បារាំងបន្តឹងសម្លេងដាក់កម្ពុជា នៅមុនទណ្ឌកម្មអ៊ឺរ៉ុបធ្លាក់ចុះ
នេះ ជាប្រតិកម្មផ្លូវការជាថ្មីទៀត របស់ប្រទេសបារាំង នៅចំពោះវិបត្តិនយោបាយ នៅក្នុងប្រទេសកម្ពុជា។ ហើយជាប្រតិកម្ម នៅក្នុងបំណងមួយ ដែលប្រទេសបារាំង អះអាងតាមបែបការទូត ថាចង់ឃើញប្រទេសកម្ពុជា មានដំណើរការប្រជាធិបតេយ្យ ដើរទៅមុខជាបន្តទៀត បន្ទាប់ពីបានដើរបាន២៥ឆ្នាំ បើគេរាប់ចាប់ថ្ងៃចុះកិច្ចព្រមព្រៀង សន្តិភាពក្រុងប៉ារីស នៅថ្ងៃទី២៣ ខែតុលា ឆ្នាំ១៩៩១ នោះមក។ ប៉ុន្តែសម្រាប់អ្នកឃ្លាំមើលបញ្ហាកម្ពុជាវិញ បានពន្យល់ថា ទង្វើម្ដងហើយម្ដងទៀត របស់បារាំង គឺចង់ជួយបញ្ជៀសប្រទេសដ៏ក្រីក្រមួយនេះ ឲ្យរួចផុតពីទណ្ឌកម្ម ពីសំណាក់សហគមន៍អន្តរជាតិ ជាពិសេសពីសំណាក់សហភាពអ៊ឺរ៉ុប ដែលជាលំហទីផ្សារនាំចេញ ដែលធំជាងគេបង្អស់របស់កម្ពុជា។
ប្រតិកម្មជាថ្មីទៀត របស់ប្រទេសមហាអំណាច បានធ្វើឡើងតាមរយៈលោក ទីជែរី ម៉ាធូ (Thierry MATHOU) ប្រធាននាយកដ្ឋានទទួលបន្ទុកកិច្ចការអាស៊ី និងអូសេអានី នៃក្រសួងទទួលបន្ទុកកិច្ចការអ៊ឺរ៉ុប និងការបរទេសបារាំង។ [...]
