អ្នកទទួលខុសត្រូវនៅសេតវិមាន បានចង្អុលបង្ហាញថា ប្រធានាធិបតីអាមេរិក កំពុងសិក្សាអំពីជម្រើសនយោបាយ និង​យោធា តែគេនៅមិនទាន់ដឹងថា ជម្រើសទាំងនោះនឹងមានអ្វីខ្លះ ហើយត្រូវអនុវត្តន៍ នៅពេលណានោះនៅឡើយ។

លោក ប៊េន រ៉ូដ៍ (Ben Rhodes) ទីប្រឹក្សាសន្តិសុខជាតិរបស់លោក បារ៉ាក់ អូបាម៉ា បានប្រកាសថា «យើងកំពុងរៀបចំ ចំនុចដែលអាចកើតឡើងជាច្រើន នៅស៊ីរី។ ហើយយើងនឹងធ្វើការសម្រេចចិត្ត នៅលើសកម្មភាពដែលត្រូវធ្វើ ទៅតាម​របាយការណ៍ផ្ទាល់របស់យើង។»

សេតវិមានបានបញ្ជាក់ថា របបលោកបាលឆា អាល អាសាធ (Bachar el-Assad) បានជ្រើសរើសអាវុធគីមី ជាពិសេស​«ហ្គាសសារីន» ក្នុងកម្រិតតិចតួច តែបានប្រើប្រាស់ជាច្រើនដង តាំងពីមួយឆ្នាំមកហើយ។សេតវិមានបានឲ្យដឹងទៀតថា រហូតមកដល់ពេលនេះ មនុស្សយ៉ាងហោចណាស់ ១៥០នាក់ បានស្លាប់ នៅក្នុងការវាយប្រហារប្រភេទនេះ។

រដ្ឋបាលរបស់លោក អូបាម៉ា ធ្លាប់បានអះអាងនៅខែមេសា អំពីការសង្ស័យរបស់សហរដ្ឋអាមេរិក​ ស្ដីពីការប្រើប្រាស់​«ហ្គាសសារីន» នេះរួចហើយនៅស៊ីរី។ ប៉ុន្តែនៅពេលនោះ អាជ្ញាធរអាមេរិក នៅមិនទាន់ច្បាស់ថា តើខាងណា ជាអ្នក​ប្រើប្រាស់អាវុធនេះនៅឡើយ។

នៅពេលនេះ ការបញ្ជាក់អះអាងដែលថា មានការប្រើប្រាស់អាវុធគីមីដោយរបបក្រុងដាម៉ាស ត្រូវបានបញ្ជូន​ទៅកាន់​អាមេរិក ដោយប្រទេសបារាំង។ រដ្ឋាភិបាលបារាំង និងអង់គ្លេស បានប្រកាសតាំងពីសប្ដាហ៍មុន ថាខ្លួនបានរកឃើញ​ពី​ភស្តុតាងដែលបញ្ជាក់ ពីការប្រើប្រាស់អាវុធដ៏ប្រល័យនេះ នៅស៊ីរី។

លោកប្រធានាធិបតី អូបាម៉ា បានថ្លែងជាច្រើនលើកហើយ ថាការប្រើប្រាស់អាវុធគីមី ដោយរបបនៅក្រុងដាម៉ាស វាជា​«បន្ទាត់ក្រហម»មួយ ដែលអាចផ្លាស់ប្ដូរនយោបាយរបស់សហរដ្ឋអាមេរិក ជុំវិញជម្លោះនៅប្រទេសស៊ីរី។ ហើយរហូត​មក​ដល់នឹងពេលនេះ រដ្ឋាភិបាលអាមេរិក បានត្រឹមតែផ្ដល់ជំនួយការយោធាកម្រិតស្រាល និងជំនួយផ្នែកមនុស្សធម៌​ប៉ុណ្ណោះ​ទៅក្រុមអ្នកបះបោរ។

សេតវិមាន បាននិយាយដែរថា សមាជិកនៃសភាជាន់ទាប ត្រូវបានជូនដំណឹង ពីសភាពការណ៍ បួករួមនឹងសម្ព័នមិត្ត​អន្តរជាតិ របស់សហរដ្ឋអាមេរិកនោះផង។

លោកអូបាម៉ា ក៏នឹងលើកមកជជែក ពីបញ្ហានេះ នៅជំនួបកំពូលហ្សេ៨ នៅសប្ដាហ៍ក្រោយ ក្នុងតំបន់អៀរឡង់ខាងជើង នៃប្រទេសអង់គ្លេសដែរ។ លោកប្រធានាធិបតីអាមេរិក នឹងដាក់សម្ពាធឲ្យប្រធានាធិបតីរ៉ូស្សី ដែលជាសម្ព័នមិត្ត​ដ៏ខ្លាំង​របស់របបក្រុងដាម៉ាស ឲ្យឈប់គាំទ្ររបបនេះតទៅទៀត៕