្ពុជា លោក កែម ឡី បានធ្វើការអត្ថាធិប្បាយជុំវិញ ដំណើរទៅក្រៅ​ប្រទេសរបស់លោក សម រង្ស៊ី មេដឹកនាំបក្សប្រឆាំងប្រាប់ទស្សនាវដ្ដីមនោរម្យព័ងអាំងហ្វួ នៅថ្ងៃនេះថា នេះគឺជាយុត្តិសាស្រ្ត​ដ៏ល្អមួយ និងជាសកម្មភាពវិជ្ជមានមួយ របស់គណបក្សប្រឆាំងនៅកម្ពុជា។

ទាក់ទងនឹង«សកម្មភាពវិជ្ជមាន» ត្រូវបានលោក កែម ឡី បកស្រាយថា ដោយសារតែប្រទេសកម្ពុជាជាប្រទេស ដែលបាន​ចុះហត្ថាលេខា​លើសន្ធិសញ្ញាជាច្រើន នៅក្នុងក្របខណ្ឌអង្គការសហប្រជាជាតិ ដូច្នេះអង្គការនេះមានតួនាទីមាន​កាតព្វកិច្ច​ជួយ​ដោះស្រាយ នូវបញ្ហាដែលបានកើតឡើង នៅក្នុងបណ្តាប្រទេសដែលបានចុះហត្ថលេខា។ លោក បន្តថា ហើយដើម្បី​ឲ្យអង្គការអន្តរជាតិនេះ បានដឹងពីអ្វីដែលកើតមានឡើង ក្នុងប្រទេសហត្ថលេខី និងអាចជួយបានលុះត្រាតែធ្វើសកម្មភាព ដើម្បីបញ្ចុះបញ្ចូលឲ្យ បានដឹងនូវបញ្ហាដែលបានកើតឡើងនៅក្នុងប្រទេសនោះ។ តួយ៉ាងដូចជាសកម្មភាពរបស់ លោក សម រង្ស៊ីនេះជាដើម។

អ្នកវិភាគរូបនេះបន្តថា អ្វីដែលលោក សម រង្ស៊ី បានធ្វើ យ៉ាងហោចណាស់ក៏មានបណ្តាមេដឹកនាំធំៗមួយចំនួន ដែលបាន​ជួបនាយករដ្ឋមន្រ្តីខ្មែរ លោក ហ៊ុន សែន នៅក្នុងកិច្ចប្រជុំនានា ដូចជាកិច្ចប្រជុំ APEC ជាដើម ដែលមេដឹកនាំទាំងនោះ​អាច​នឹងជម្រុញឲ្យរដ្ឋាភិបាលកម្ពុជា ដោះស្រាយបញ្ហានៅក្នុងប្រទេសរបស់ខ្លួនផងដែរ។

សូមបញ្ជាក់ថា ថ្លែងនៅចំពោះមុខក្រុមអ្នកសារព័ត៌មាននៅថ្ងៃចន្ទនេះ បន្ទាប់ពីបានទៅចុះឈ្មោះបោះឆ្នោតនៅរសៀលនេះ លោក សម រង្ស៊ី ប្រធានគណបក្សសង្គ្រោះជាតិ ដែលគ្រោងនឹងចាកចេញពីប្រទេសកម្ពុជា សំដៅទៅកាន់ប្រទេស​នៅទ្វីប​អ៊ឺរ៉ុបនាយប់នេះ បានអះអាងថា នៅក្នុងបេសកម្មទៅក្រៅប្រទេសរបស់ខ្លួនលើកនេះ គឺធ្វើឡើងក្នុងគោលបំណង ដើម្បី
ស្នើ​ឲ្យអន្តរជាតិ កុំទទួលស្គាល់រដ្ឋាភិបាលកម្ពុជា និងកុំឲ្យធនាគារពិភពលោក ធនាគារអភិវឌ្ឍន៍អាស៊ី និងធនាគារផ្សេងៗ​ទៀតផ្តល់កម្ចីដល់ រដ្ឋាភិបាលលោក ហ៊ុន សែន ឲ្យសោះ។ រដ្ឋាភិបាល ដែលលោក សម រង្ស៊ី អះអាងថា «ជារដ្ឋាភិបាល​មិន​គ្រប់ទឹក»។

ជុំវិញបញ្ហានេះ ទស្សនាវដ្តីមនោរម្យព័ងអាំងហ្វ័ មិនអាចទាក់ទងសុំការបកស្រាយ ពីមន្រ្តីរដ្ឋាភិបាលបានទេនៅថ្ងៃនេះ។ ប៉ុន្តែក្នុងពេលកន្លងមក លោក ជាម យៀប ដែលជាមន្រ្តីជាន់ខ្ពស់រដ្ឋាភិបាលធ្លាប់បានអះអាងថា ពួកគេមិនភ្ញាក់ផ្អើលនោះ​ទេ ចំពោះសកម្មភាពរបស់មេដឹកនាំបក្សប្រឆាំង ។ តែលោក ជាម យៀប បានចាត់ទុកការអំពាវនាវឲ្យសហគមន៍​អន្តរជាតិ​មិនឲ្យផ្តល់ជំនួញដល់កម្ពុជា និងមិនឲ្យទទួលស្គាល់រដ្ឋាភិបាលបច្ចុប្បន្នថា ជាសកម្មភាពក្បត់ជាតិ៕

------------------------------------------------
ដោយ៖ ជា ធីរិទ្ធ - ថ្ងៃទី ០៧ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ