ម៉ែនស៊ីធី បើក​​ឆាក​​រដូវ​​កាល​​លត់ ញ៉ូកាស្ស៊ល ៤-០ (VDO)

គ្រូបង្វឹកថ្មីក្រុមម៉ែនឆេស្ទើ ស៊ីធី (Manchester City) លោក ម៉ាញ៉ូអែល ប៉េឡេហ្គ្រីនី (Manuel Pellegrini) ពិតជាពេញចិត្ត ក្នុងការចាប់ផ្តើមការប្រកួតក្របខ័ណ្ឌព្រីមែលីក (Premier League) របស់គាត់ បន្ទាប់ពីក្រុមមេឃខៀវ បានលត់ក្រុម​សារិកា​ព្រៃ ញ៉ូកាស្ស៊ល (Newcastle) ដែលសល់គ្នាត្រឹមតែ ១០នាក់នៅវគ្គទី២ ដោយលទ្ធផល ៤-០ កាលពីយប់ថ្ងៃច័ន្ទ។
Loading...
  • ដោយ: វិន ជីវ័ន្ត
  • កែប្រែចុងក្រោយ: August 20, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

គ្រូបង្វឹកថ្មីក្រុមម៉ែនឆេស្ទើ ស៊ីធី (Manchester City) លោក ម៉ាញ៉ូអែល ប៉េឡេហ្គ្រីនី (Manuel Pellegrini) ពិតជាពេញចិត្ត ក្នុងការចាប់ផ្តើមការប្រកួតក្របខ័ណ្ឌព្រីមែលីក (Premier League) របស់គាត់ បន្ទាប់ពីក្រុមមេឃខៀវ បានលត់ក្រុម​សារិកា​ព្រៃ ញ៉ូកាស្ស៊ល (Newcastle) ដែលសល់គ្នាត្រឹមតែ ១០នាក់នៅវគ្គទី២ ដោយលទ្ធផល ៤-០ កាលពីយប់ថ្ងៃច័ន្ទ។


កីឡាករខ្សែបម្រើ ដេវីដ ស៊ីលវ៉ា និងកីឡាករខ្សែប្រយុទ្ធ អេឌីន ឌីស្សិកូ នៃក្រុមម៉ែនឆេស្ទើ ស៊ីធី។ (រូបថត Andrew Yates/AFP/Getty Images)

ក្រុមជើងឯករង មែនស៊ីធី ដែលជាម្ចាស់ផ្ទះស្រាប់ផងនោះ បានបើកការវាយលុកតាំងតែពីនាទីទី៦ ដោយកីឡាករខ្សែបម្រើ ដេវីដ ស៊ីលវ៉ា (David Silva) លោតតែតបញ្ចូលទី បន្ទាប់ពីខ្សែប្រយុទ្ធ អេឌីន ឌីស្សិកូ (Edin Dzeko) ទាត់កាត់មុខទី ហើយ​អ្នកចាំទីរបស់ក្រុមញ៉ូកាស្ស៊ល ធីម គ្រុល (Tim Krul) ទះបាល់ចេញមិនបានល្អ។

ខ្សែប្រយុទ្ធអន្តរជាតិអាស្សង់ទីន សឺជីអូ អាក្វេរ៉ូ (Sergio Aguero) ដែលទើបតែត្រឡប់មកពីរបួស ជាអ្នករកគ្រាប់បាល់​បញ្ចូលទីគ្រាប់ទី២ បានសម្រេចនៅនាទីទី២២ បន្ទាប់ពីប្រជែងជាមួយនឹងខ្សែការពារ ស្តេវិន តៃឡរ (Steven Taylor) ហើយក៏ទាត់បាល់រ៉ា ទៅចំហៀងខាងឆ្វេងផុតដៃ ធីម គ្រុលយ៉ាងល្អ។

កីឡាករឆ្នើមអន្តរជាតិកូឌឺវ័រ យ៉ាយ៉ា តូរ៉េ (Yaya Toure) បញ្ចេញថ្វីជើងយ៉ាងអស្ចារ្យ ដោយទាត់បាល់ពិន័យហ្វ្រេឃីត (free-kick) បញ្ចូលទីយ៉ាងស្អាត នៅនាទីទី៥០ បន្ទាប់ពីកីឡាករខ្សែការពារក្រុមញ៉ូកាស្ស៊ល ស្តេវិន តៃឡរ ទទួលបាន​កាតក្រហម នៅនាទីទី៤៥។

ខ្សែបម្រើអន្តរជាតិបារាំង សាមឺ ណាស្រ៊ី (Samir Nasri) ដែលស្ថិតក្នុង​នាមជាកីឡាករបម្រុងនោះ​ក៏បានបញ្ចេញស្នៀត​យ៉ាងអស្ចារ្យដែរ បន្ទាប់ពីរត់ឆាបវ៉ាដាច់ខ្សែការពារក្រុមញ៉ូកាស្ស៊ល ហើយទាត់បំប៉ោងសំណាញ់ទីគ្រាប់ទី៤ បាន​សម្រេច​នៅនាទីទី៧៤។

គ្រូបង្វឹកក្រុមញ៉ូកាស្ស៊ល លោក អាឡែន ផាឌូ (Alan Pardew) បាននិយាយបន្ទាប់ពីក្រុមរបស់លោកប្រកួតចាញ់ថា៖ «ទម្រង់លេងត្រូវបានកែប្រែទាំងស្រុង បន្ទាប់ពីទទួលបានកាតក្រហម។ ខ្ញុំទទួលស្គាល់ថា ការទាត់បញ្ចូលទី ២គ្រាប់​ដំបូង​របស់ក្រុមម៉ែនស៊ីធី ដោយសារតែកីឡាករល្អៗ របស់គេពិតមែន ប៉ុន្តែ២គ្រាប់ទៀតនៅវគ្គទី២នោះ ដោយសារតែកីឡាករ ស្តេវិន តៃឡរ ត្រូវបណ្តេញចេញពីទីលានប្រកួតទេ ទើបពួកគេមានឱកាសដូចនោះ។»

បុរសសញ្ជាតិអង់គ្លេស វ័យ៥២ឆ្នាំបានបន្ថែមថា៖ «អ្នកចាំទី ធីម គ្រុល ធ្វើការបានល្អ ប៉ុន្តែទោះជាយ៉ាងណា មិនអាចទប់​ស្កាត់​ការទាត់ពីសំណាក់កីឡាករឆ្នើមៗ របស់ម៉ែនស៊ីធីបាននោះទេ ព្រោះពួកគេស្រេកឃ្លានជ័យជំនះខ្លាំង ដើម្បីប្រជែង​រកពានរង្វាន់នៅក្នុងរដូវកាលនេះ។ នៅទីបំផុតពួកយើងចាញ់ ប៉ុន្តែយើងនឹងធ្វើឲ្យបានល្អនូវការប្រកួតបន្ទាប់៕»

ទស្សនាការប្រកួតដោយសង្ខេបនេះ ឡើងវិញ៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២០ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...