អាមេរិក កំណត់យ៉ាងច្បាស់ ថានឹងការពារប្រទេសជប៉ុន។ នេះជាការប្រកាស របស់ប្រមុខការទូតអាមេរិក លោក ចន ឃែរី (John Kerry) នាទីក្រុងតូក្យូនៅថ្ងៃអាទិត្យទី១៤ខែមេសានេះ ក្នុងដំណើរចុងក្រោយបង្អស់ នៃបេសកកម្មការទូតរបស់​លោក​នៅ​តំបន់អាស៊ី។

លោកចន ឃេរី និងលោក ហ៊្វូមីយ៉ូ គីស្សីដា នៅក្នុងសន្និសិតកាសែតរួមគ្នា។

«សហរដ្ឋអាមេរិក ពិតជាបានកំណត់យ៉ាងច្បាស់ ថានឹងការពារប្រទេសជប៉ុន» នេះជាការបញ្ជាក់ របស់រដ្ឋមន្ត្រីការបរទេស​អាមេរិកលោកចន ឃេរី នៅក្នុងសន្និសិតកាសែត ជាមួយនឹងរដ្ឋមន្ត្រីការបរទេសជប៉ុន លោក ហ៊្វូមីយ៉ូ គីស្សីដា (Fumio Kishida) នៅបន្ទាប់ពីជំនួបរវាងគ្នារួចមក។ កាលពីថ្ងៃសុក្រ ប្រទេសកូរ៉េខាងជើង បានគម្រាមប្រទេសជប៉ុន ពីការវាយ​លុក«នុយក្លេអ៊ែរ»មួយ ក្រោយពេលដែលទីក្រុងតូក្យូ បានសម្រេចពង្រាយប្រព័ន្ធចាប់កាំជ្រួចរបស់ខ្លួន ប្រឆាំងកាំជ្រួច​កូរ៉េខាងជើង ក្នុង​ករណីមានការគម្រាមណាមួយ មកលើទឹកដីជប៉ុន។

ក្រុមអ្នកវិភាគ ភូមិសាស្ត្រនយោបាយ បានវាយតម្លៃថា កូរ៉េខាងជើ់ងទំនងជា មិនបានកំណត់យកប្រទេសជប៉ុន ជាមុខ​ព្រួញរបសខ្លួន ដោយចំហរទេ។ តែវិធានការការពារ ដែលសម្រេចដោយទីក្រុងតូក្យូ គ្រាន់តែចង់បង្កា ក្នុងករណី​កាំជ្រួច​កូរ៉េខាងជើងណាមួយ ត្រូវបានសាកល្បងបាញ់ចេញមក ខុសទិសដៅឬមានបញ្ហាជាយថាហេតុនោះជាដើម។

របបក្រុងព្យុងយ៉ាង អាចនឹងធ្វើការបាញ់សាកល្បងកាំជ្រួចរយៈខ្លី ឬមធ្យមនៅក្នុងថ្ងៃទី១៥ខែមេសានេះ ដែលជាថ្ងៃខួប​កំណើតរបស់លោក គីម អ៊ីលស៊ុង (Kim Il-sung) ស្ថាបនិកដ៏មហិមានៃប្រទេសកូរ៉េខាងជើង និងត្រូវជាជីតាបង្កើត​របស់​មេដឹកនាំវ័យក្មេងសព្វថ្ងៃ លោក គីម ជុងអ៊ុន (Kim Jong-un)។ លោកប្រមុខការទូតអាមេរិក ធ្លាប់បាននិយាយរួចហើយថា ការបាញ់សាកល្បងណាមួយក៏ដោយ នឹងជា«កំហុសដ៏ធំមួយ» របស់របបកុម្មុយនីស។

ទស្សនកិច្ចនៅចិន

ទាក់ទងនឹងដំណើរទស្សនកិច្ច នៅក្នុងប្រទេសចិនកាលពីថ្ងៃសៅរ៍ លោកឃែរី បានបញ្ជាក់ក្នុងសន្និសិតកាសែតដដែលថា មានភាពវិជ្ជមាន និងក្ដីសង្ឃឹមដ៏អស្ចារ្យ ដែលប្រទេសចិនបានសន្យានឹងសហការគ្មា ដើម្បីអោយស្ថានភាពតានតឹងនេះ ប្រែជាស្ងប់ស្ងាត់វិញ។ នៅទីក្រុងប៉េកាំង ទីក្រុងដែលលោកបានធ្វើដំណើរមកដល់ ក្រោយពីទីក្រុងសេអ៊ូល និងមុនទីក្រុង​តូក្យូនោះ លោកប្រមុខការទូតអាមេរិក បានស្នើសុំកិច្ចអន្តរាគមន៍ជា«បន្ទាន់»មួយ ទៅកាន់ប្រធានាធិបតីចិន លោក ស្សី ជីនភីង (Xi Jinping) ស្ដីពីវិបត្តិ​នៅឧបទ្វីបកូរ៉េ។

ចិនសម្ព័ន្ធមិត្តតែមួយគត់ របស់ទីក្រុងព្យុងយ៉ាង ទំនងជាមានឥទ្ធិពលអាចឃាត់របបនេះ កុំអោយ​ប្រព្រឹត្តិ​អំពើ«ខុស»​ណា​មួយ ដែលជ្រុលជ្រួសបាន។ «អំពើជ្រុលជ្រួស» ដែលអាមេរិកយល់ថា នឹងឈានទៅរកស្ថានភាពដ៏អាក្រក់មួយ មិនអាច​កែប្រែបាន៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ