មជ្ឈមណ្ឌលសិទ្ធិមនុស្សកម្ពុជា (ម.ស.ម.ក) បានចេញសេចក្តីប្រកាសព័ត៌មាន នាថ្ងៃទី២៣នេះ ដើម្បីសម្ពោធ​យុទ្ធនាការ​«សម្លេងសេរីភាព» គាំទ្រសកម្មជនសិទ្ធិដីធ្លី អ្នកស្រី យ៉ោម បុប្ផា ដែលកំពុងជាប់ពន្ធនាគារ និងស្នើសុំឲ្យមានការដោះលែង​ជាបន្ទាន់។

រូបភាពថតពីអេក្រង់នៃគេហទំព័ររបស់មជ្ឈមណ្ឌលសិទ្ធិមនុស្ស។

សេចក្តីប្រកាសព័ត៌មានបន្តថា ប្រជាពលរដ្ឋទាំងអស់ អាចផ្ញើរសារជាសម្លេង ឬហៅតាមទូរសព្ទ័ មកកាន់ ម.ស.ម.ក ដើម្បី​ចូលរួមគាំទ្រអ្នកស្រីយ៉ោម បុប្ផា។ សម្លេង ឬសារទាំងនោះ នឹងត្រូវបានចាក់ផ្សាយ លើរលកធាតុអាកាសវិទ្យុ អែហ្វអឹម ១០៥ វេលាម៉ោង១១.០០ ដល់ម៉ោង១២.០០ថ្ងៃត្រង់ ពីថ្ងៃអង្គារ ដល់ថ្ងៃព្រហស្បតិ៍ រហូតអ្នកស្រីត្រូវបានដោះលែង។

ជាមួយគ្នានេះដែរ ក៏មានការដាក់បង្ហាញផ្ទាំងបដា រាប់ចំនួនថ្ងៃនៃការជាប់ពន្ធនាគារ របស់អ្នកស្រី យ៉ោម បុប្ផា នៅមុខ​ការិយាល័យ ម.ស.ម.ក។

លោកសួន ប៊ុនធឿន អ្នកសម្របសម្រួលគម្រោងនៃ ម.ស.ម.ក បានបញ្ជាក់ថា ក្នុងសវនាការកាលពីថ្ងៃទី២៦ ធ្នូ ឆ្នាំ២០១២ មិនមានភស្តុតាងណាមួយបង្ហាញឲ្យឃើញថា អ្នកស្រីមានទោសនោះទេ។ លោកបានបន្តថា «ដោយសារតែលោកស្រី​ជា​អ្នកអនុវត្ត នូវសិទ្ធិសេរីភាពបញ្ចេញមតិ សេរីភាពក្នុការជួបជុំ និងសេរីភាពខាងសមាគម» ហេតុដូច្នេះហើយ ទើបលោកស្រី ត្រូវបានកត់សម្គាល់ដោយអាជ្ញាធរ។

លោកបន្តថា យុទ្ធនាការនេះ នឹងអាចជួយនាំយកមកនូវយុត្តិធម៌សម្រាប់លោកស្រី យ៉ោម បុប្ផា ក្នុងការជំរុញឲ្យសាលា​ឧទ្ធណ៍ ទំលាក់ចោលនូវបទចោទប្រកាន់។

ការចេញសេចក្តីប្រកាសព័ត៌មាននេះ បន្ទាប់ពីមានការជួបជុំគ្នាមួយ របស់អ្នកភូមិបឹងកក់ កាលពីថ្ងៃទី២២ខែមេសា នៅមុខ​ទីស្នាក់ការគណបក្សប្រជាជនកម្ពុជា។ ប្រជាពលរដ្ឋប្រមាណជិតមួយរយនាក់ បានជួបជុំគ្នាស្នើសុំឲ្យ លោក កែប ជុតិមា ប្រធានគណបក្សប្រជាជនរាជធានីភ្នំពេញ ជួយធ្វើអន្តរាគមន៍រកដំណោះស្រាយ ទៅក្រុមហ៊ុនផានអ៊ីម៉ិច ដែលបានរុះរើ និងវាយកម្ទេចផ្ទះរបស់ពួកគាត់ចោល។

សូមរម្លឹកថា អ្នកស្រី យ៉ោម បុប្ផា ត្រូវសាលាដំបូងរាជធានីភ្នំពេញ ចោទពីបទបង្កហិង្សាដោយចេតនា លើបុរសអ្នករត់ម៉ូតូ​ឌុបពីរនាក់ កាលចុងឆ្នាំ២០១២។ តុលាការបានផ្តន្ទាទោសអ្នកស្រី ដោយតម្រូវដាក់ពន្ធានាគារបីឆ្នាំ និងបានពិន័យជាប្រាក់​សរុបហុកសិបលានរៀល។ បច្ចុប្បន្នសំណុំរឿងអ្នកស្រីកំពុងស្ថិត ក្នុងសមត្ថកិច្ចរបស់សាលាឧទ្ធណ៍នៅឡើយ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៣ មេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ