អ៊ឺរ៉ូ២០១៦៖ ពីកេ រកជ័យឲ្យអេស្ប៉ាញនៅចុងម៉ោង ទល់នឹងក្រុមឆេក
នៅក្នុងការជួបប្រកួតដំបូង សម្រាប់«អ៊ឺរ៉ូ២០១៦»នេះ គ្រូបង្វឹក និងដឹកនាំក្រុមបាល់ទាត់អេស្ប៉ាញ លោក «Vicente Del Bosque» បានដូរយុទ្ធសាស្ត្រ នៅក្នុងការដាក់បញ្ចូលកីឡាករ «David de Gea» ទៅធ្វើជាកីឡាករចាំទី ជំនួសកីឡាករ «Iker Casillas» ដែលធ្លាប់ចាំទីឲ្យក្រុមជម្រើសជាតិនេះ តាំងពីច្រើនជំនាន់មកហើយ។ ប៉ុន្តែការវាយលុក របស់ក្រុមអេស្ប៉ាញ ក៏មិនសូវជាទទួលបានលទ្ធផលច្រើនប៉ុន្មានដែរ រាប់ពីពេលចាប់ផ្ដើមប្រកួត រហូតដល់ជិតចុងបញ្ចប់ម៉ោង។
គេឃើញ កីឡាករខ្សែបម្រើ «David Silva» បានរកបាល់ បញ្ជូនទៅឲ្យកីឡាករខ្សែប្រយុទ្ធ «Alvaro Morata» និង«Nolito» ជាច្រើនដង ប៉ុន្តែនៅចំពោះខ្សែការពារដ៏រឹងមាំ និងកីឡាករ «Petr Cech» អ្នកចាំទីដែលមានបទពិសោធន៍ចាស់វស្សា របស់ក្រុមឆេកនោះ ក្រុមអេស្ប៉ាញមិនបានធ្វើឲ្យពួកអ្នកគាំទ្រ លោតឡើងសប្បាយរីករាយឡើយ។
ប្រទេសអេស្ប៉ាញ និងអ្នកគាំទ្រក្រុមនេះ ត្រូវរង់ចាំរហូតដល់នាទីទី៨៦ [...]
