កុមារឈឺជំងឺសើស្បែកដ៏ចម្លែក បានប្រសើរជាងមុន បើតាមសម្តីគ្រូពេទ្យ
ជំងឺដ៏រ៉ាំរ៉ៃ បានកើតនៅលើខ្លួនក្មេងប្រុស មកពីភូមិអុង ឃុំម្រាម សង្កាត់ព្រៃនប់ ក្រុងព្រះសីហនុម្នាក់នេះ អស់រយៈពេលជាងពីរឆ្នាំមកហើយ និងបានជំរុញឲ្យបងៗរបស់កុមារពីរនាក់ទៀត ត្រូវបង្ខំចិត្តបញ្ឈប់ការសិក្សា ដើម្បីស្វែងរកប្រាក់ព្យាបាលឲ្យប្អូនពៅ ក្នុងគ្រួសារដែលមានបងប្អូនតែបីនាក់។ ជំងឺសើស្បែកដ៏កម្រនេះ បានធ្វើឲ្យស្បែករបស់កុមារា សំ និត អាយុ១២ឆ្នាំ ក្លាយទៅជាប្រះ រលាក នឹងមានចេញជាទឹករងៃពេញទាំងដងខ្លួន ហើយបានមកសម្រាកព្យាបាល នៅមន្ទីរពេទ្យលោកសង្ឃ។
ជាមួយនឹងសម្លេងខ្សាយៗ កុមារា សំ និត បានខំប្រឹងនិយាយថា៖ «ខ្ញុំនៅហូបបាយបានរាល់ថ្ងៃ តែមានការឈឺចាប់ត្រង់ស្បែក (ក្រហាយ) ដោយសារវាមានខ្ទុះនៅកន្លែងប្រះ»។
យ៉ាងណាក៏ដោយ តាមសម្ដីរបស់គ្រូពេទ្យ បានថ្លែងអះអាងថា កុមារមានសភាពធូរស្រាលច្រើនហើយ។ លោកគ្រូពេទ្យ ច័ន្ទ សុភ័ក្រ [...]