បេក្ខជន​នាយករដ្ឋមន្ត្រី ហ៊ុន សែន បាន​បោះឆ្នោត​រួច​ទាំង​គ្មាន​គូប្រជែង

នាយករដ្ឋមន្ត្រីផុតអាណត្តិ និងជាប្រធានគណបក្សប្រជាជនកម្ពុជា លោកហ៊ុន សែន បានបោះឆ្នោតរួចរាល់ហើយ នៅក្នុងការបោះឆ្នោតមួយ ដែលរូបលោកជាបេក្ខជននាយករដ្ឋមន្ត្រីតែមួយគត់ របស់គណបក្សប្រជាជនកម្ពុជា និងដែលគ្មានគូប្រកួត ដែលប្រកៀកប្រកិតនឹងរូបលោក។
បេក្ខជន​នាយករដ្ឋមន្ត្រី ហ៊ុន សែន បាន​បោះឆ្នោត​រួច​ទាំង​គ្មាន​គូប្រជែង
ពីឹឆ្វេងទៅស្ដាំ៖ អ្នកស្រី ប៊ុន រ៉ានី ហ៊ុនសែន ជាភរិយា និងលោក ហ៊ុន សែន នាយករដ្ឋមន្ត្រីផុតអាណត្តិ និងជាបេក្ខជននាយករដ្ឋមន្ត្រី សម្រាប់អាណត្តិថ្មី។ (រូបថតលើហ្វេសប៊ុក)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី២៩ កក្កដា ២០១៨
  • កែប្រែចុងក្រោយ: July 29, 2018
  • ប្រធានបទ: បោះឆ្នោតជាតិ
  • អត្ថបទ: មានបញ្ហា?
  • មតិ-យោបល់

ព្រឹកថ្ងៃអាទិត្យ ទី២៩ ខែកក្កដា ឆ្នាំ២០១៨នេះ លោក ហ៊ុន សែន បានហុចចង្អុលដៃជ្រលក់ថ្នាំខ្មៅរបស់លោក ដើម្បីបង្ហាញថា លោកបានបោះឆ្នោតរួចហើយ នៅក្នុងការិយាល័យបោះឆ្នោត ក្នុងសាលាគរុកោសល្យវិក្រិត្យការ ក្រ‌ុងតាខ្មៅ ខេត្តកណ្តាល។ លោកនាយករដ្ឋមន្ត្រីផុតអាណត្តិរូបនេះ បានទៅបោះឆ្នោត ជាមួយនឹងភរិយារបស់លោក អ្នកស្រី ប៊ុន រ៉ានី ហ៊ុន សែន។

លោក ហ៊ុន សែន ជាបេក្ខជននាយករដ្ឋមន្ត្រីតែម្នាក់ និងមិនអាចប្រជែងបាន មកពីគណបក្សប្រជាជនកម្ពុជា ដែលដឹកនាំដោយរូបលោកផ្ទាល់ សម្រាប់ប្រកួតប្រជែង នៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨នេះ ដែលមានពោរពេញ ដោយភាពចម្រូងចម្រាស។

ក្រុមអ្នកឃ្លាំមើល បានរំពឹងថា គណបក្សប្រជាជនកម្ពុជា ដែលកាន់អំណាច តាំងពី៣៩ឆ្នាំ និងលោក ហ៊ុន សែន ដែលកាន់តំណែង ជានាយករដ្ឋមន្ត្រី តាំងពី​៣៣​ឆ្នាំមកនោះ នឹងឈ្នះការបោះឆ្នោតលើកនេះ យ៉ាងងាយស្រួល ដោយសារតែអតីតគណបក្សកុម្មុយនីស្ដ៍ និងអតីតមេកងខ្មែរក្រហម គ្មានគូប្រជែង​ដែលមាន​កម្លាំង​ប្រកៀកប្រកិតគ្នា។ នេះ បើទោះជាគេបានឃើញថា មានគណបក្សចំនួន​១៩ផ្សេងទៀត បានចូលរួមប្រកួតប្រជែង នៅក្នុងការបោះឆ្នោតក៏ដោយ។

គណបក្សសង្គ្រោះជាតិ ដែលជាគណបក្សប្រឆាំងដ៏សំខាន់ និងប្រកបដោយសក្ដានុពល ត្រូវបានរដ្ឋាភិបាលរបស់លោក ហ៊ុន សែន រំលាយចោល កាលពីខែវិច្ឆិកាកន្លងទៅ ខណៈប្រធានគណបក្ស លោក កឹម សុខា ត្រូវបានចាប់ឃុំខ្លួន អតីតប្រធានគណបក្ស លោក សម រង្ស៊ី បាននិរទេសខ្លួន និងមន្ត្រីគណបក្ស១១៨នាក់ ត្រូវបានហាមឃាត់ មិនឲ្យធ្វើនយោបាយចំនួន៥ឆ្នាំ។

ប៉ុន្តែចលនាសង្គ្រោះជាតិ​ដ៏លេចធ្លោ ដែលទើបបង្កើតឡើង នៅចុងខែមករាកន្លងទៅ និងដែលដឹកនាំដោយលោក សម រង្ស៊ី គូបដិបក្ខនយោបាយ ដ៏ស្រួចស្រាវរបស់លោក ហ៊ុន សែន បានធ្វើបាតុកម្មព្រោងព្រាត​​នៅក្រៅប្រទេស សឹងតែនៅគ្រប់ជ្រុង នៃពិភពលោក ដើម្បីអំពាវនាវ​ឲ្យពលរដ្ឋខ្មែរ​ក្នុងស្រុក កុំចេញទៅបោះឆ្នោត ដែលបង្ហាញពីសញ្ញា នៃការជំទាស់ទៅនឹងការដឹកនាំ ក៏ដូចជាជំទាល់រាល់វិធានការ កណ្ដាប់ដៃដែកទាំងឡាយ ពីសំណាក់របបដឹកនាំ របស់នាយករដ្ឋមន្ត្រីបីទសវត្សន៍ជាងរូបនេះ។

ការបោះឆ្នោតនេះទៀតសោធ ក៏រងការរិះគន់ពីសំណាក់សហគមន៍អន្តរជាតិដែរ ជាពិសេសបណ្ដាប្រទេស នៅបស្ចឹមលោក ខណៈលោក អង់តូនីញ៉ូ ហ្គូតេរ៉េស (Antonio Guterres) អគ្គលេខាធិការអង្គការសហប្រជាជាតិ បាន​ព្រមានរដ្ឋាភិបាល​លោក ហ៊ុន សែន ពីភាពចាំបាច់នៃការលើកកំពស់ ក្នុងការគោរព​​តាមបទដ្ឋាន​អន្តរជាតិ ទាក់ទងនឹងសិទ្ធិមនុស្ស និងជាពិសេសត្រូវធានា ឲ្យគ្រប់តួអង្គ នៃក្រុមសង្គមស៊ីវិល និងក្រុមគណបក្សនយោបាយ អាចអនុវត្តន៍​សិទ្ធិប្រជាធិបតេយ្យ​របស់ពួកគេ បានដោយសេរី៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...