គឺជាតួលេខដែលផ្ដល់ដោយ មន្ត្រីជាន់ខ្ពស់មួយរូបរបស់គណបក្សប្រជាជនកម្ពុជា ដើម្បីឆ្លើយតបទៅនឹងការប្រកាស ធ្វើ​មហាបាតុកម្មលើកទី៣ របស់គណបកសង្គ្រោះជាតិ នៅថ្ងៃទី ២៣ ខែតុលាខាងមុខនេះ នៅទីលានប្រជាធិបតេយ្យ​រាជធានី​ភ្នំពេញ ដើម្បីបន្តទាមទាររកយុត្តិជូន ពលរដ្ឋ និងប្រឆាំងទៅនឹងលទ្ធផលបោះឆ្នោត ដែលប្រកាសដោយ គ.ជ.ប។ លោក ជាម យៀប បានប្រតិកម្មធ្ញន់ៗ ចំពោះការរៀបចំធ្វើមហាបាតុកម្មថា គ្មានប្រយោជន៍ និងបានរិះគន់យ៉ាងចាស់ដៃ​ចំពោះ​មេ​បក្សប្រឆាំង។

លោក កឹម សុខា (ខាងឆ្វេង) និងលោក សម រង្ស៊ី នៅក្នុងសន្និសិទការសែតគណបក្សសង្គ្រោះជាតិ ថ្ងៃទី២០ខែកញ្ញា​ឆ្នាំ២០១៣។ (រូបថត MONOROOM.info/ O. Vary)

រាជធានីភ្នំពេញ - «សម រង្ស៊ី មានខួរក្បាល៤០ ភាគរយទៅបារាំង និង ៤០ ភាគរយទៀត ទៅអាមេរិក តែ រង្ស៊ី មានខួរ​ក្បាលតែ ២០ ភាគរយប៉ុណ្ណោះ ដែលមកកម្ពុជា» នេះគឺជាសម្តីរបស់មន្រ្តីជាន់ខ្ពស់ លោក ជាម យៀប ដែលជាអ្នក​តំណាង​រាស្រ្តជិត ៣ទសវត្សរិ៍មកហើយ របស់គណបក្សប្រជាជនកម្ពុជា និងគណបក្សនេះឲ្យរហ័ស្សនាមថា ជា«បណ្ឌិតរដ្ឋ»​ផង​នោះ។ លោកបណ្ឌិតរដ្ឋ ជាម យៀប បានថ្លែងប្រាប់ទស្សនាវដ្តីមនោរម្យព័ងអាំងហ្វូ ជុំវិញការធ្វើ មហាបាតុកម្មលើកទី ៣ របស់គណបក្សសង្គ្រោះជាតិ ដោយវាយប្រហារមិនសំចៃ ចំពោះ មេដឹកនាំបក្សប្រឆាំង គឺលោក សម រង្ស៊ី ថាជាមនុស្ស​មាន​ស្មារតី«មិនប្រក្រតី» មិនគោរពតាមច្បាប់ និងជាអ្នកចង់ធ្វើឲ្យមានបញ្ហាជាប់គាំង​នយោបាយនៅកម្ពុជា។

បណ្ឌិតរដ្ឋ ជាម យៀប បានបន្តថា ការដឹកនាំធ្វើមហាបាតុកម្មរបស់មេបក្សប្រឆាំង គឺជាមហាបាតុកម្ម«គ្មានប្រយោជន៍»អ្វី សម្រាប់អ្នកគាំទ្រខ្លួនឡើយ តែផ្ទុយទៅវិញធ្វើឲ្យអ្នក គាំទ្រខ្លួនត្រូវខាត បង់ប្រយោជន៍ថែមទៀត។ លោក ជាម យៀប បាន​បញ្ជាក់ថាប្រសិនបើ គណបក្សសង្គ្រោះជាតិដាក់ លិខិតទៅកាន់អង្គការសហប្រជាជាតិនោះ វាជារឿងហួសពេលទៅហើយ ពីព្រោះរដ្ឋសភានិង រដ្ឋាភិបាលថ្មីបានកើតឡើង«ស្រប»តាមច្បាប់ពេញលេញ។

ជាប្រតិកម្មឆ្លើយតប តាមរយៈទស្សនាវដ្តីមនោរម្យព័ងអាំងហ្វូ អ្នកនាំពាក្យគណបក្សសង្គ្រោះជាតិ លោក យ៉ែម ប៉ុញ្ញឬទ្ធិ បានថ្លែងបញ្ជាក់ថា ការលើកឡើងរបស់លោក ជាម យៀប បែបនេះ វាគឺជាសិទ្ធិរបស់លោកតែប៉ុណ្ណោះ។ តែលោក ប៉ុញ្ញឬទ្ធិ គ្រាន់តែអះអាងថា សម្តីបែបនេះ របស់លោក ជាម យៀប គឺវាផ្ទុយពីជំហររបស់មេខ្លួន ពោលគឺលោក ហ៊ុន សែន ដែល​ធ្លាប់​ប្រកាសពីពេលកន្លងទៅថា ឲ្យមានវេទិការសាធារណៈ។ វេទិកាសាធាណៈដែល លោក យ៉ែម បុញ្ញរិទ្ធ អះអាងថា ដូចជាការ​ធ្វើមហាបាតុកម្មជាដើម ដែលអនុញ្ញាតឲ្យពលរដ្ឋបានបញ្ជេញមតិ និងរដ្ឋាភិបាលបានស្តាប់សំឡេងពលរដ្ឋ​ទាមទារផង​ដែរ។

ជុំវិញបញ្ហានេះ ក្រុមអ្នកវិភាគនយោបាយនៅកម្ពុជា បានមើលឃើញថា វាគឺជាជំហានអវិជ្ជមានមួយទៀត សម្រាប់​ស្ថានការណ៍នយោបាយនៅក្នុងប្រទេសកម្ពុជា ដែលធ្វើឲ្យគណបក្ស ទាំងពីរកាន់តែឃ្លាតឆ្ញាយពីគ្នា នៅក្នុងកិច្ចចរចាដើម្បី​ឈានទៅរកការឯក ភាពគ្នាដោះស្រាយបញ្ហរបស់ជាតិ។ មិនតែប៉ុណ្ណោះ បើអ្នកនយោបាយខ្មែរ នៅតែបន្តធ្វើ​សកម្មភាព​ពើងទ្រូងដាក់ គ្នា ចោទដាក់គ្នាទៅវិញទៅមក ដោយម្នាក់ៗគិតតែផលប្រយោជន៍ផ្ទាល់ខ្លួន ពោលគឺស្រេក ឃ្លាន អំណាច ដោយយកពលរដ្ឋជាឈ្នាន់ទេនោះ ពលរដ្ឋកម្ពុជានឹងត្រួវខាតបង់កាន់តែខ្លាំងឡើង ហើយមុខមាត់ប្រទេសនៅ​ក្នុងឆាក​អន្តរជាតិ នឹងត្រូវគេពេបជ្រាយជាមិនខាន។

ញ្ញត្តិដែលមានស្នាមមេដៃពលរដ្ឋជាង«៣លាន»នាក់

គណបក្សសង្គ្រោះជាតិ បានប្រកាសធ្វើមហាបាតុកម្មលើកទី ៣ របស់ខ្លួននៅថ្ងៃទី ២៣ ខែ តុលាខាងមុខនេះ នៅទីលាន​ប្រជាធិបតេយ្យរាជធានីភ្នំពេញ ដើម្បីទាមរកយុត្តិជូនពលរដ្ឋ និងប្រឆាំងទៅនឹងលទ្ធផលបោះឆ្នោត ដែលប្រកាសដោយ គ.ជ.ប។ ការប្រកាសជំហរបែបនេះ បានធ្វើឡើងក្រោយពីកិច្ចប្រជុំគណៈកម្មាធិការអចិន្រ្តៃយ៍ របស់គណបក្សសង្គ្រោះជាតិ កាលពីថ្ងៃម្សិលមិញ។ មហាបាតុកម្មនោះ នឹងធ្វើឡើងចាប់ពីម៉ោង ៣:០០ ដល់ម៉ោង ៦: ០០ ល្ងាច ដើម្បីដង្ហែញត្តិ​ទៅជូន​អង្គការសហប្រជាជាតិ និងប្រទេសជាហត្ថលេខីនៃសន្ធិសញ្ញា ក្រុងប៉ារីស ២៣ តុលា ឆ្នាំ១៩៩១ តាមរយៈឧត្តមស្នងការ​អង្គការ​សហប្រជាជាតិ ប្រចាំនៅកម្ពជា។

ញត្តិដែលគណបក្សសង្គ្រោះជាតិ គ្រោងនឹងដាក់ទៅកាន់អង្គការសហប្រជាជាតិ និងប្រទេសជាហត្ថលេខីនៃទីក្រុង​ប៉ារីស​នោះ ត្រូវបានលោក សម រង្ស៊ី អះអាងថា នឹងមានស្នាមមេដៃពលរដ្ឋជាង ៣លាននាក់ ក្នុងគោលបំណងដើម្បីប្រឆាំងនឹង​លទ្ធផលបោះឆ្នោត ដែលប្រកាស ដោយគ.ជ.ប ដោយឲ្យគណបក្សប្រជាជនទទួលជ័យជំនះ។ លោក សម រង្ស៊ី បាន​បញ្ជាក់ថា បច្ចុប្បន្នមន្រ្តីគណបក្សសង្គ្រោះជាតិ កំពុងតែរៀបចំប្រមូលនូវស្នាមមេដៃនេះហើយ៕

---------------------------------------------------------
ដោយ៖ ជា ធីរិទ្ធ - ថ្ងៃទី ២៨ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ