ភ្នំពេញ៖ ពលរដ្ឋរងនូវការបណ្តេញចេញពីបឹងកក់ និងបុរីកីឡាប្រមាណជាង១០០នាក់ បានមកជួបជុំគ្នានៅមុខ​ក្រសួង​ព័ត៌មាននាព្រឹកថ្ងៃទី១៨ ខែកក្កដានេះ ដើម្បីដាក់ញ្ញត្តិ ឲ្យក្រសួងមួយនេះចាត់វិធានការលើវិទ្យុ និងទូរទស្សន៍មួយចំនួន ដែលធ្វើការផ្សព្វផ្សាយនូវព័ត៌មានដោយលំអៀង ខុសពីការពិត និងសុំឲ្យជួយផ្យាយនូវគ្រប់ព័ត៌មាន​ដែលផ្តល់ប្រយោជន៍​ដល់ប្រជាពលរដ្ឋ ពិសេសពលរដ្ឋដែលជារងគ្រោះពិតប្រាកដ។

ការតវ៉ានៅមុខក្រសួងព័ត៌មានរបស់អ្នកភូមិនៅបឹងកក់ ថ្ងៃទី១៨ខែកក្កដាឆ្នាំ២០១៣។ (រូបថត MONOROOM.info/O.Vary)

ប្រជាពលរដ្ឋមកពីសហគមន៍បឹងកក់ បុរីកីឡា បានចោទប្រកាន់លើ ប្រព័ន្ធផ្សព្វផ្សាយក្នុងស្រុកមួយចំនួនទាំងវិទ្យុ ទូរទស្សន៍រដ្ឋ និងឯកជនថាមានភាពស្ងៀមស្ងាត់ ចំពោះទុក្ខលំបាកពិតប្រាកដរបស់ពួកគេ ផ្ទុយមកវិញប្រព័ន្ធ​ផ្សព្វផ្សាយ​ទាំងនោះ បានព្យាយាមបំពង«យ៉ាងសកម្ម» នូវព័ត៌មាននៃក្រុមអ្នកបឹងកក់មួយចំនួន ដែលមាននិន្នាការ​គាំទ្ររដ្ឋាភិបាល​ទៅវិញ ដែលករណីនេះបានធ្វើឲ្យពលរដ្ឋដែលកំពុងតែរងគ្រោះ រឹតតែរងគ្រោះថែមទៀត ។

សេចក្តីក្នុងញត្តិ ដែលអ្នកភូមិបឹងកក់ចង់ដាក់ជូនក្រសួងព័ត៌មាននេះ បានស្នើរសុំដល់ក្រសួងព័ត៌មានដែលជាថ្នាក់លើ ជម្រុញឲ្យមានការ ចាក់ផ្សាយ និងបញ្ចាំងនូវរូបភាពនានាដែលក្រុមហ៊ុន ឬអាជ្ញាធរប្រើប្រាស់កំលាំងហិង្សា រំលោភសិទ្ធិដីធ្លី ផ្ទះសម្បែង និងរូបភាពការបង្រា្កបបាតុកម្ម ក្នុងពេលកន្លងមក បានចាក់ផ្សាយក្នុងប្រព័ន្ធ សារព័ត៌មានជាតិ និងឯកជន ឲ្យបានដូចរូបភាពការវាយប្រហារគ្នា ដោយពាក្យសំដី ពីសំណាក់អ្នកបឹងកក់មួយក្រុមទៀតដែលបានបំបែកខ្លួននោះ។

លោក លួស សាខន ស្វាមីរបស់ អ្នកស្រី យ៉ោម បុប្ផា បាននិយាយថាលោកចង់ឲ្យក្រសួងព័ត៌មាន គ្រប់គ្រងទៅលើ​បណ្តា​ស្ថានីយ៍ទូរទស្សន៍ និងវិទ្យុមួយចំនួនលើកយកតែរឿងពិតមកចាក់ផ្យាយបានហើយ។ លោកក៏បានធ្វើការរិះគន់ទៅលើ​ប្រព័ន្ធ​ផ្សព្វផ្សាយទាំងនោះថា ការរំលោភយកដីធ្លីអ្នកបឹងកក់ ការចាប់ម្ចាស់ដីដាក់គុក មិនដែលឃើញបណ្តាស្ថានីយ៍ទូរទស្សន៍​ទាំងនោះចាក់ផ្សាយទេ តែផ្ទុយទៅវិញ រឿងមិនពិត រឿងអយុត្តិធម៌បែជាគាត់ទទួលយកចាក់ផ្សាយទៅវិញ។

ឯអ្នកស្រី កើត ចន័្ទរស្មី ជាតំណាងពលរដ្ឋរងគ្រោះមួយរូប ដែលមានវត្តមាននៅទីនោះ បានបង្ហាញនូវការរិះគន់​ប្រហែល​គ្នាដែរថា បណ្តាស្ថានីទូរទស្សន៍ និងវិទ្យុទាំងនោះមិនគួរណា ធ្វើការចាក់ផ្សាយនូវព័ត៌មានបំភ្លើស​នោះទេ ព្រោះមាន​អ្នក​បឹងកក់មួយចំនួន បាននិយាយពាក្យមិនពិតដែលមិនអាចទទួលយកបាន។ អ្នកស្រីនាបបន្តរថា «តាមវិជ្ជាជីវៈ​អ្នក​សារព័ត៌មាន គាត់គួរណាស់ធ្វើការសម្ភាសភាគីទាំងសងខាង ដើម្បីឲ្យមានតុល្យភាពគ្នា និងក៏ដើម្បីភាពត្រឹមត្រូវនឹង​យុត្តិធម៌ សម្រាប់ទាំងអស់គ្នាផងរ។ ការចាក់ផ្យាយនូវរឿងមិនពិតនេះ បានធ្វើឲ្យជនរងគ្រោះពិតកាន់តែ​រងគ្រោះ​ធ្ងន់ធ្ងរ​ទៅៗ ឯការដោះស្រាយជូនពលរដ្ឋវិញកាន់តែកាត់បន្ថយ និងស្ទើរតែគ្មានដំណោះស្រាយតែម្តង។ ខ្ញុំមិនហាមក្នុងការ​ផ្សាយនោះទេ តែគួរយកព័ត៌មានឲ្យបានគ្រប់ជ្រុងជ្រោយមុននឹងចាក់ផ្សាយ កុំយកតែភាគីម្ខាង ឯភាគីពាក់ព័ន្ធផ្សេងទៀត​ត្រូវបានបិទចោល។»

អ្នកស្រី ទេព វន្នី តំណាងសហគមន៍បឹងកក់ បានប្រាប់មនោរម្យព័ងអាំងហ្វូសារជាថ្មីថា ស្ទើគ្រប់សារព័ត៌មានទាំងអស់ បានលើកយកករណីអ្នកបឹងកក់មួយចំនួនដែលបានធ្វើការបំបែកចេញ ហើយចោទប្រកាន់មកលើអ្នកបឹងកក់គ្នាឯងដែល​ជាជនរងគ្រោះនោះ ជាច្រើនលើក និងច្រើនសារ តែផ្ទុយមកវិញករណីទាក់ទិននឹងការបង្ក្រាបឈូសឆាយលំនៅឋាន ការបណ្ដេញ ការចាប់ពលរដ្ឋជាម្ចាស់ផ្ទះដាក់គុក និងការវាយដំលើពលរដ្ឋពីសំណាក់អាជ្ញាធរ និងថ្មីៗនេះមានការវាយដំ​រហូតដល់មានស្ត្រីម្នាក់រលូយកូន តែមិនឃើញមានសារព័តមានណាមួយចាក់ផ្សាយសោះ។

តំណាងឲ្យអ្នកភូមិរូបនេះបន្តរថា «ក្នុងនាមក្រសួងព័ត៌មាន ដែលជាថ្នាក់លើ សូមឲ្យមានវិធានការចំពោះ បណ្តាស្ថានីយ៍​ទូរទស្សន៍ទាំងនោះ ជម្រុញឲ្យពួកគាត់គោរពវិជ្ជាជីវៈជាអ្នកសារព័ត៌មាន ធ្វើយ៉ាងណាឲ្យព័ត៌មានដែលខ្លួនបានផ្សាយ​ចេញ​នោះ ជារឿងមួយដែលពិតប្រាកដ និងអាចផ្តល់ប្រយោជន៍សម្រាប់ជនរងគ្រោះ។»

មនោរម្យព័ងអាំងហ្វូ ពុំអាចស្នើសុំការពន្យល់ពីលោក ចាន់ គឹមសៀរ ដែលជាអ្នកទទួលយកញ្ញត្តិរបស់អ្នកបឹងកក់ និងជា​តំណាងត្រួតពិនិត្យនៃក្រសួងព័តមាន បានទេនាព្រឹកនេះ ដោយលើពុំទទួលទូរស័ព្ទ។ ប៉ុន្តែអ្នកស្រី ទេព វណ្ណី បានបញ្ជាក់​លោក ចាន់ គឹមសៀរ មិនទាន់បានបញ្ជាក់ ពីបញ្ហានៃដំណោះស្រាយលើញ្ញត្តិនោះយ៉ាណានៅឡើយតែ។ លោកបានបន្ត​ផ្តល់ជាយោបល់លើករណីនេះថា បើពិនិត្យទៅឃើញថាមានការចាក់ផ្សាយលើសពីការពិតមែននោះ លោកឲ្យដាក់ពាក្យ​បណ្តឹងមួយមកស្រសួងេព័ត៌មាន លោកនឹងចាំទទួលពាក្យបណ្តឹងនោះ។ លោកបានបន្តរថា នឹងក៏អាចដាក់ទៅតុលាការ​ក៏បាន។

ចំណែកអគ្គនាយកទូរទស្សន៍ជាតិកម្ពុជា លោក កឹម គុណវឌ្ឍន៍ បានលើកឡើងក្នុងគេហទំព័រផ្លូវការរបស់លោក នៅលើ​បណ្ដាញហ្វេសប៊ុក (Facebook) ថា ការទាមទារលើកយកការដាក់បន្ទុក ទ.ទ.ក មិនត្រូវពេល។ លោកថា៖ «ការផ្សាយ​របស់ ទ.ទ.ក ចាប់ពីថ្ងៃទី២៧ មិថុនា មកទល់នឹងពេលនេះ បានគោរពគោលការណ៏របស់ គ.ជ.ប យ៉ាងខ្ជាប់ខ្ជួន។ មុន​ចោទសូមពិនិត្យផង បងស្រី បងប្រុស»។ ពាក្យសម្ដីរបស់លោកអគ្គនាយកទូរទស្សន៍រដ្ឋ​មួយនេះ បង្កឲ្យមានមន្ទិល​ដូច​ជា​«មិនយល់» ខណៈដែលការតវ៉ារបស់អ្នកភូមបឹងកក់នៅព្រឹកថ្ងៃទី១៨ខែកក្កដានេះ មិនទាក់ទងអ្វីនឹង គ.ជ.ប. ផង​នោះ។

ប្រធានផ្នែកបច្ចេកទេសស៊ើបអង្កេតរបស់អង្គការលីកាដូលោក អំ សំអាត ដែលធ្វើការពាក់ព័ន្ធនឹងករណីសិទ្ធិមនុស្ស បាន​លើកពន្យល់ថា ការទាមទារ ឬស្នើរសុំ ឲ្យក្រសួងព័ត៌មានធ្វើយ៉ាងណាដើម្បីឲ្យស្ថានីទូរទស្សន៍ ឬវិទ្យុធ្វើការផ្សព្វផ្សាយ​ឲ្យ​មានតម្លាភាព សម្រាប់ការផ្សាយផ្សេងៗសម្រាប់ប្រជាពលរដ្ឋ នោះជាសិទ្ធិពលរដ្ឋ។ លោកបន្ថែមដូច្នេះថា «សារព័ត៌មាន​ដែលផ្សាយព័ត៌មានតែមួយចំហៀង មិនទាន់មានតម្លាភាព ឬ យុត្តិធម៌សម្រាប់ពួកគាត។ (…) បើរឿងកើតឡើង​ដូចជា​ករណីបឹងកក់ មិនថាសារព័ត៌មាន ឬទូរទស្សន៍ណាទេ ធ្វើយ៉ាងណាបើមានបីភាគី គួរធ្វើការថ្លឹងថ្លៃងទាំងបីភាគី ឲ្យព័ត៌មាន​នោះបានគ្រប់ជ្រុងជ្រោយ មានភាពសុក្រិត្យ និងសច្ចៈភាពសម្រាប់ពលរដ្ឋអ្នកទស្សនាទាំងអស់ធ្វើការពិចារណា ថាតើ​ភាគីណាត្រឹមត្រូវ ឬ មិនត្រឹមត្រូវការ។»

សូមរម្លឹកថាអ្នកភូមិបឹងកក់ កាលពីប៉ុន្មានសប្តាហ៍មុននេះ បានចែកផ្លូវគ្នាជាពីរក្រុម ហើយក្រុមបំបែកខ្លួននោះ​បានធ្វើ​សន្និសិទកាសែតមួយ ផ្តាច់ខ្លួនចេញពីអ្នកស្រីទេព វណ្ណី ដោយបានធ្វើការផ្សព្វផ្សាយយ៉ាងផុលផុស ស្ទើគ្រប់បណ្តា​ស្ថានីយ៍ទូរទស្ស និងវិទ្យុក្នុងស្រុក ។ កាលថ្ងៃទី៨ ខែកក្កដានេះ អ្នកភូមិបឹងកក់ទាំងនោះក៏បានដាក់ញ្ញតិ្ត​ដាច់ដោយឡែក​ពីគ្នានៅតាមស្ថានទូតបរទេសចំនួនប្រាំ ដើម្បីឱ្យបណ្តាស្ថានទូតទាំងនោះ ដកសេចក្តីទុកចិត្តពីអ្នកស្រី ទេព វណ្ណី តំណាង​របស់ខ្លួននៅក្នុងសហគមន៍បឹងកក់។

សកម្មភានេះត្រូវបានអ្នកវិភាគបានមើលឃើញ និងនិយាយថា ក្រុមអ្នកបំបែកខ្លួនទាំងនោះត្រូវបានធ្វើឡើង ក្នុងគោល​បំណងបម្រើផលប្រយោជន៍ឲ្យអ្នកនយោបាយ​ណាម្នាក់៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៨កក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ