បន្ទាប់ពីសំណើរលើកទីមួយ ត្រូវបានទាត់ចោលនោះរួចមក លោក សម រង្ស៊ី បានសម្រេចដាក់សំណើរជាលើកទីពីរ ទៅ​គណៈកម្មាធិការជាតិរៀបចំការបោះឆ្នោត (គ.ជ.ប) ដោយមានភ្ជាប់ជាមួយនូវអំណះអំណាងផ្លូវច្បាប់ ដើម្បីបើកផ្លូវឲ្យ​លោក អាចដាក់ឈ្មោះក្នុងបញ្ជីអ្នកបោះឆ្នោត និងបញ្ជីបេក្ខជនឈរឈ្មោះបោះឆ្នោត ជ្រើសតាំងតំណាងរាស្រ្តនីតិកាលទី៥ ថ្ងៃទី២៨ ខែកក្កដា ឆ្នាំ២០១៣។ តែសម្រាប់ គ.ជ.ប. បានបញ្ជាក់ថា នឹងពិនិត្យរឿងនេះនៅរសៀលថ្ងៃទី២៤ខែកក្កដានេះ។

សន្និសិតរបស់គណៈកម្មាធិការជាតិរៀបចំការបោះឆ្នោត នាព្រឹកថ្ងៃទី០៤ខែកក្កដា។ (រូបថត MONOROOM.info/ U. Bory)

លិខិតរបស់លោក សម រង្ស៊ី ដែលបានផ្ញើរទៅ គ.ជ.ប ជាលើកទីពីរចុះថ្ងៃទី២៣ ខែកក្កដា ឆ្នាំ២០១៣បានលើកយក​លិខិត​បទដ្ឋាន គតិយុត្តសំខាន់ៗចំនួនបួនមកអះអាង ក្នុងនោះរួមមាន៖

ទី១. ព្រះរាជក្រឹត្យស្តីពីការលើកលែងទោសចុះថ្ងៃទី១២ ខែកក្កដា ឆ្នាំ២០១៣។
ទី២. មាត្រា១៥នៃច្បាប់ស្តីពីលក្ខន្តិកៈតំណាងរាស្រ្ត។
ទី៣. មាត្រា១៦នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត និងវិសោធនកម្មច្បាប់ ស្តីពីការបោះឆ្នោតជ្រើសតាំង​តំណាងរាស្រ្ត។
និងទី៤. លិខិតលេខ៦៣៣/១៣របស់ គ.ជ.ប ចុះថ្ងៃទី២២ ខែកក្កដា ឆ្នាំ២០១៣។

ខ្លឹមសារក្នុងលិខិតខាងលើបានអត្ថាធិប្បាយថា ឈ្នោះលោក សម រង្ស៊ី បានមាននៅក្នុងបញ្ជីអ្នកបោះឆ្នោត និងបញ្ជី​បេក្ខជនតំណាងរាស្រ្តរួចហើយ។ តែឈ្មោះនេះត្រូវបានលុបចេញ តាមអំណាចសាលដីការបស់តុលាការ។ ដូចច្នេះបើ​យោងលើ ព្រះរាជសារលើកលែងទោស របស់ព្រះមហាក្សត្រចុះថ្ងៃទី១២ ខែកក្កដា ឆ្នាំ២០១៣ លោក សម រង្ស៊ី ត្រូវ​ទទួល​បាននូវសុពលភាព និងអភ័យឯកសិទ្ធិតំណាងរាស្រ្ត ជាស្វ័យប្រវត្តិស្របតាមមាត្រា១៥ នៃច្បាប់ស្តីពីលក្ខន្តិកៈ​តំណាង​រាស្រ្ត ដែលបានចែងថា៖ «តំណាងរាស្រ្តរូបណាមួយជាទណ្ឌិត ហើយត្រូវបានព្រះមហាក្សត្រលើកលែងទោស តំណាង​រាស្រ្តរូបនោះ នឹងទទួលបានសុពលភាព អភ័យឯកសិទ្ធិ និងបុព្វសិទ្ធិឡើងវិញ»។

លិខិតដដែលនេះបន្ថែមថាលោក សម រង្ស៊ី ត្រូវទទួលបាននូវសុពលភាពភាពភ្លាម នូវសិទ្ធិបោះឆ្នោតឡើងវិញ និងទទួល​ស្គាល់បេក្ខភាពឈរឈ្មោះបោះឆ្នោតឡើងវិញ ស្របតាមគោលការណ៍ច្បាប់ ដែលលិខិតនេះលើកយកមកអះអាង។

លោក ទេព នីថា អគ្គលេខាធិការ គ.ជ.ប បានថ្លែងប្រាប់ទស្សនាវដ្ដីមនោរម្យព័ងអាំងហ្វូយ៉ាងខ្លីថា៖ «គ.ជ.ប អត់ទាន់មាន​ពេលពិនិត្យនោះទេ ពីព្រោះ គ.ជ.ប មានការងារច្រើនត្រូវធ្វើ ហើយការងារនេះ រង់ចាំដល់ពេលល្ងាចបានពិនិត្យ»។

យោងតាមមន្រ្តីរបស់គណៈបក្សសង្រ្គោះជាតិមួយរូប ដែលមានតួនាទីបញ្ជូនលិខិតរបស់លោក សម រង្ស៊ី ទៅ គ.ជ.ប ក្នុង​លក្ខខណ្ឌមិនបញ្ចេញឈ្មោះ បានបង្ហើបឲ្យដឹងថាលិខិតនេះ បានផ្ញើរក្នុងលក្ខខ័ណ្ឌបន្ទាន់ ខណៈដែលថ្ងៃ​បោះឆ្នោត​កាន់​តែខិតជិតមកដល់។

លោក ហង្ស ពុទ្ធា នាយកអង្គការឃ្លាំមើលការបោះឆ្នោតមួយ ហៅកាត់ថា និចហ្វិក (NECFEC‎) បានពន្យល់ថា៖ «ករណី​លោក សម រង្ស៊ី មានការលំបាករកច្រកចេញ បើដោះស្រាយតាមផ្លូវច្បាប់ ដូចនេះគួរដោះស្រាយតាមផ្លូវនយោបាយ»។ លោកបន្តថា ក្នុងករណី គ.ជ.ប មិនអាចដោះស្រាយបានលោក សម រង្ស៊ី គួរប្តឹងទៅកុ្រមប្រឹក្សាធម្មនុញ្ញ ដើម្បីឲ្យស្ថាប័ន​នេះធ្វើការបកស្រាយការអនុវត្តច្បាប់ ខណៈដែល គ.ជ.ប មិនហានសម្រេចកិច្ចការនេះ។

កាលពីថ្ងៃទី២៣ខែកក្កដាដដែលនេះដែរ លោក សម រង្ស៊ី ក៏បានផ្ញើរលិខិតមួយច្បាប់ទៅកាន់លោក ហេង សំរិន ប្រធាន​រដ្ឋសភា ដោយស្មើសុំផ្តល់សុពលភាព អភ័យឯកសិទ្ធិ និងបុព្វសិទ្ធិតំណាងរាស្រ្តឡើងវិញ ប៉ុន្តែរហូតមកដល់ពេលនេះ គេ​មិនទាន់ឃើញមានការឆ្លើយតបយ៉ាងណានោះទេ។

សូមរម្លឹកថា កាលពីថ្ងៃទី២១ ខែកក្កដា ឆ្នាំ២០១៣ លោក សម រង្ស៊ី ជាមេដឹកនាំគណបក្សសង្រ្គោះជាតិ បានផ្ញើរលិខិត​មួយ​ច្បាប់ ដែលមានកម្មវត្ថុដូចលិខិតខាងលើ ម្តងរួចទៅហើយទៅកាន់ គ.ជ.ប។ ប៉ុន្តែលិខិតនោះ ត្រូវបានបដិសេធដោយ គ.ជ.ប នៅថ្ងៃបន្ទាប់ពោល គឺថ្ងៃទី២២ ខែកក្កដា ឆ្នាំ២០១៣៕

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ