ម៉ែនស៊ីធី បន្តចាញ់ក្រុមនៅអាហ្វ្រិកខាងត្បូង ជាលើកទី២
- ដោយ: វិន ជីវ័ន្ត
- កែប្រែចុងក្រោយ: July 19, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ដំណើរទៅប្រកួតមិត្តភាពកំដៅសាច់ដុំ របស់ក្រុមជើងឯករងព្រីមែលីក (Premier League) មែនឆេស្ទើ ស៊ីធី (Manchester City) នៅប្រទេសអាហ្រ្វិកខាងត្បូង កាន់តែយ៉ាប់យឺនមែនទែនហើយ បន្ទាប់ពីប្រកួតចំនួន២ប្រកួត ចាញ់ទាំង២ប្រកួត។
ការប្រកួតរវាងក្រុមមែនឆេស្ទើ ស៊ីធី និងក្រុមបាល់ទាត់អាម៉ាស្ស៊ូលូ របស់អាហ្វ្រិកខាងត្បូង។
បន្ទាប់បរាជ័យរបស់ក្រុមស៊ុបព័រស្ពត (SuperSport) ២-០ កាលពីយប់ថ្ងៃអាទិត្យចុងសប្តាហ៏មុន ក្រុមមេឃខៀវរបស់អង់គ្លេសមួយនេះ បានបន្តចាញ់ក្រុមនៅអាហ្វ្រិកខាងត្បូងមួយទៀត អាម៉ាស្ស៊ូលូ (AmaZulu) ដោយលទ្ធផល ២-១ ទៀត កាលពីយប់ថ្ងៃព្រហស្បតិ៏។
គួរបញ្ជាក់ថា នៅក្នុងការប្រកួតនោះ ពុំមានវត្តមានរបស់គ្រូបង្វឹកលោក ម៉ាញ៉ូអែល ប៉េឡេហ្រ្គីនី (Manuel Pellegrini) នោះទេ ដោយសារគ្រូបង្វឹកថ្មីសញ្ជាតិឈីលីរូបនោះ មានបញ្ហាគ្រួសារផ្ទាល់ខ្លួនជាបន្ទាន់ ដែលតម្រូវឲ្យលោកត្រឡប់ទៅកាន់ប្រទេសកំណើតរបស់គាត់វិញ។
ខណៈដែលក្រុមគ្មានគ្រូបង្វឹកដឹកនាំ នៅសល់តែជំនួយការគ្រូបង្វឹក ក្រុមមេឃខៀវ ត្រូវបានម្ចាស់ផ្ទះនាំមុខមុននៅនាទីទី២០ ដោយកីឡាករបុងហ្គានី អិនឌូលូឡា (Bongani Ndulula)។ ខ្សែបម្រើអន្តរជាតិអង់គ្លេស ជេម មីលណឺ (James Milner) រកគ្រាប់បាល់ឲ្យម៉ែនស៊ីធី តាមបានស្មើមកវិញ នៅនាទីទី២៦ មុនពេលដែលកីឡាករ វ៉ាន់ ហឺដិន (Van Heerden) ទាត់បាល់ពិន័យប៉េណាល់ទី១១ម៉ែត្រ ជួយឲ្យក្រុមអាម៉ាស្ស៊ូលូ ទទួលបានជ័យជំនះនៅចុងម៉ោង ពោលគឺនៅនាទីទី៨៧។
ចំពោះការអវត្តមានរបស់គ្រូបង្វឹក លោកប្រែន ឃីដ (Brian Kidd) ដែលជាជំនួយការរបស់លោកប៉េឡេហ្គ្រីនី បាននិយាយថា៖ «គាត់ (ប៉េឡេហ្គ្រីនី) ត្រូវត្រឡប់ទៅកាន់ប្រទេសឈីលីវិញ ដោយសារហេតុផលផ្ទាល់ខ្លួនរបស់គាត់។ យើងសង្ឃឹមថា គាត់នឹងត្រឡប់មកដឹកនាំក្រុមវិញ នៅក្នុងទីក្រុងហុងកុង នៅព្រឹកថ្ងៃអង្គារ៏សប្តាហ៏ក្រោយ។ ប៉ុន្តែយើងមិនប្រាកដនោះទេ។»
ជំនួយការគ្រូបង្វឹក ក្រុមម៉ែនស៊ីធីរូបនេះដដែល បានបន្ថែមថា៖ «តាមពិតទៅយើងចង់ឲ្យគ្រូរបស់យើងនៅទីនេះ ប៉ុន្តែមុនពេលគាត់ចេញទៅ គាត់បានរៀបចំក្រុមអស់ហើយ សម្រាប់ការប្រកួត។ ប៉ុន្តែទោះជាយ៉ាងណា ក្រុមរបស់យើងពុំបានទទួលលទ្ធផលល្អនោះទេ។»
បន្ទាប់ពីអាម៉ាស់នៅអាហ្វ្រិកខាងត្បូងរួចមក ម៉ែនស៊ីធី នឹងត្រូវធ្វើដំណើរព្រងព្រេងមកកាន់តំបន់អាស៊ីវិញម្តង ដើម្បីចូលរួមប្រកួតប្រជែងយកពានរង្វាន់តូចមួយ ឈ្មោះថា បាឃ្លេអាស៊ីត្រូភី (Barclays Asia Trophy) នៅក្នុងទីក្រុងហុងកុង នាសប្តាហ៏ក្រោយ៕
----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ