ស្បែកជើងមួយបានហោះ មកចំក្បួនរថយន្តរបស់លោកប្រធានាធបតីថ្មី របស់ប្រទេសអៀរ៉ង់ គឺលោក ហាសាន់ រ៉ូហានី (Hassan Rohani) កាលពីថ្ងៃសៅរិ៍ម្សិលមិញ បន្ទាប់ពីលោក រ៉ូហានី  បាននិយាយតាមទូរស័ព្ទ ជាមួយនឹងប្រធានាធិបតី​អាមេរិក លោក បារ៉ាក់ អូបាម៉ា (Barack Obama) ជាប្រវត្តិសាសន៍ កាលពីថ្ងៃសុក្រកន្លងទៅ។

លោក ហាសាន់ រ៉ូហានី ប្រធានាធិបតីថ្មីនៃប្រទេសអៀរ៉ង់ ពេលត្រឡប់ពីទីក្រុងញ៉ូយក មកដល់មាតុប្រទេសវិញ។ (រូបថត Atta Kenare /AFP/Getty Images)

រាជធានីភ្នំពេញ - ស្បែកជើងម្ខាងមិនដឹងហោះមកពីទីណា បានសំដៅមកចំក្បួនរថយន្ត របស់លោកប្រធានាធិបតីថ្មីនៃ​ប្រទេសអៀរ៉ង់ លោក រ៉ូហានី នៅពេលដែលលោកបានត្រលប់មកពីចូលរួមសន្និបាត​ អង្គការសហប្រជាជាតិនៅក្នុង​ទីក្រុង​ញូយ៉កសហរដ្ឋអាមេរិក មកដល់ផ្ទះរបស់លោកវិញ កាលពីថ្ងៃសៅរិ៍ទី២៨ខែកញ្ញាចុងសប្ដាហ៍នេះ។ ស្បែកជើងដែល​ហោះ​មកចំក្បួនរថយន្តលោក រ៉ូហានី នោះ ត្រូវបានគេដឹងថា ចេញមកពីក្រុមមនុស្សដែលមិនពេញចិត្តលោកប្រធានាធិបតីថ្មីរូប​នេះ ដែលបាននិយាយទូរស័ព្ទកាលពីថ្ងៃសុខកន្លងទៅ ជាមួយលោក បារ៉ាក់ អូបាម៉ា ប្រធានាធិបតីអាមេរិក។ ការជជែកគ្នា​តាមទូរស័ព្ទរបស់មេដឹកនាំទាំងពីរ បានបង្ហាញពីជំហានជាប្រវត្តិសាស្រ្ត​ដំបូងមួយ បន្ទាប់ពីប្រទេសទាំងពីរ បានមើល​មុខ​គ្នាមិនចំ អស់រយៈពេល​ជាង៣០ឆ្នាំមកហើយ ។

ស្បែកជើងនោះ បានចេញមកស្របពេលដែលមានមនុស្សចម្រុះចូលគ្នា កំពុងតែនាំគ្នាទទួលដំណើរវិលត្រលប់ មកកាន់​មាតុប្រទេសវិញ របស់លោក រ៉ូហានី។ នៅក្នុងការទទួលនោះ មានរួមទាំងប្រជាជន​អៀរ៉ង់ដែលគាំទ្រ និងខ្លះទៀតមិនគាំទ្រ ជុំវិញការជជែកតាមទូរស័ព្ទរបស់ប្រធានាធិបតីរបស់ពួកគេ ជាមួយលោក អូបាម៉ា​។ មានមនុស្សប្រមាណជាង ៦០នាក់បាន​ប្រមូលផ្តុំគ្នា នៅខាងក្រៅព្រលានយន្តហោះ ដោយស្រែកយ៉ាងកងរំពងថា ងាប់ទៅអាមេរិក ងាប់ទៅអ៊ីស្រាអែល។ ចំណែក​មនុស្សប្រមាណជា២០០ ទៅ៣០០នាក់ផ្សេងទៀត បានជួបជុំគ្នាស្រែកអរគុណលោក ប្រធានាធិបតីរ៉ូហានី។

សូមបញ្ជាក់ថា អាមេរិកនិងអៀរ៉ង បានមើលមុខគ្នាមិនចំអស់រាប់ទសវត្សរិ៍មកហើយ ។ ការមើលមុខគ្នាមិនចំនេះ មិនមែន​មានតែមេដឹកនាំនិងមេដឹកនាំនោះទេ សូម្បីប្រជាជននៃប្រទេសទាំងពីក៏ស្អប់ខ្ពើមគ្នាដែរ។ អៀរ៉ង់ស្អប់អាមេរិក ដោយសារ​តែកាលពីឆ្នាំ ១៩៥៣ អាមេរិកបានលូកដៃចូលកិច្ចការផ្ទៃក្នុងរបស់ប្រទេសអៀរ៉ង់។ គេបានចោទថា ក្រុមចារកម្មស៊ីអាយអេ (CIA) របស់អាមេរិក បានធ្វើរដ្ឋប្រហារទម្លាក់លោកប្រធានាធិបតី មហាមេដ ម៉ូសាដេជ (Mohammed Mossadegh) បន្ទាប់​មក បានលើកបន្តុបស្តេច មហាមាដ រ៉េស្សា ប៉ាឡាវី (Mohammad Reza Pahlavi) ឲ្យឡើងគ្រងរាជ្យ។ បញ្ហានេះ​បានធ្វើ​ឲ្យ​អ្នក​នយោបាយនិងប្រជាជនអៀរ៉ង់ ចាប់ផ្តើមស្អប់​អាមេរិក​តាំងពីពេលនោះមក។

រីឯអាមេរិកវិញ ស្អប់អៀរ៉ង់ ដោយសារតែ​កាល​ពីឆ្នាំ ១៩៧៩ ខណៈពេលដែលមានរដ្ឋប្រហារទម្លាក់ស្តេច ប៉ាឡាវី នោះ ស្រាប់​តែមាននិស្សិតអៀរ៉ង់មួយក្រុម បាន​សម្រុក​ចូលស្ថានទូតអាមេរិក ដោយចាប់មន្រ្តីទូតអាមេរិកជាចំណាប់ខ្មាំងចំនួន ៥៣ នាក់អស់រយៈពេលជាង១ឆ្នាំ។ ការណ៍នេះ ហើយ​បានធ្វើឲ្យអាមេរិកស្អប់អៀរ៉ង់យ៉ាងខ្លាំង រហូតមកដល់សព្វថ្ងៃ៕

---------------------------------------------------------
ដោយ៖ ជា ធីរិទ្ធ - ថ្ងៃទី ២៩ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ