ខ្សែបម្រើស្លាបស្តាំ ជេសឺស ណាវ៉ាស់ (Jesus Navas) បានបង្ហើបប្រាប់ឲ្យដឹងពីមូលហេតុថា តើហេតុអ្វីបានជាគាត់ផ្ទេរ​មក​កាន់ម៉ែនឆេស្ទើ ស៊ីធី (Manchester City) បន្ទាប់ពីគាត់បានបដិសេដមិនព្រមមកកាន់ក្រុមអាសឺណល (Arsenal) កាល​ពី៣ឆ្នាំមុន។

ខ្សែបម្រើស្លាបស្តាំ ជេសឺស ណាវ៉ាស់ លើកអាវបង្ហាញ នៅពេលគាត់មកដល់មែនស៊ីធីដំបូង។

កីឡាករអន្តរជាតិអេស្ប៉ាញ វ័យ២៧ឆ្នាំ ជិតនឹងផ្ទេរមកកាន់ប្រទេសអង់គ្លេសម្តងដែរ នៅពេលដែលក្លិបកាំភ្លើងធំ​ចាប់​ផ្តើម​ទាក់ទងគាត់ខ្លាំង កាលពីឆ្នាំ២០១០។ ប៉ុន្តែដោយសារតែពេលនោះ គាត់មិនចង់ឃ្លាតឆ្ងាយពីផ្ទះ និងចង់ជួយក្រុមសេវីឡា (Sevilla) ឲ្យឈ្នះពានរង្វាន់ផងនោះ ទើបធ្វើឲ្យគាត់សម្រេចចិត្តនៅអេស្ប៉ាញជាបន្ត។

កីឡាករថ្មីដែលមានតម្លៃខ្លួន ១៥លានផោនរបស់ក្រុមម៉ែនស៊ីធី បាននិយាយថា៖ «នៅពេលដែលអាសឺណលចង់បានគាត់ ស្របពេលដែលក្រុមសេវីឡាឈ្នះពានរង្វាន់អេស្ប៉ាញ (Spanish Cup)។ ខ្ញុំនៅតែចង់ឈ្នះពានរង្វាន់បន្ថែមទៀត​ជាមួយ​ក្រុមសេវីឡា ដូច្នេះវាមិនមែនជាពេលដែលខ្ញុំត្រូវធ្វើការផ្លាស់ប្តូរក្រុមនោះទេ។»

គាត់បានបន្តថា៖ «ប៉ុន្តែនៅ២ ឬ៣ឆ្នាំចុងក្រោយនេះ យើងពុំបានឈ្នះពានរង្វាន់អ្វីទាំងអស់ ដូច្នេះខ្ញុំគិតថាវាជា​ពេលវេលា​មួយ ដែលត្រូវធ្វើការផ្លាស់ប្តូរ។ ខ្ញុំមកកាន់ក្លិបនេះ (ម៉ែនស៊ីធី) គឺខ្ញុំមានមហិច្ឆតាចង់ឈ្នះពានរង្វាន់ ហើយខ្ញុំតែងតែផ្តល់​ឲ្យក្រុម១០០% នូវអ្វីដែលខ្ញុំមាន និងអ្វីដែលខ្ញុំអាចធ្វើបាន។»

បន្ទាប់ពីធ្វើដំណើរមកចូលរួមជាមួយសមាជិកក្រុមជាលើកដំបូង នៅក្នុងទីក្រុងហុងកុង កាលពីថ្ងៃច័ន្ទ ណាវ៉ាស់ថាគាត់​ពិតជារីករាយ ដែលបានចាកចេញពីសេវីឡា ហើយគាត់នឹងត្រៀមជីវិតថ្មី នៅក្នុងទីក្រុងម៉ែនឆេស្ទើ។

គាត់បានបន្តថា៖ «បញ្ហាទាំងអស់នោះ ជារឿងកាលពី២ ឬ៣ឆ្នាំមុន ប៉ុន្តែពេលនេះខ្ញុំត្រូវតែចាប់ផ្តើមជីវិតថ្មី។ សមាជិក​របស់ខ្ញុំ នឹងជួយខ្ញុំ ហើយនេះជាអ្វីៗដែលខ្ញុំចង់បាន។ ខ្ញុំមកទីនេះ ដើម្បីបានលេង និងទទួលជោគជ័យធំៗ។ ខ្ញុំនឹងរៀន​ភាសាអង់គ្លេសឲ្យបានឆាប់បំផុត និងព្យាយាមសម្របខ្លួនឲ្យស៊ាំទៅនឹងវប្បធម៌នៅទីនេះ (អង់គ្លេស)។»

ខ្សែបម្រើរូបនេះដដែល បានបន្ថែមថា៖ «ខ្ញុំមានប្រពន្ធ មានកូន ហើយពួកគេក៏បានធ្វើដំណើរមកកាន់អង់គ្លេសដែរ ដើម្បី​ជួយខ្ញុំឲ្យបានកក់ក្តៅ។ ប៉ុន្តែខ្ញុំមិនទាន់បានទៅកាន់ទីក្រុងម៉ែនឆេស្ទើនៅឡើយទេ។ ខ្ញុំគិតថាអាកាសធាតុ នឹងមានការ​ខុសប្លែកពីសេវីឡា។ ខ្ញុំពិតជារំភើប និងរីករាយខ្លាំងណាស់ ដែលបានផ្ទេរមកកាន់ក្រុមម៉ែនស៊ីធី ហើយខ្ញុំមានជំនឿ​យ៉ាងមុតមាំថា ពួកយើងនឹងមានរដូវកាលដ៏អស្ចារ្យមួយជាមួយគ្នា៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ