ប្រទេសចិន កាលពីថ្ងៃអាទិត្យទី២វិច្ឆិកា បាននិយាយពីភាពព្រួយបារម្ភរបស់ខ្លួន នៅក្រោយបន្ទាប់ពីការប្រកាស របស់ប្រទេស​កូរ៉េ​ខាងជើង ដែលមានគម្រោងចង់បាញ់កាំជ្រួច នៃប្រព័ន្ធផ្កាយរណបរបស់ខ្លួន។ ការព្រួយបារម្ភនេះ បានកើតមានឡើង បើទោះជា​គេដឹងថា ប្រទេសចិន និងកូរ៉េខាងជើង ជាសម្ព័ន្ធភាព ខាងវិស័យសេដ្ឋកិច្ច និងការទូតនោះក៏ដោយ។

ព្យុះហយាត្រា របស់កងទ័ពកូរ៉េខាងជើង ក្នុងថ្ងៃបុណ្យជាតិរបសប្រទេសនេះ។

ជាគម្រោងការបាញ់កាំជ្រួចមួយ ដែលទីក្រុងវ៉ាស៊ីនតោន របស់សហរដ្ឋអាមេរិក និងទីក្រុងសេអ៊ូល របស់កូរ៉េខាងត្បូង បានប្រឆាំង​យ៉ាងដាច់ណាត់ ថាជាការរំលោភថ្មីមួយទៀត របស់ប្រទេសកុម្មុយនីសមួយនេះ ក្នុងខណៈនៅមានទណ្ឌកម្ម ពីសហគមអន្តរជាតិ​នោះផងនៅឡើយ។

ទីភ្នាក់ងារសារពត៌មានផ្លូវការ «ចិនថ្មី» បាននិយាយដោយមិនបានបញ្ចាក់ប្រភពថា «ប្រទេសចិនបង្ហាញពី ភាពខ្វល់ខ្វាយរបស់ខ្លួន ទាក់ទងនឹងគម្រោងការបាញ់បង្ហោះ កាំជ្រួចផ្កាយរណប ដោយសាធារណរដ្ឋប្រជាមានិតកូរ៉េ (ឈ្មោះរបស់ប្រទេសកូរ៉េខាងជើង) ហើយប្រទេសចិនសង្ឃឹមថា រាល់ភាគីទាំងអស់ដែលពាក់ព័ន្ធ នឹងខិតខំជួយជំរុញ តុល្យភាពតំបន់នៅក្នុងឧបទ្វីបកូរ៉េ»។

ទីក្រុងព្យុងយ៉ាង បានប្រកាសអោយដឹងពីថ្ងៃសៅរិ៍ ពីគ្រោងការរបស់ខ្លួន រវាងពីថ្ងៃទី១០ ដល់ថ្ងៃទី២២ធ្នូ ដែលនឹងធ្វើការសាកល្បង​បាញ់កាំជ្រួច បង្ហោះផ្កាយរណប ត្រួតពិនិត្យមួយ បន្ទាប់ពីបានបាញ់កាំជ្រួចនេះ មិនបានសម្រេចកាលពីខែមេសាមុន។

សេចក្ដីប្រកាស របស់កូរ៉េខាងជើងនេះ ស្ថិតនៅក្រោមសម្ពាធ នៃការដាក់ទណ្ឌកម្មរបស់សហគមអន្តរជាតិ ដែលមាននៅជាធរមាន​នៅឡើយ ក្រោយបន្ទាប់ពីខ្លួនបានសាកល្បងអាវុធនុយក្លេអ៊ែរ កាលពីឆ្នាំ២០០៦ និង២០០៩ កន្លងមក។

សហរដ្ឋអាមេរិក បានបរិហាសេចក្ដីប្រកាសរបស់កូរ៉េខាងជើង ថាជា«ការរករឿងដ៏ធំ»មួយ ហើយបានរំលឹកប្រទេសនេះ ពី«រាល់​ការប្រើប្រាស់បច្ចេកវិទ្យា ភ្ជាប់គ្រាប់ម៉ីស៊ីល ណាមួយក៏ដោយ វាជាការរំលោភ ដល់សេចក្ដីសម្រេចចិត្ត របស់ក្រុមប្រឹក្សាសន្ដិសុខរ របស់អង្គការសហប្រជាជាតិ»។

ទាក់ទងនឹងការសាកល្បងនេះ អង្គការសហប្រជាជាតិ និងសហរដ្ឋអាមេរិក មើលឃើញថា ជាការសាកល្បងបាញ់ កាំជ្រួចចម្ងាយ​ឆ្ងាយមួយ ដែលអ្នកជំនាញខាងលោកខាងលិច និយាយថាអាចបាញ់បានរហូតដល់ ៦ ៧០០គម។ អ្នកជំនាញទាំងនោះបាន​និយាយបញ្ជាក់ថា កាំជ្រួចចម្ងាយឆ្ងាយនេះ ជាដំណាក់កាលថ្មីមួយទៀត ក្នុងការផ្ទៀតផ្ទាត់រកមើល ពីលទ្ធភាពឈានទៅភ្ជាប់អាវុធ​ នុយក្លេអ៊ែរទៅជាមួយ។

ប្រទេសចិនជា ជាសម្ព័ន្ធមិត្តដ៏សំខាន់មួយរបស់កូរ៉េខាងជើង ដែលជាប្រទេសកុម្មុយនីស រស់នៅឯកោតែឯង ខាងផ្នែកការទូត ពី​សហគមអន្តរជាតិ។ តែទោះជាយ៉ាងណាក៏ដោយ ក៏ប្រទេសជាមិត្តទាំងពីរ បានព្រមព្រៀងជំរុញអោយបានលឿនរួមគ្នា កាលពី​ពេលថ្មីៗនេះ នូវការបង្កើតតំបន់សេដ្ឋកិច្ច នៅតាមបណ្ដោយព្រំប្រទល់៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី០៣ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ