ការបញ្ជាឲ្យតាមចាប់ខ្លួន លោក សុខ ប៊ុន ពីសំណាក់រដ្ឋមន្រ្តីក្រសួងមហាផ្ទៃ និងការបញ្ជា ពីលោកនាយក​រដ្ឋមន្រ្តី ឲ្យលោក សុខ ប៊ុន មកបង្ហាញខ្លួននោះ ជាការ«ភ័យខ្លាច» និង«ញញើត» នូវព័ត៌មានជាវីដេអូ ដែល​បណ្តាញសង្គមហ្វេសប៊ុក បានផ្សាយចេញទៅ ហើយក្នុងនាមរដ្ឋាភិបាល មិនអាចព្រងើយ មិនដោះស្រាយ​នោះឡើយ។ នេះជាការបញ្ចេញទស្សនៈ របស់មន្ត្រីអ្នកឃ្លាំមើលបញ្ហាសង្គម លោក យ៉ង់ គឹមអេង ថ្លែងក្នុង​កិច្ចសម្ភាស ជាមួយទស្សនាវដ្តីមនោរម្យ.អាំងហ្វូ។

លោក យ៉ង់ គឹមអេង ដែលជាប្រធានមជ្ឈមណ្ឌល ប្រជាពលរដ្ឋដើម្បីអភិវឌ្ឍន៍ និងសន្តិភាពនោះ បានពន្យល់​ថា៖ «មានការដាក់សម្ពាធ តាមប្រព័ន្ធហ្វេសប៊ុកខ្លាំង។ អំពើហិង្សានោះ ដូចជាព្រៃផ្សៃទៅលើស្រ្តីម្នាក់ ដែល​មិន​គួរ​ឲ្យ​កើត​មាន ដែលជារឿងអសីលធម៌មួយធំ ក្នុងសង្គម និងជាអំពើឧក្រិដ្ឋ ដែលមានភាពសាហាវ និង​ឃោ​ឃៅ។»

កាលពីថ្ងៃទី១៦ ខែកក្កដា ឆ្នាំ២០១៥ លោកនាយករដ្ឋមន្ត្រី ហ៊ុន សែន បានដ្លែងថា អំពើហិង្សាលើ កញ្ញា សាសា ពីសំនាក់លោក សុខ ប៊ុន និងអង្គរក្សនោះ ជាអំពើសាហាវ យង់ឃ្នង។ ហើយ លោកបានប្រកាស ឲ្យ​លោក សុខ ប៊ុន ចូលបង្ហាញខ្លួន ចំពោះមុខតុលាការ និងចេញបញ្ជា ឲ្យអាជ្ញាធមានសមត្ថកិច្ច ចាត់​វិធានការ​តាមច្បាប់ព្រហ្មទណ្ឌ ក្នុងរណីខាងលើនេះ។

នៅព្រឹកថ្ងៃទី១៨ ខែកក្កដានេះ បន្ទាប់ពីត្រូវបាននគរបាលអន្តរជាតិ នាំខ្លួនត្រឡប់មកកម្ពុជាវិញ តាមព្រលាន​យន្ដហោះអន្តរជាតិភ្នំពេញ លោក សុខ ប៊ុន ក៏ត្រូវបាននាំខ្លួនភ្លាម ចូលមកឲ្យសាលាដំបូងរាជធានីភ្នំពេញ ធ្វើការសាកសួរ។ នៅរសៀលថ្ងៃដដែល តុលាការក៏បានសម្រេច បញ្ជូនលោក សុខ ប៊ុន ទៅឃុំខ្លួនជា​បណ្ដោះ​អាសន្ន នៅពន្ធនាគារព្រៃស ដោយមិនទាន់បានសម្រេច ពីការផ្តន្ទាទោស ឬយ៉ាងណានៅឡើយ។

ចំណែកដើមបណ្ដឹង កញ្ញា សាសា វិញ បានថ្លែងទៅកាន់អ្នកសារព័ត៌មាន នៅពេលចេញពីការសាកសួរ របស់​សាលាដំបូង នាថ្ងៃទី១៧ ខែកក្កដា ថាតាមរយៈវីដេអូឃ្លីប ដែលបែកខ្ចរខ្ចាយ តាមបណ្ដាញសង្គម និងការ​គាំទ្រ​ពីសាធារណៈជន អង្គការសង្គមស៊ីវិលផងនោះ កញ្ញានឹងអាចទទួលបានយុត្តិធម៌ ពីតុលាការកម្ពុជា។ អតីត​ពិធីការិនីទូរទស្សន៍ បានប្ដឹងលោក សុខ ប៊ុន ពីបទបង្ករបួសស្នាម ដោយចេតនា ក្នុងទង្វើដ៏សាហាវព្រៃផ្សៃ​មួយ កាលពីយប់ថ្ងៃទី១ មកថ្ងៃទី២ ខែកក្កដាកន្លងមក។

នៅលើបណ្ដាញសង្គម យ៉ាងហោចណាស់ វីដេអូចំនួនពីរ ព្រមទាំងរូបថតជាច្រើនសន្លឹក ទាក់ទងនឹង​ការ​វាយ​តប់ បោចសក់ ជាន់កសម្រាត កញ្ញា សាសា ត្រូវបានគេយកមកបង្ហោះ និងចែករំលែកតៗគ្នា បង្កឲ្យមានការ​បញ្ចេញកំហឹងជាទូទៅ ពាសពេញប្រទេស។ ហេតុការណ៍នេះ ថែមទាំងបានល្បី ចេញទៅក្រៅប្រទេស ជា​ពិសេស​នៅលោកខាងលិចនោះផង ដែលធ្វើរូបភាពរបស់ប្រទេសកម្ពុជា កាន់តែជាប់ប្រលាក់ នឹងអំពើហិង្សា​របៀប​នេះ បេះមិនចេញ។

រដ្ឋមន្រ្តីក្រសួងមហាផ្ទៃ លោក ស ខេង កាលពីថ្ងៃទី១៤ ខែកក្កដា ឆ្នាំ២០១៥ បានថ្លែងបញ្ជា ឲ្យសមត្ថកិច្ច​ជំនាញ និងពាក់ព័ន្ធគ្រប់ជាន់ថ្នាក់ ត្រូវតាមស្វែងរកចាប់ខ្លួន លោក សុខ ប៊ុន មកចាត់ការតាមផ្លូវច្បាប់ ទោះបី​ជារត់គេច ឬលាក់ខ្លួននៅក្រហែងណា ក៏ដោយ។ លោក ស ខេង ថែមទាំងបានព្រមានមន្ត្រីក្រោមបង្គាប់ ដោយ​ជៀសចេញឲ្យឆ្ងាយ ពីការប៉ុនប៉ងធ្វើអន្តរាគមន៍ ចង់លូកដៃជួយលោក សុខ ប៊ុន។

យ៉ាងណាក៏ដោយ ក៏លោក យ៉ង់ គឹមអេង បានស្នើសុំឲ្យមន្រ្តីសាធារណៈ របស់រដ្ឋទាំងអស់ ទាំងលោក ស ខេង ទាំងលោកនាយករដ្ឋមន្រ្តី ត្រូវយកចិត្តទុក្ខដាក់ដូចគ្នា គ្រប់រឿងគ្រប់បទល្មើសទាំងអស់ ឲ្យដូចករណីកញ្ញា សាសា នេះ។ លោកបានថ្លែងឲ្យដឹងទៀតថា៖ «មិនមែនតែបទល្មើសមួយនេះទេ ដែលត្រូវតែ ចាត់ការនោះ។ (...) ប៉ុន្តែករណីផ្សេងៗទៀត ក៏ត្រូវមានចំណាត់ការ កុំឲ្យជនល្មើស នៅក្រៅសំណាញ់ច្បាប់ដូចគ្នា។»៕