សហរដ្ឋអាមេរិក នៅតែបើកទ្វាចំហរ នូវរាល់ការចរចារដោយស្មោះស្ម័គ្រ និងភាតរភាព ដើម្បីការរំសាយអាវុធនុយក្លេអ៊ែរ ប្រសិនបើកូរ៉េខាងជើង បោះជំហានមួយមក។ នេះជាការប្រកាសអោយដឹង របស់រដ្ឋមន្ត្រីការបរទេសអាមេរិក លោកចន ឃែរី (John Kerry) នៅថ្ងៃច័ន្ទទី១៥ខែមេសានេះ ក្នុងសុន្ទរកថាបិតបញ្ចប់ ដំណើរទស្សនកិច្ចរបស់លោកនៅជប៉ុន និងនៅ​អាស៊ីខាងកើត។ «បាល់កំពុងស្ថិតនៅ ខាងទីក្រុងព្យុងយ៉ាង»។

រដ្ឋមន្ត្រីការបរទេសអាមេរិក លោកចន ឃែរី ។

លោកចន ឃែរី បានឆ្លងកាត់តាមទីក្រុងសេអ៊ូល ប្រទេសកូរ៉េខាងត្បូង ទីកន្លែងដែលលោកបានអះអាងជាថ្មី នូវការគាំទ្រ​របស់ទីក្រុងវ៉ាស៊ីនតោន មកសម្ព័ន្ធមិត្តកូរ៉េខាងត្បូងរបស់ខ្លួន។ បន្ទាប់មកទៀត ប្រមុខការទូតអាមេរិក បានធ្វើដំណើរ​ទៅ​កាន់ទីក្រុងប៉េកាំង មុននឹងមកដល់ទីក្រុងតូក្យូប្រទេសជប៉ុន ក្នុងថ្ងៃអាទិត្យទី១៤ខែមេសា។ ក្នុងសុន្ទរកថានោះ លោក​បាន​បញ្ជាក់ថា «រឿងមួយដែលច្បាស់ គឺយើងរួមគ្នាតែមួយ»។

លោកឃេរី បានពន្យល់ថា «គម្រោងដ៏គ្រោះថ្នាក់ នៃកាំជ្រួចនុយក្លេអ៊ែរ របស់កូរ៉េខាងជើង មិនបានគម្រាម​តែប្រទេស​នៅ​ជិតខាងប៉ុណ្ណោះទេ តែបានគម្រាមដូចគ្នាប្រជាជានកូរ៉េខាងជើងខ្លួនឯងដែរ»។ លោកបានអំពាវនាវ ទីក្រុងព្យុងយ៉ាង អោយបោះជំហានសំខាន់ៗរបស់ខ្លួន ដើម្បីបង្ហាញថា កូរ៉េខាងជើងអោយតម្លៃលើ កិច្ចសន្យារបស់ខ្លួន រួមនឹងច្បាប់ទម្លាប់ និងក្បួនខ្នាតអន្តរជាតិផង។

ខួបកំណើតរបស់គីម អ៊ីលស៊ុង

តាំងពីព្រឹកព្រលឹមថ្ងៃច័ន្ទទី១៥នេះម្លេះ មេដឹកនាំវ័យក្មេង គីម ជុងអ៊ុន (Kim Jong-Un) បានចូលមកកាន់វិមានតំកល់សព ដែលមានសពឪពុក និងសពជីតារបស់លោក ត្រូវបានតំកល់រក្សារូបរាងរហូតមកទល់នឹងសព្វថ្ងៃនេះ។ លោកគីម អ៊ីលស៊ុង (Kim Il-Sung) ជីតារបស់លោកគីម ជុងអ៊ុន និងជាស្ថាបនិកនៃរបបកុម្មុយនីស  ត្រូវបានគេប្រារព្ធពិធីខួប​កំណើត ១០១ឆ្នាំ នៅថ្ងៃនេះ។

នៅតាមកញ្ចក់ទូរទស្សន៍រដ្ឋរបស់ប្រទេស គេឃើញមានការផ្សព្វផ្សាយឡើងវិញ ពីប្រវត្តិនៃអតីតអគ្គមគ្គុទេសដ៏ថ្លៃថ្លា និង​រូបភាពកងទ័ពកំពុងហ្វឹកហាត់យុទ្ធសាស្ត្រ។  កងទ័ព បានប្រមូលគ្នាមកជុំ មូលមីដេរដាស ដើម្បីប្រារព្ធពិធីខួប​កំណើត​នេះ។ ជាញយដង ទីក្រុងព្យុងយ៉ាងតែបានប្រារព្ធខួបកំណើររបស់មេដឹកនាំរបស់ខ្លួន ដោយការសាកល្បងកម្លាំងយោធា និងបាញ់កាំជ្រួចអន្តរទ្វីប។ តែការបាញ់សាកល្បងណាក៏ដោយក្នុងពេលនេះ លោកចន ឃែរីបានចាត់ទុកថា ជា«កំហុស​ដ៏ធំមួយ» របស់របបកុម្មុយនីស។

ភាពតានតឺងនៅលើឧបទ្វីបកូរ៉េ បានកើនឡើងខ្លាំង បន្ទាប់ពីទណ្ឌកម្មរបស់អ.ស.ប. សម្រេចដាក់លើកូរ៉េខាងជើង ដើម្បី​ជាការឆ្លើយតប នឹងការសាកល្បងនុយក្លេអ៊ែររបស់ប្រទេសនេះ ធ្វើឡើងពីដើមខែកុម្ភះ កន្លងមក និងសមយុទ្ធយោធារ​រវាងកូរ៉េខាងត្បូងនិងអាមេរិក ធ្វើឡើងកាលពីពេលថ្មីៗនេះ។ ទីក្រុងព្យុងយ៉ាង ទើបនឹងគម្រាមប្រទេសជប៉ុន កាលពី​ថ្ងៃ​សុក្រ​ទី១២​មេសានេះ ពីការវាយប្រហារនុយក្លេអ៊ែរមួយ នៅបន្ទាប់ពីទីក្រុងតូក្យូបានពង្រាយប្រព័ន្ធឆែល ប្រឆាំងកាំជ្រួច​របស់កូរ៉េខាងជើង ដែលបាញ់មកគម្រាមទឹកដីជប៉ុន។

ប៉ុន្តែរហូតមកទល់បច្ចុប្បន្ន  ការខឹកសម្បារទាំងឡាយរបស់កូរ៉េខាងជើង បានធ្វើឡើងត្រឹមតែជាពាក្យសម្ដីប៉ុណ្ណោះ។ ប្រមុខការទូតអាមេរិក ក្នុងដំណើរឆ្លងកាត់ទីក្រុងប៉េកាំង បានជម្រុញអោយចិន បង្ក្រាបសម្ព័ន្ធមិត្ត​កុម្មុយនីស​របស់​ខ្លួន​មួយនេះ ដែលមានសេដ្ឋកិច្ចរស់បាន ដោយសារការផ្ដល់ដង្ហើមអោយដក របស់ចិន។ រដ្ឋមន្ត្រីការបរទេសចិន លោកវាង យី (Wang Yi) បានថ្លែងថា «ប្រឈមមុខដោះស្រាយ បញ្ហានុយក្លេអ៊ែរនៅកូរ៉េ ជាផលប្រយោជន៍ របស់គ្រប់ភាគី​ទាំង​អស់»៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៥ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ