កឹម សុខា ថាការលាលែងរបស់ សម រង្ស៊ី បានពិគ្រោះជាមួយថ្នាក់ដឹកនាំបក្ស
នៅមុននេះបន្តិច លោក កឹម សុខា ដែលកំពុងកាន់តំណែង ជាប្រធានស្ដីទីគណបក្សសង្គ្រោះជាតិ បានសរសេរបង្ហោះ នៅលើទំព័រហ្វេសប៊ុករបស់លោក អះអាងថា ការលាលែង ពីប្រធានគណបក្ស របស់លោក សម រង្ស៊ី ត្រូវបានធ្វើឡើង ប្រកបដោយ«កិត្តិយស» និងដោយមានការ«ពិគ្រោះ» ជាមួយថ្នាក់ដឹកនាំគណបក្ស។
លោក កឹម សុខា បានសរសេរថា៖ «ការសម្រេចចិត្តលាលែងពីប្រធាន និងសមាជិកគណបក្សសង្គ្រោះជាតិ របស់ឯកឧត្តម សម រង្ស៊ី គឺជាការសម្រេចចិត្ត ប្រកបដោយកិត្តិយស ដោយមានការពិគ្រោះយោបល់ ជាមួយថ្នាក់ដឹកនាំគណបក្ស ដើម្បីផលប្រយោជន៍ជាតិ និងគណបក្សជាធំ។»។
កាលពីល្ងាចម្សិលម៉ិញ លោក សម រង្ស៊ី មេដឹកនាំចលនាប្រឆាំងទល់នឹងការកាន់អំណាច «ដ៏ចាស់វស្សា» របស់លោកនាយករដ្ឋមន្ត្រី ហ៊ុន សែន បានប្រកាសលាលែង ពីតំណែងជាប្រធាន និងសមាជិកគណបក្ស តាមរយៈលិខិតមួយច្បាប់ ដែលលោកបានចុះហត្ថលេខា នៅរដ្ឋធានី ប៉ារីស ប្រទេសបារាំង [...]
