អតីតរដ្ឋមន្ត្រីការបរទេសនៃកម្ពុជាប្រជាធិបតេយ្យ ដែលមានអាយុ៨៧ឆ្នាំ លោកអៀង សារី កំពុងស្ថិតក្នុងស្ថានភាព​សុខភាពចុះខ្សោយខ្លាំង។ នេះបើតាមមេធាវីរបស់លោក ប្រកាសអោយដឹងកាលពីថ្ងៃពុធទី០៦ខែមិនានេះ។ សេចក្ដី​ប្រកាសរបស់មេធាវី ការពារក្ដីអោយលោកអៀង សារី បានធ្វើអោយមានមកវិញ នូវការព្រួយបារម្ភទាំងឡាយ ដែលបាន​គិតថា អតីតមេដឹកនាំចំណាស់ៗ ទាំងបីនាក់ អាចនឹងស្លាប់បាត់បង់ជីវិត នៅមុនពេលត្រូវបានវិន្និច្ឆ័យទោស។

លោកអៀង សារី (រូបកណ្ដាល) នៅក្នុងសវនាកាត់ក្ដី។ រូបថតរបស់សាលាក្ដី។

អៀង សារី ត្រូវបានសាលាក្ដីសម្រាប់កាត់ទោសមេដឹកនាំខ្មែរក្រហម ចោទពីបទប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ ជាមួយនឹងអតីតប្រមុខរដ្ឋ លោក ខៀវ សំផង អាយុ៨១ឆ្នាំ និងបងធំទី២ អតីតមេ​មនោគមវិជ្ជា លោក នួន ជា អាយុ៨៦ឆ្នាំ។

លោកអង់ ឧត្តម បាននិយាយថា «សុខភាពរបស់គាត់ចុះខ្សោយខ្លាំង» ដោយបានបញ្ជាក់ថា លោកអៀង សារី កូនក្ដីរបស់​លោកទទួលទានអ្វីលែងបាន និងចេះតែក្អួតយ៉ាងច្រើន។ អ្នកទទួលខុសត្រូវម្នាក់ នៃរដ្ឋបាលរបស់សាលាក្ដី បានបដិសេធ មិនធ្វើអត្ថាធិប្បាយជុំវិញបញ្ហានេះទេ។ កាលពីខែមករា ជនជាប់ចោទពីរអ្នកផ្សេងទៀត បានចូលសម្រាក នៅក្នុងមន្ទីរពេទ្យ​រួចម្ដងមកហើយ។

រីឯអ្នកទទួលខុសត្រូវទី៤ម្នាក់ទៀត នៅក្នុងរបបអាវខ្មៅនេះ លោកស្រី អៀង ធីរិទ្ធិ ភរិយាលោក អៀង សារី នៅមានជីវិត​នៅ​ឡើយ តែអតីតរដ្ឋមន្ត្រីសង្គមកិច្ច និងស្ត្រីទីមួយនៃរបបរូបនេះ បាន«បាត់បង់សតិ» ហើយត្រូវបានប្រកាសថា មិនគ្រប់​លក្ខណៈតាមផ្លូវច្បាប់ សម្រាប់ប្រឈមនឹងការកាត់ទោស។

ការព្រួយបារម្ភមានកាន់តែច្រើនទៅៗ ដែលថាជនជាប់ចោទទាំងនេះ អាចនឹងស្លាប់បាត់បង់ជីវិត ដោយមិនបានឆ្លើយពីការ​ទទួលខុសត្រូវ លើ«តួនាទី»របស់ខ្លួន ក្នុងការស្លាប់របស់ប្រជាជនកម្ពុជា ប្រមាណជា២លាននាក់ ចន្លោះពីឆ្នាំ១៩៧៥ ដល់​ឆ្នាំ១៩៧៩។

លោកជុំ ម៉ី អ្នករួចរស់មានជីវិតម្នាក់ ពីអតីតពន្ធនាគារទួលស្លែង បានថ្លែងថា «ខ្ញុំតែងតែភ័យបារម្ភថា ពួកជនជាប់ចោទ​ទាំងនេះ អាចនឹងស្លាប់ឆាប់ៗនេះ។ បើពួកគាត់ស្លាប់ ដំណើរការកាត់ទោស នឹងបញ្ឈប់នៅកណ្ដាលទី ហើយវាគ្មាន​ន័យ​អ្វីសម្រាប់យើងទេ។»។ អតីតអ្នកទោស របស់មន្ទីសរ២១ អាយុ៨២ឆ្នាំរូបនេះ បន្តការព្រួយបារម្ភថា «ខ្ញុំមិនសប្បាយចិត្តទេ បើពួកគាត់ស្ងាត់មាត់។ ខ្ញុំគ្រាន់តែចង់អោយពួកគាត់ ទទួលស្គាល់ ទោសកំហុសរបស់ខ្លួន តែប៉ុណ្ណោះ។»

ជនជាប់ចោទទាំងបី មិនដែលយល់ព្រមថា នឹងសហការជាមួយតុលាការទេ។ តាំងពីកកើតនៅឆ្នាំ២០០៦មក តុលាការ​ចម្រុះរវាង រដ្ឋាភិបាលខ្មែរ និងអង្គការសហប្រជាជាតិនេះ បានចេញសាលក្រមតែមួយគត់ ដាក់ទោសអតីប្រធាន​ពន្ធនាគារ​ទួលស្លែង ឬមន្ទីសរ២១ ឈ្មោះ​ កាំ ហ្គេចអៀវ ហៅឌុច ជាប់​ពន្ធនាគារអស់មួយជីវិត៕

-----------------------------------------------
ដោយ ៖ កេសរកូល - ភ្នំពេញ ថ្ងៃទី០៧ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ