អ្នកចម្រៀងអាមេរិកាំងដ៏ល្បី ឡេឌី ហ្គាហ្គា (Lady Gaga) កំពុងត្រូវបានប្រឈមនឹងពាក្យបណ្ដឹងមួយ របស់វិចិត្រការិនី​ផ្នែកចម្លាក់មួយរូប ជាជនជាតិបារាំង ឈ្មោះ អ័ឡង់ (Orlan)។ វិចិត្រការិនី បានប្ដឹងអ្នកចម្រៀង ថាបានលួចចម្លងស្នាដៃ​របស់គាត់ នៅក្នុងថាសចម្រៀងដែលទើបនឹងចេញផ្សាយ ឈ្មោះថា «Born this way (កើតតាមរបៀបនេះ)»។

វិចិត្រការិនីចម្លាក់ អ័រឡង់ និងអ្នកចម្រៀងឡេឌី ហ្គាហ្គា ជុំវិញស្នាដៃដែលវិចិត្រការិនី ធ្វើការចោទប្រកាន់។

តើឡេឌី ហ្គាហ្គា ស្គាល់អ័រឡង់ឬទេ? មិនមែនជារឿងគួរឲ្យសង្ស័យទេ ព្រោះវិចិត្រការិនីជនជាតិបារាំង ក៏មានឈ្មោះ​ល្បី​ខ្លាំងណាស់ដែរ នៅលើឆាកអន្តរជាតិ ស្ដីពីសិល្បៈចម្លាក់ និងការតុបតែងពិសេសៗ។ នោះជាអ្វីដែល អ័ឡង់ បានប្ដឹង ឡេឌី ហ្គាហ្គា ទៅតុលាការទីក្រុងប៉ារីស ពីបទ«លួចរចនាមូដ» របស់ខ្លួន ដើម្បីធ្វើចម្រៀង «Born this way»។

វិចិត្រការិនីបារាំង បានបរិហាពីភាពមិនពិត នៃស្នាដៃរបស់អ្នកចម្រៀង ហើយចោទអ្នកចម្រៀងល្បីរបស់អាមេរិក ថាបាន​លួច«គំនិត»របស់ខ្លួន ដើម្បីចម្រៀងមួយនៅក្នុងថាសចម្រៀងចុងក្រោយ។ មិនត្រឹមតែប្ដឹងអ្នកចម្រៀងប៉ុណ្ណោះទេ តែ​តាម​រយៈមេធាវីរបស់ខ្លួន វិចិត្រការិនីបារាំង ថែមទាំងចោទប្រកាន់ផលិតកម្មចម្រៀង យូនីវស៊ល ញ៉ូស៊ីក (Universal Music) នៅបារាំង ដែលជាម្ចាស់ថាសចម្រៀងនោះទៀតផង។

ក្នុងថាសចម្រៀង «Born this way» ដែលចេញផ្សាយតាំងពីឆ្នាំ២០១១នោះ ឡេឌីហ្គាហ្គា បានសម្ដែងនៅក្នុងវីដេអូចម្រៀង​របស់នាង ជានារីចែងចាំងមួយរូប (មើលវីដេអូខាងក្រោម) ដែលសម្រាប់អ័ឡង់ គាត់បានចាត់ទុកថា ជាការលួចចម្លងនូវ​ស្នាដៃមួយរបស់គាត់ មានឈ្មោះថា «ការសម្គាល់សកលលោក ដោយភាពចម្រុះ (univers marqué par l'hybridation)»។ វិចិត្រករអ័រឡង់ ដែលមានវ័យ៦៦ឆ្នាំ បានកែឆ្នៃរូបរាងខ្លួនផ្ទាល់ខ្លួនរបស់គាត់ ដើម្បីចេញជារូបចម្លាក់មួយនោះ បានចោទ​ឡេឌីហ្គាហ្គា ថាបានលួចចម្លងរូបចម្លាក់របស់គាត់ដែលបានសម្រេចជារូបរាងតាំងពីឆ្នាំ១៩៨៩។

រូបចម្លាក់មួយ និងវិចិត្រការិនី អ័រឡង់។

វិចិត្រការិនីបារាំង ទាមទារសងជម្ងឺចិត្ត នូវទឹកប្រាក់ប្រមាណជា ៣១,៥លានដុល្លា (ប្រមាណជា២៣,៦លានអ៊ឺរ៉ូ) ព្រមទាំង​សុំឲ្យតុលាការបញ្ឈប់ការផ្សព្វផ្សាយវីដេអូចម្រៀង និងហាមប្រាមលែងឲ្យធ្វើពាណិជ្ជកម្ម នូវថាសចម្រៀងនេះថែមទៀត៕

ចង់ដឹងថា ស្នាដៃនោះមានរូបរាងយ៉ាងណា សូមទស្សនាវីដេអូចម្រៀង របស់ឡេឌីហ្គាហ្គា ដូចតទៅ៖

------------------------------------------------
ដោយ ឈូករ័ត្ន - ប៉ារីស​ ថ្ងៃទី១៣ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ