អគ្គលេខាធិការនៃអង្គការសហប្រជាជាតិ លោក បាន គី-មូន (Ban Ki-moon) បានពន្យល់ប្រាប់កូរ៉េខាងជើង នៅថ្ងៃ​អង្គារ​ទី០២ខែមិនានេះ ថាវិបត្តិនៅឧបទ្វីបកូរ៉េ បានទៅ«ឆ្ងាយជ្រុលពេក»ហើយ។ ប្រតិកម្មរបស់លោកបាន កើតមានឡើង នៅ​បន្ទាប់ពីកូរ៉េខាងជើង បានប្រកាសក្នុងថ្ងៃដដែលថា នឹងបើកអោយដើរឡើងវិញ នូវម៉ាស៊ីនប្រតិករ​នុយក្លេអ៊ែរ​មួយ ដែល​ធ្លាប់ត្រូវបានបញ្ឈប់ លែងអោយមានដំណើរការ កាលពីឆ្នាំ២០០៧កន្លងទៅ។

លោក បាន គីម-មូន អគ្គលេខាធិការនៃអង្គការសហប្រជាជាតិ។

ថ្លែងទៅកាន់អ្នកសារព័ត៌មាន ក្នុងពេលទស្សនកិច្ចទៅកាន់រាជាណាចក្រ អង់ដ័រ (Andorre) លោកបាន គី-មូន បានថ្លែង​ថា «ក្នុងនាមជាអគ្គលេខាធិការ វាជាភារកិច្ចរបស់ខ្ញុំដែលត្រូវទប់ កុំអោយមានសង្គ្រាមផ្ទុះកើតឡើង និងស្វែងរក​សន្តិភាព​មក​វិញ។ វាក៏ជាការទទួលខុសត្រូវរបស់ខ្ញុំផងដែរ ដែលត្រូវនិយាយថាវិបត្តិក្នុងពេលនេះ បានទៅឆ្ងាយជ្រុលពេកហើយ។»

លោកនិយាយថា «ការគម្រាមទាំងឡាយ​ដែលទាក់ទងនឹងនុយក្លេអ៊ែរ មិនមែនជាល្បែងលេងនោះទេ។ អ្វីៗត្រូវចាប់ផ្ដើម​ ពីការអត់ធ្មត់ជាមុនសិន។» សម្រាប់រូបលោកអគ្គលេខាធិការ វាគ្មានហេតុផលអ្វី ដែលទីក្រុងព្យុងយ៉ាង ត្រូវប្រឆាំងទល់នឹង​ការរួមគ្នា របស់សហគមន៍អន្តរជាតិនោះទេ។

កាលពីព្រឹកថ្ងៃអង្គារនេះ ប្រទេសកូរ៉េខាងជើងបានប្រកាស ពីបំណងរបស់ខ្លួន ក្នុងការរៀបចំ និងដាក់អោយដើរឡើងវិញ នូវម៉ាស៊ីនប្រតិករនុយក្លេអែរមួយ ក្នុងរោងចក្រយ៉ុងបាយូន  (Yongbyon) ដែលបានបញ្ឈប់កាលពីឆ្នាំ២០០៧​កន្លងមក។ ប្រទេសកុម្មុយនីស បានបញ្ជាក់ពីគោលបំណងនេះរបស់ខ្លួន ថាមានលក្ខណៈបម្រើអោយស៊ីវិល ហើយ​ចង់​បានអោយ​មានថាមពលអគ្គិសនី មកប្រើប្រាស់។

តែក្នុងបរិបទសព្វថ្ងៃ ដែលស្ថានការណ៍ កំពុងមានភាពតានតឹងកាន់​តែខ្លាំង​ជា​មួយនឹងកូរ៉េខាងត្បូង និងសហរដ្ឋអាមេរិក​នោះ គម្រោងនេះ បានធ្វើអោយគេគិតថា ទីក្រុងព្យុងយ៉ាងអាចនឹង ប្រើប្រាស់វា ដើម្បីផលិតឡើងវិញនូវជាតិអ៊ុយរ៉ានីញ៉ូម ក្នុងគោលបំណងយោធា។

ចិនអំពាវនាវកូរ៉េខាងជើង អោយអត់ធ្មត់

នៅបន្ទាប់ពីការប្រកាសនេះ ប្រទេសចិនឯណោះវិញ ដែលជាសម្ព័ន្ធមិត្តតែមួយគត់ របស់ទីក្រុងព្យុងយ៉ាង ក៏បាន​និយាយ​សម្ដែង ពីការសោកស្ដាយរបស់ខ្លួនដែរ។ តាមអ្នកនាំពាក្យរបស់ក្រសួងការបរទេសចិន លោកហុង ឡៃ (Hong Lei) ប្រទេសចិនបានអំពាវនាវទៅកូរ៉េខាងជើង អោយបង្ហាញពីការអត់ធ្មត់របស់ខ្លួន អោយបានជាអតិបរិមា។ លោកហុង បាន​រំលឹងពីតួនាទីរបស់ចិន ដែលត្រូវរក្សាអោយបាន នូវស្ថិរភាពក្នុងតំបន់ និងធ្វើអោយឧបទ្វីបកូរ៉េ ក៏ដូចជាតំបន់អាស៊ី​​ឦសាន ក្លាយជាតំបន់មួយ គ្មានអាវុធនុយក្លេអ៊ែរ។ លោកនិយាយថា «ស្ថានភាពបច្ចុប្បន្នក្នុងឧបទ្វីបកូរ៉េ បានក្លាយជា​ស្មុគ្រស្មាញ និងរសើប»។

សូមបញ្ជាក់ថា ចិនមិនត្រឹមតែជាសម្ព័ន្ធមិត្តយុទ្ធសាស្ត្រ របស់កូរ៉េខាងជើងប៉ុណ្ណោះទេ តែជាដៃគូរពាណិជ្ជកម្មដ៏ធំជាងគេ ជាមួយនឹងប្រទេសនេះ។ តែទីក្រុងប៉េកាំង បានជ្រើសរើសបោះឆ្នោតគាំទ្រ ដំណោះស្រាយរបស់ក្រុមប្រឹក្សាសន្តិសុខ នៃ​អង្គការ​សហប្រជាជាតិ ដែលបានបន្ថែមទណ្ឌកម្មលើប្រទេសកុម្មុយនីស នៅក្រោយបន្ទាប់ពីប្រទេសនេះ បានបាញ់សាក​ល្បង​នុយក្លេអ៊ែរ ជាលើកទីបី កាលពីខែកុម្ភះមុន៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី០២ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ