ក្រុមមេឃខៀវម៉ែនឆេស្ទើ ស៊ីធី (Manchester City) នឹងបង្វែរគោលដៅរបស់ខ្លួន ទៅរកខ្សែប្រយុទ្ធកំពុង​ឡើងជើង​របស់​ប្រេស៊ីល ហ្វ្រេដ (Fred) វិញ បើសិនជាករណី ពួកគេបរាជ័យក្នុងការទិញខ្សែប្រយុទ្ធ អេឌីនសិន កាវ៉ានី (Edinson Cavani) របស់ក្រុមណាប៉ូលី (Napoli)។ នេះបើតាមសេចក្ដីរាយការណ៍ របស់កាសែតអង់គ្លេសដៀលីម៊ែរ៉ឺ (Daily Mirror) ។

កីឡាករខ្សែប្រយុទ្ធ អេឌីនសិន កាវ៉ានី របស់ក្រុមណាប៉ូលី។ (រូបថត lemeilleurdupsg.com)

កាវ៉ានី នៅតែជាគោលដៅទី១ របស់ក្រុមម៉ែនស៊ីធី ប៉ុន្តែក្រុមណាប៉ូលី នៅតែបន្តមិនព្រមទម្លាក់តម្លៃបន្តិចណាឡើយ ទៅ​លើខ្សែប្រយុទ្ធអ៊ុយរ៉ាហ្គាយរូបនេះ។

ក្លឹបណាប៉ូលី បាននិយាយថាពួកគេមិនព្រមទទួលយកតម្លៃក្រោម ៥៣លានផោនឡើយ សម្រាប់ខ្សែប្រយុទ្ធកាវ៉ានី ខណៈ​ដែលក្រុមម៉ែនស៊ីធី ថាពួកគេក៏មិនទិញក្នុងតម្លៃខ្ពស់ដូចនោះដែរ បន្ទាប់ពីពួកគេបានចំណាយលុយ​ច្រើនគួរសម​ដែរទៅ​លើ​ខ្សែបម្រើ ជេសឺស ណាវ៉ាស (Jesus Navas) និងកីឡាករហ្វឺណាន់ឌីញ៉ូ (Fernandinho) រួចមក។

ពេលនេះ ម៉ែនស៊ីធី កំពុងតែចង់បង្វែរគោលដៅទៅរកខ្សែប្រយុទ្ធប្រេស៊ីលហ្វ្រេដ ដែលកីឡាកររូបនេះ បានរកគ្រាប់បាល់​បញ្ចូលទីបាន២គ្រាប់ ក្នុងការប្រកួតផ្តាច់ព្រ័ត្រខុនហ្វេដឺរ៉េសិនខាប់ (Confederations Cup) រវាងក្រុមប្រេស៊ីល និងក្រុម​អេស្ប៉ាញកន្លងទៅ ហើយគាត់ក៏ទំនងជានឹងក្លាយជាតួរអង្គសំខាន់បន្តទៀត ក្នុងយុទ្ធនាការបាល់ទាត់ពិភពលោកឆ្នាំ២០១៤ សម្រាប់ក្រុមប្រេស៊ីល។

ទោះបីជាយ៉ាងណា ក្លឹបហ្វឡាមមីណិន (Fluminense) បាននិយាយថា ពួកគេនឹងមិនលក់ខ្សែប្រយុទ្ធហ្វ្រេដ ជាដាច់ខាត។ ប៉ុន្តែសម្រាប់ហ្វ្រេដ គាត់និយាយថា គាត់អាចនឹងយល់ព្រមចាកចេញ លុះត្រាតែគាត់ពេញចិត្ត និងល័កខ័ណ្ឌត្រូវរូវគ្នា។

ម៉ែនស៊ីធី នឹងឲ្យថ្លៃឈ្នួលហ្វ្រេដ មួយទ្វេរជាបី ទៅនឹងថ្លៃឈ្នួលរបស់គាត់បច្ចុប្បន្ន ហើយក្លឹបហ្វឡាមមីណិន អាចនឹង​យល់​ព្រមលក់ក្នុងតម្លៃប្រហែល ៧លានផោន។ នេះមានន័យថា ហ្វ្រេដ ជាជម្រើសមួយ ថោកជាងខ្សែប្រយុទ្ធអេឌីនសិន កាវ៉ានី​ឆ្ងាយណាស់។

ប៉ុន្តែទោះជាយ៉ាងណា ហ្វ្រេដ គាត់មានវ័យជិត ៣០ឆ្នាំទៅហើយ ហើយក្រុមម៉ែនស៊ីធី ក៏ប្រហែលជាបារម្មណ៏​ចំពោះ​បញ្ហា​នេះដែរ ព្រោះបើទិញគាត់មក គាត់ក៏មិនអាចលេងឲ្យក្រុមបានយូរអង្វែងដែរ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៣ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ