ហ៊ុន សែន បញ្ជាឲ្យកែ«រដ្ឋធម្មនុញ្ញ» ដើម្បីប្រឆាំងមនុស្សម្នាក់?
ឈប់ជ្រលក់មាត់ ជាមួយគណបក្សប្រឆាំងទៀតហើយ! ប៉ុន្តែធាតុពិត ដូចជាមិនដូច្នេះទេ ព្រោះគ្រាន់តែកូនស្រីម្នាក់ របស់មេដឹកនាំគណបក្សប្រឆាំង ដែលកំពុងមានវត្តមាននៅក្រៅប្រទេស កំពុងធ្វើឲ្យលោក ហ៊ុន សែន និងរដ្ឋាភិបាលរបស់លោក ខ្វាយខ្វល់មិនលែងឡើយ និងឈានទៅកែរដ្ឋធម្មនុញ្ញ ដើម្បីកុំឲ្យជនកម្ពុជា ដូចជារូបនាងនេះ «ធ្វើសកម្មភាពឲ្យប៉ះពាល់ ដល់ផលប្រយោជន៍ជាតិ ទាំងក្នុងនិងក្រៅប្រទេស»។
គម្រោងការ«កែរដ្ឋធម្មនុញ្ញ»នេះ ត្រូវបានលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ថ្លែងឡើងដោយផ្ទាល់មាត់ កាលពីថ្ងៃទី២៨ ខែធ្នូនេះ នៅក្នុងសន្និបាតបូកសរុបការងារ ឆ្នាំ២០១៧ និងលើកទិសដៅ ២០១៨ របស់ក្រសួងរៀបចំដែនដី នគរូបនីយកម្ម និងសំណង។ លោកបានអះអាងថា លោកនិងសហការី ត្រូវបានលោកនាយករដ្ឋមន្ត្រី ហ៊ុន សែន ចាត់ឲ្យទទួលបន្ទុក ក្នុងការធ្វើ«វិសោធនកម្មរដ្ឋធម្មនុញ្ញ» ដែលប្រហែលជាមាន៧ចំណុច ហើយសម្រេចយកតែ៣ចំណុច។
[...]
