ប៉ា​ សុ​ជាតិ​វង្ស​៖​ យុទ្ធនាការ​ពាក់​អាវ​ខ្មៅ​ ជា​ផ្នែក​មួយ​នៃ​បដិវត្តន៍​ពណ៌​

សម្រាប់លោក​ ប៉ា​ សុ​ជាតិ​វង្ស អភិបាល​រាជធានី​ភ្នំពេញ​​ យុទ្ធនាការ​ពាក់អាវ​ខ្មៅ ដែលរៀបចំឡើងដោយក្រុម​អង្គការ​សង្គម​ស៊ីវិល គឺជា​​ផ្នែក​​មួយ​នៃ​បដិវត្តន៍​ពណ៌​។
ប៉ា​ សុ​ជាតិ​វង្ស​៖​ យុទ្ធនាការ​ពាក់​អាវ​ខ្មៅ​ ជា​ផ្នែក​មួយ​នៃ​បដិវត្តន៍​ពណ៌​
លោក​ ប៉ា​ សុ​ជាតិ​វង្ស អភិបាល​រាជធានី​ភ្នំពេញ។ (រូបថតសហការី)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ (info@monoroom.info) - ភ្នំពេញ ថ្ងៃទី២១ ឧសភា ២០១៦
  • កែប្រែចុងក្រោយ: May 21, 2016
  • ប្រធានបទ: សិទ្ធិ-កម្ពុជា
  • អត្ថបទ: មានបញ្ហា?
  • មតិ-យោបល់

អ្វីទៅជាបដិវត្តពណ៌? មានន័យយ៉ាងដូចម្ដេចទៅ ពាក្យថា«បដិវត្តន៍ពណ៌»? តែ​បើសិន​​ជា​ពាក្យ​«បដិវត្ត​ន៍​ពណ៌» ​មិន​​សូវ​​ដែល​ត្រូវ​បាន​ក្រុម​មន្ត្រី មកពីគណបក្សប្រឆាំង ឬក្រុមមន្ត្រី មកពីក្រុងអង្គការសង្គមស៊ីវិល លើក​​យក​​មក​​និយាយ​​នោះ តែ​​ពាក្យ​​នេះ ត្រូវបានក្រុមមន្ត្រី​មក​ពី​គណបក្សកាន់អំណាច ទន្ទេញយ៉ាង​ជាប់​មាត់ ថា​ជា​​យុទ្ធនាការ​​មួយ ដើម្បី​​ឈាន​​​ទៅ​​ផ្ដួល​​រំលំ​​​រដ្ឋាភិបាល​​ស្រប​ច្បាប់​សព្វថ្ងៃ ដូចយ៉ាង យុទ្ធនាការពាក់ពណ៌ខ្មៅ ឬ​​«ថ្ងៃ​​ចន្ទ​​ពណ៌​​ខ្មៅ»​​ជា​ដើម។

ជាថ្មីម្ដងទៀត មន្ត្រីមកពីគណបក្សប្រជាជនកម្ពុជា លោក ប៉ា សុជាតិវង្ស ដែលមានតួនាទីរដ្ឋ ជា​អភិបាល​រាជធានី​ភ្នំពេញ​ផង បានប្រកាសច្បាស់ៗថា យុទ្ធនាការពាក់អាវពណ៌ខ្មៅនេះ ជាផ្នែក​មួយ​នៃ​​«បដិវត្តន៍​ពណ៌»។ លោក​​បាន​ថ្លែង​ដូច្នេះ នៅក្នុងពិធី​សម្ពោធ​ស្នាក់​ការ​ គណបក្ស​ប្រជាជន​​កម្ពុជា​​ព្រែក​ថ្មី​ ក្នុង​សង្កាត់​​សំរោង​ ខណ្ឌ​​​ច្បារ​​​អំពៅ​ នា​​​ព្រឹក​​​ថ្ងៃ​​ទី​២១​ ខែឧសភា​ ឆ្នាំ​២០១៦​នេះ។

​ប្រសិនជាបដិវត្តន៍ពណ៌ ដែលមានដើមកំណើត​​មកពីបណ្ដា​ប្រទេស​អារ៉ាប់ នៅក្នុងទ្វីបអាហ្វ្រិក​​ខាង​​ជើង (កើត​​ដំបូង​​គេ ​នៅ​ក្នុង​​ប្រទេស​ទួនេស៊ី) មានការចូលរួមពីពលរដ្ឋស៊ីវិល នៅក្នុងប្រទេសនោះរាប់សិប​ម៉ឺន​​សែន​​នាក់ (ឬ​​អាច​​ឈាន​​ទៅ​​ដល់​​លាន​​នាក់) នោះ តែសម្រាប់ប្រទេសកម្ពុជា​​ក្នុង​ពេល​ពីរ​សប្ដាហ៍​កន្លង​មក​នេះ ការ​ប្រមូល​​ផ្ដុំ​មនុស្ស​​ចាប់​​ពី៥នាក់ និង​ច្រើន​បំផុត​មិន​ដល់​ចំនួន​១០០នាក់ ត្រូវបានគេចាត់ទុកថា ជាការ​ជួបជុំ​គ្នា ដើម្បី​​ធ្វើ​​បដិវត្តន៍​​ពណ៌​​រួច​​ជា​ស្រេច។

ដូចប្រសាសន៍របស់លោក ប៉ា​ សុ​ជាតិ​វង្ស​ ដែលបានថ្លែង​នៅក្នុងពិធីសម្ពោធ​នោះ​ថា​៖​ «នា​​ពេល​​ថ្មីៗ​​នេះ​ មាន​​​​មនុស្ស​​​មួយ​​​ក្រុម​ ខ្លះមក​ពី​សហ​គម​ន៍​ ដីធ្លី​ បាន​នាំ​គ្នា​បើក​​យុទ្ធនាការ​​ស្លៀក​ពាក់​​ខ្មៅ​ ដើម្បី​​ទាមទារ​​ចង់​​ឲ្យ​​​មាន​​ការ​​​ដោះ​​លែង​ មន្ត្រី​អា​ដ​ហុ​ក​ និង​មន្ត្រី​ គ​.​ជ​.​ប​ តែ​បំណង​របស់​ពួក​ គេ​មិន​បាន​​សម្រេច​​នោះ​​ឡើយ​ ដោយ​​សារ​​តែ​​មាន​ការ​​ទប់ស្កាត់ ​ពី​​អាជ្ញាធរ​ និង​សមត្ថកិច្ច​។​»

​សមាជិកគណបក្សប្រជាជនកម្ពុជា និងជាអភិបាលរាជធានីរូបនេះ បានបន្តទៀត​ថា​៖​ «តែ​បញ្ហា​​ទាំង​នេះ​ អាជ្ញាធរ​រាជធានី​​ភ្នំពេញ​ កំពុង​ខិតខំ​ធ្វើការ​អប់រំ​ណែនាំ​ ទៅ​ក្រុម​យុវជន​ ទៅ​អាជ្ញាធរ​ ភូមិ​ សង្កាត់​ ខណ្ឌ​ ក្រោម​​ឱវាទ​​ទាំង​អស់​​ត្រូវ​បន្ដ​​ចុះ​​ធ្វើការ​​ផ្សព្វផ្សាយ​ អប់រំ​ឲ្យ​បាន​ញឹកញាប់​ ដល់​ក្រុម​យុវជន​ទាំងនោះ​ មិន​ត្រូ​វ​ចូលរួម​​តាម​​ពាក្យ​ញុះញង់​​គេ​ នោះ​​ឲ្យ​​សោះ»​។

ជារៀងរាល់ថ្ងៃចន្ទ និងចាប់ពីថ្ងៃចន្ទ ទី៩ ខែឧសភា ឆ្នាំ២០១៦ រហូតមក ក្រុមសមាគមអង្គការក្រៅ​រដ្ឋាភិបាល​​ជា​​ច្រើន បាន​​​ប្រកាស​​​បើក​ធ្វើយុទ្ធនាការ ពាក់អាវពណ៌ខ្មៅ ឬ«ថ្ងៃចន្ទ ពណ៌ខ្មៅ» ដើម្បីជាសញ្ញាមួយ​​ទាមទារ ឲ្យ​មាន​ការ​​ដោះលែង មន្ត្រី​​​ការពារ​​សិទ្ធិ​មនុស្ស​​បួននាក់ របស់​សមាគមអាដហុក និងមន្ត្រីជាន់ខ្ពស់ម្នាក់ របស់​​គណៈ​កម្មាធិការ​​ជាតិ​​រៀបចំ​​​ការ​​បោះ​​ឆ្នោត (គ.ជ.ប.)។ មន្ត្រី​​សិទ្ធិ​មនុស្សទាំងបួននាក់ មាន​លោក នី សុខា - លោក យី សុខសាន្ត - លោក ណៃ វ៉ង់ដា និងអ្នកស្រី លឹម មុន្នី។ រីឯ​មន្ត្រីជាន់ខ្ពស់ ដែលមានថានៈ ជា​​អគ្គលេខា​ធិការ​​រង​របស់ ​គ.ជ.ប. គឺលោក នី ចរិយា។

ប៉ុន្តែនៅថ្ងៃចន្ទ ទី៩ ខែឧសភានោះ កងកម្លាំងរបស់អាជ្ញាធរបានចាប់ខ្លួន ក្រុមមន្ត្រី និងសកម្មជនរបស់​អង្គការ​សង្គម​ស៊ិវិល ចំនួន៨នាក់ (មានជនបរទេសពីរនាក់) យកទៅសាកសួរពេញមួយថ្ងៃ និងបានដោះលែង​វិញ​ជា​បន្ត​បន្ទាប់ នៅ​ពេល​ក្រោយ​មក​។ នៅថ្ងៃចន្ទ ទី១៦ ខែឧសភា ដើមសប្ដាហ៍នេះ ស្ត្រីសកម្មជនចំនួន​៥នាក់​ទៀត ក៏​ត្រូវ​បាន​កង​កម្លាំង​អាជ្ញាធរ​ចាប់ខ្លួន យកទៅសាកសួរ អស់រយៈពេលជាច្រើនម៉ោងដែរ មុននឹង​ត្រូវ​បាន​ដោះ​លែង ​នៅ​ក្នុង​យប់​ថ្ងៃ​ដដែល។

លោក អំ សំអាត មន្ត្រីទទួលខុសត្រូវមួយរូប ពីអង្គការការពារសិទ្ធិមនុស្ស លីកាដូ បាន​និយាយតប​នឹងការ​ចោទ​ប្រកាន់​ខាងលើ​ថា កុំថា​ឡើយ​ដល់​ទៅ​មាន​គម្រោង រៀបចំ​ធ្វើ​បដិវត្តន៍​ពណ៌ បើសូម្បីតែគិត ក៏ពួក​លោក​មិន​ដែល​គិត​ដល់​ដែរ។

រំលឹកខ្លីៗ ពីបដិវត្តន៍ពណ៌

បដិវត្តន៍ពណ៌ ដែលហៅបានច្រើនយ៉ាង ដូចជា «បដិវត្តន៍ផ្កាម្លឹះ» ឬ​«រដូវផ្ការីកអារ៉ាប់» បានកើត​ឡើង​ជា​​ដំបូង​​គេ នៅ​ក្នុង​ប្រទេសទួរនេស៊ី ដែលស្ថិតនៅក្នុងទ្វីបអាហ្វ្រិកខាងជើង។ បដិវត្តន៍នេះ បានរីកដុះដាល និង​កើត​ឡើង​ជា​បន្ត​​បន្ទាប់ នៅក្នុងប្រទេសអារ៉ាបជាច្រើន ដូចយ៉ាងប្រទេសលីប៊ី អេហ្សីព និងស៊ីរីជាដើម ប៉ុន្តែ​ក៏​បាន​​ធ្លាយ​ទៅ​​ដល់​ទ្វីប​អ៊ឺរ៉ុប​ដែរ គឺនៅក្នុង​ប្រទេសអ៊ុយក្រែន។ បុព្វហេតុដ៏សំខាន់ នៃបដិវត្តន៍«ពណ៌» ត្រូវបាន​ពន្យល់​​យ៉ាង​​ខ្លី​​ថា ជា​​កម្លាំង​​ងើប​​ឈរ​​ឡើង ​របស់​ពលរដ្ឋ​ស៊ីវិល នៅក្នុងប្រទេសទាំងនោះ ប្រឆាំងនឹងរបប​ផ្ដាច់ការ ដែល​​កាន់​អំណាច​​ដ៏​ចាស់​​វស្សា និងបានដឹកនាំប្រទេស ទៅរក​អំពើពុករលួយ គ្រួសារបក្ខពួកនិយម។ល។ ករណី​ដែល​​ពិសេស នៃការធ្វើបដិវត្តន៍ពណ៌ នៅក្នុងប្រទេសទាំងនោះ នៅត្រង់ថា ពលរដ្ឋ​ស៊ីវិល​​ដែល​បាន​​ងើប​​ឈរ​​ឡើង មិន​​បាន​​ស្លៀក​ពាក់​​អាវ ឬ​ខោ ឲ្យ​មាន​​ពណ៌​តែមួយ​នោះ​ឡើយ។

ផ្ទុយពីការលើកឡើង របស់មន្ត្រីរបស់គណបក្សប្រជាជនកម្ពុជា ដែលតែងលើកឡើង​ពីលទ្ធផល​ដ៏​អាក្រក់ កើត​ចេញ​ពី​បដិវត្តន៍​ពណ៌នោះ មានប្រទេសចំនួនពីរ «ទួរនេស៊ី និងអ៊ុយក្រែន» ដែលបន្ទាប់​ពី​​បាន​​ធ្វើ​​បដិវត្តន៍​ពណ៌​រួច​ បាន​កំពុង​ដើរ​ទៅ​មុខ តាមលំអាននៃលិទ្ធិប្រជាធិបតេយ្យ បើទោះជាប្រទេស តួរនេស៊ី បានជួប​នឹង​ការ​គម្រាម​កំហែង ដោយអំពើភេរវកម្មម្ដងម្កាល និងប្រទេសអ៊ុយក្រែន បានជួប​នឹង​ការ​ផ្ទុះ​អាវុធ នៅភាគ​ខាង​កើត​ប្រទេស​ ទល់​នឹង​​ក្រុម​ចង់​បំបែក​ទឹកដី ដែលស្និតនឹងប្រទេស​រ៉ុស្ស៊ី​ដ៏​ដោយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ contact@monoroom.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...