ក្រុមអង្គការសង្គមស៊ីវិលមួយក្រុម ដែលធ្វើការទាក់ទងនឹងការបោះឆ្នោត នៅថ្ងៃទី២៤ ខែសីហា ឆ្នាំ២០១៣ នេះបានធ្វើការ​វាយតម្លៃ ចំពោះលទ្ធផលបោះឆ្នោតបណ្តោះអាសន្ន និងបង្ហាញពីភាពមិនប្រក្រតីក្នុងកំឡុងពេលបោះឆ្នោត។

គម្មវិធីវាយតម្លៃរបស់អង្គការសង្គមស៊ីវិល ដែលធ្វើការខាងបោះឆ្នោត នៅទីស្នាក់ការខុមហ្រែល ថ្ងៃទី២៤ខែសីហា។ (រូបថត MONOROOM.info/ U. Bory)

ក្នុងកម្មវិធីដែលរៀបចំធ្វើដោយគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្រ្វែល លោក ព្រាប កុល ប្រធានអង្គការតម្លាភាពអន្តរជាតិកម្ពុជា និងជាវាគ្និននៅក្នុងកម្មវិធីនេះ បានថ្លែងថា៖ «ការ​បោះឆ្នោតនៅនីតិកាលទី៥នេះ គឺជាការបោះឆ្នោតប្រកបដោយ ភាពចម្រូងចម្រាសខ្លាំងជាងគេបំផុត និងមានការឈឺចាប់​ជាងគេ ព្រោះអ្នកចង់បោះឆ្នោតមិនបានបោះឆ្នោត»។ លោកបានពន្យល់ថា អ្នកឈ្នះឆ្នោតមិនពេញមុខមិនពេញមាត់ រីឯអ្នក​ចាញ់មិនអស់ចិត្ត ខណៈដែលមានចម្ងល់ និងការព្រួយបារម្ភទូទាំងប្រទេស។

ប្រធានអង្គការតម្លាភាពអន្តរជាតិកម្ពុជារូបនេះ បានដាក់ការសង្ស័យ អំពីសុច្ចរិតភាពរបស់គណៈកម្មាធិការជាតិ​រៀបចំ​ការ​បោះឆ្នោត គ.ជ.ប និងបានហៅការបោះឆ្នោតជាតិ នៅថ្ងៃទី២៧ ខែកក្កដា ឆ្នាំ២០១៣ថា មិនបានឆ្លុះបញ្ចាំងពីឆន្ទះពិត​របស់​ប្រជាពលរដ្ឋ គ្មានសេរីភាព និងយុត្តិធម៌។ លោក ព្រាប កុល បញ្ជាក់ថាអង្គការតម្លាភាពអន្តរជាតិកម្ពុជា នឹងចេញ​របាយ​ការណ៍លំអិត អំពីបញ្ហានេះនៅថ្ងៃទី១៦ ខែកញ្ញា ឆ្នាំ២០១៣។

ប្រធានគណបក្សសង្រ្គោះជាតិ លោក សម រង្ស៊ី កន្លងមកបានធ្វើការបដិសេធ លទ្ធផលបោះឆ្នោតបណ្តោះអាសន្ន ដែល​ប្រកាសឲ្យដឹងដោយ គ.ជ.ប ដោយលោកអះអាងថា មានឈ្មោះប្រជាពលរដ្ឋច្រើនជាង ១លាននាក់ត្រូវបានគេលប់​ចេញ​ពីបញ្ជីបោះឆ្នោត និងមានភាពមិនប្រក្រតីជាច្រើនករណី ហើយបានស្នើរឲ្យមានការស៊ើបអង្កេត ពីភាពមិនប្រក្រតីក្នុង​អំឡុងពេលបោះឆ្នោតឡើងវិញ។

នាយកប្រតិបត្តិ អង្គការសង្កេតការណ៍បោះឆ្នោតដោយសេរី និងយុត្តិធម៌នៅកម្ពុជា ហៅកាត់ជាភាសាអង់គ្លេស ខុមហ្វ្រែល លោក គល់ បញ្ញា បានថ្លែងនៅក្នុងពិធីនេះដែរថា៖ «ការប្រកាសលទ្ធផលបណ្តោះអាសន្ន ដោយ គ.ជ.ប នៅថ្ងៃទី១២ ខែ​សីហា ឆ្នាំ២០១៣ បានភ្ជាប់ផលវិបាកជាច្រើន»។ លោកអះអាងថា អង្គការ ខុមហ្រ្វែលរកឃើញភាពមិនប្រក្រតី ច្រើន​ជាង​១១០០០ករណី ក្នុងកំឡុងពេលបោះឆ្នោត។

លោក គល់ បញ្ញា ពន្យល់ថាភាពមិនប្រក្រតី ដែលអង្គការរបស់លោកបានរកឃើញ រួមមាន ៤៨ ភាគរយក្នុងចំណោម អ្នក​ដែលអត់បានទៅបោះឆ្នោត បានអះអាងថាពួកគេបានទៅ តែបានជួបឧបស័គ្គមួយចំនួនដូចជា គ្នានឈ្នោះក្នុងបញ្ជី​បោះ​ឆ្នោត មានបញ្ហាទាក់ទងនឹងឯកសារបោះឆ្នោត រកទីតាំងបោះឆ្នោតមិនឃើញ ឈ្នោះរបស់ខ្លួនត្រូវបានគេបោះរួចហើយ បញ្ជីប៉ោង មានការដឹកជញ្ជូនមនុស្សឲ្យមកបោះឆ្នោត និងការរកឃើញថាទឹកខ្លៅជ្រលក់ដៃអាចលាងជ្រះ។ លោកបញ្ជាក់​ថា៖ «ភាពមិនប្រក្រតីទាំងនេះ អាចប៉ះពាល់ដល់លទ្ធផលបោះឆ្នោត»។

សូមរម្លឹកថា គណៈកម្មាធិការជាតិរៀបចំការបោះឆ្នោត គ.ជ.ប តែងតែប្រកាសបដិសេធចំពោះការលើកឡើង និងការ​ព្រួយ​បារម្ភរបស់ក្រុមអង្គការសង្គមស៊ីវិល ដោយអះអាងថា គ.ជ.ប អនុវត្តគ្រប់នីតិវិធីទាំងអស់ គឺស្របតាមគោលការណ៍ច្បាប់។ ប៉ុន្តែ គ.ជ.ប ក៏ត្រូវបានរងការចោទប្រកាន់ ពីគណបក្សប្រឆាំងត្រឡប់មកវិញដែរថា គ្នានភាពឯករាជ្យ និងលំអៀងទៅ​រក​គណបក្សប្រជាជនកម្ពុជា ដែលជាគណបក្សកាន់អំណាច របស់បុរសខ្លាំងលោកហ៊ុន សែន៕

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៤ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ