ខ្សែការពារខូឡូ តូរ៉េ (Kolo Toure) បានផ្ទេរពីក្រុមម៉ែនឆេស្ទើ ស៊ីធី (Manchester City) មកចូលរូមជាមួយក្រុមលីវើភូល (Liverpool) ជាផ្លូវការ កាលពីដើមសប្ដាហ៍នេះ ហើយគាត់បាននិយាយថា គាត់នៅតែជាខ្សែម្នាក់ល្អបំផុត ក្នុងចំណោម​កំពូលខ្សែការពារទាំងអស់ នៅក្នុងក្របខ័ណ្ឌព្រីមែលីក (Premier League)។

កីឡាករខ្សែការពារខូឡូ តូរ៉េ កាលពីគាត់នៅជាមួយក្រុមម៉ែនឆេស្ទើ ស៊ីធី។ (រូបថត football365.com)

តូរ៉េ បាននិយាយប្រាប់ដល់គេហទំព័ររបស់ក្លឹបលីវើភូលថា៖ «លីវើភូល បានផ្តល់ឱកាសឲ្យខ្ញុំ ដើម្បីឲ្យខ្ញុំបានបង្ហាញ​ពី​សមត្ថភាព។ បើទោះបីជាខ្ញុំមានវ័យ ៣២ឆ្នាំហើយក៏ដោយ ប៉ុន្តែខ្ញុំនៅតែជឿជាក់ថា ខ្ញុំនៅតែជាកំពូលខ្សែការពារម្នាក់ ហើយ​ខ្ញុំនឹងខិតខំប្រឹងប្រែងឲ្យដល់ទីបញ្ចប់។»

កីឡាករអន្តរជាតិអាយរីខូស រូបនេះ បានបន្តថា៖ «ក្នុងរយះពេល២ឆ្នាំចុងក្រោយនេះ ខ្ញុំពុំសូវបានចូលលេងទេ ហើយខ្ញុំ​ពិតជាស្រេកឃ្លានខ្លាំងណាស់ ព្រោះខ្ញុំចង់ចូលលេង។ ខ្ញុំនឹងខិតខំឲ្យអស់លទ្ធភាព និងជួយឲ្យលីវើភូល ឈ្នះពានរង្វាន់​នៅក្នុងរដូវកាលនេះ។»

គ្រូបង្វឹកលីវើភូល លោកប្រេដិន រ៉ដចឺ (Brendan Rodgers) នាំយកតូរ៉េមក ដើម្បីជំនួសដំណែងកីឡាករជេមី ខារ៉ាកឺ (Jamie Carragher) ដែលបានប្រកាសចូលនិវត្តន៏ កាលពីចុងរដូវកាលមុន។ ប៉ុន្តែទោះជាយ៉ាងណា តូរ៉េក៏មិនមែនជាគោលដៅ​វែងឆ្ងាយដែរ ព្រោះគាត់មានវ័យចាស់ហើយ។

កីឡាករវ័យ ៣២ឆ្នាំរូបនេះ ជាខ្សែការពារដែលមានបទពិសោធន៏ច្រើន មិនចាញ់ខារ៉ាកឺនោះទេ ហើយគាត់ធ្លាប់ជា​ខ្សែ​ការពារល្អបំផុត កាលពីគាត់នៅក្រុមកាំភ្លើងធំអាសិណល (Arsenal) និងក្រុមម៉ែនស៊ីធី ផងដែរ។ មិនតែប៉ុណ្ណោះ គាត់​ក៏ធ្លាប់ជាប្រធានក្រុមមេឃខៀវម៉ែនស៊ីធីដែរ ប៉ុន្តែដោយសារតែគាត់មានបញ្ហារបួសរ៉ាំរ៉ៃ ទើបធ្លាក់ដំណែងជាប្រធានក្រុម និងឈប់បានចូលលេងជាជម្រើស១១នាក់ដំបូង រហូតមកដល់បច្ចុប្បន្ន។

តូរ៉េ បាននិយាយថា ការដែលមកជំនួសដំណែងវីរបុរសលីវើភូលនេះ មិនមែនជារឿងងាយស្រួលនោះទេ។

គាត់បាននិយាយថា៖ «ខ្ញុំដឹងថា ខារ៉ាកឺបានចាកចេញពីក្លឹប ដែលនេះជាហេតុមួយ ធ្វើឲ្យខ្ញុំបានមកដល់ទីនេះ។ គាត់ (ខារ៉ាកឺ) ជាកីឡាករល្អម្នាក់ ជានិមិត្តរូបរបស់ក្រុម ជាវីរបុរសរបស់ក្រុម ហើយនេះជាគំរូរមួយសម្រាប់រូបខ្ញុំ។ ខ្ញុំនឹង​ព្យាយាម​ធ្វើឲ្យបានល្អ ដូចអ្វីដែលគាត់ធ្លាប់បានធ្វើ ប៉ុន្តែប្រហែលជាមិនងាយស្រួលនោះទេ។ វាជាសម្ពាធមួយ សម្រាប់ខ្ញុំ ព្រោះ​មក​ជំនួសដំណែងកីឡាករល្អ ពិតជាមានការពិបាក ប៉ុន្តែទោះជាយ៉ាងណា ខ្ញុំនៅតែព្យាយាមឲ្យបានល្អជាទីបំផុត តាមដែល​អាចធ្វើទៅបាន៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៣ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ