បុគ្គលិកធ្វើការនៅសាលាក្ដីខ្មែរក្រហម បានគម្រាមសារជាថ្មីទៀត នៅថ្ងៃព្រហស្បត្តិ៍ទី២៩ខែសីហានេះ ថាពួកខ្លួននឹងធ្វើ​កូដកម្ម ដើម្បីទាមទារប្រាក់ខែរបស់ពួកគេ ខណៈដែលអគ្គលេខាធិការអង្គការសហប្រជាជាតិ បានអំពាវនាវឲ្យប្រទេស​ម្ចាស់ជំនួយទាំងអស់ ផ្ដល់ជំនួយបន្តទៅទៀតទៅសាលាក្ដីវិសមញ្ញ ដែលទំនងជាគ្មានអនាគតច្បាស់លាស់នេះ។

សាលាក្ដី នៅពេលបើកសវនាការកាត់ទោស។ រូបថតរបស់សាលាក្ដី។

អ្នកនាំពាក្យរបស់សាលាក្ដី លោកនេត្រ ភត្រា បានថ្លែងបញ្ចាក់ប្រាប់ទីភ្នាក់ងារសារព័ត៌មានបារាំងថា «បុគ្គលិកប្រមាណ​ជាជាង១០០នាក់ នឹងឈប់ចូលធ្វើការនៅថ្ងៃទី១ខែសីហាខាងមុខ រហូតដល់ដំណោះស្រាយមួយត្រូវបានគេរកឃើញ និង​ពួកគេទទួលបានប្រាក់ខែ ដែលមិនបានបើករហូតមកដល់ពេលនេះ»។ លោកបន្ថែមថា ភាគច្រើននៅក្នុងចំណោមនោះ បានមកធ្វើការ ដោយមិនមានប្រាក់ខែតាំងពីខែមិថុនាមក។

អ្នកនាំពាក្យរូបនេះ បាននិយាយឲ្យដឹងទៀតថា ទឹកប្រាក់ដែលនៅខ្វះមានប្រមាណជា ៣លានដុល្លាអាមេរិក សម្រាប់ឲ្យ​សាលាក្ដីមានដំណើរការសម្រាប់ឆ្នាំ២០១៣នេះ ហើយទឹកប្រាក់ទាំងនោះ ទំនងជាសាលាក្ដីកំពុងរងចាំពីប្រទេស អូស្ត្រាលី ជប៉ុន និងពីសហគមន៍អ៊ឺរ៉ុប។

កាលពីខែមិនាកន្លងទៅ បុគ្គលិកជាតិរបស់សាលាក្ដី បានធ្វើកូដកម្មនេះម្ដងរួចហើយ ហើយថែមទាំងបានធ្វើឲ្យសាលាក្ដី ជួបនូវភាពរអាក់រអួលក្នុងរយៈពេលជិត២សប្ដាហ៍។ បុគ្គលិកជាតិដែលជួបផលប៉ះពាល់នោះ មានចំនួនប្រមាណ​ជា​២៥០នាក់ រាប់តាំងពីអ្នកបើកបររថយន្ដ អ្នកបកប្រែភាសា រហូតដល់ចៅក្រមនោះផង។

អគ្គលេខាធិការអង្គការសហប្រជាជាតិ លោក បាន គីមូន (Ban Ki-moon) បានថ្លែងឲ្យដឹង កាលពីថ្ងៃពុធទី២៨ខែសីហាថា «តុលាការនេះ បានស្គាល់នូវភាពជោគជ័យរបស់ខ្លួន គួរឲ្យកត់សម្គាល់ ដោយបានកាត់ទោសឧក្រិដ្ឋជន​នៃរបប​ប្រល័យ​ពូជសាសន៍ខ្មែរក្រហម។ តែក្នុងពេលបច្ចុប្បន្ននេះ តុលាការនេះកំពុងជួបវិបត្តិ។» លោកអគ្គលេខាធិការ ក៏បានអំពាវ​នាវ​ស្វែងរកជំនួយបន្ថែមទៀត ដើម្បីឲ្យសាលាក្ដីកូនកាត់មួយនេះ អាចបន្តជីវិតបានតទៅទៀត។ តាំងពីបង្កើតឡើងនៅ​ឆ្នាំ​២០០៦ សាលាក្ដីវិសមញ្ញដែលកើតពីកិច្ចព្រមព្រៀងរវាងអង្គការសហប្រជាជាតិ និងរដ្ឋាភិបាលកម្ពុជាមួយនេះ តែងតែ​ជួប​ប្រទះ នូវវិបត្តិខ្វះថវិការជាញឹកញាប់។

ប្រជាជនកម្ពុជាប្រមាណជា១,៧លាននាក់ បានស្លាប់បាត់បង់ជីវិត នៅក្នុងរបបខ្មែរក្រហមនេះ រាប់ចាប់​តាំងពីឆ្នាំ១៩៧៥ មកទល់នឹងឆ្នាំ១៩៧៩។ ប្រជាជនដែលរួចរស់ មានជីវិតពីរបបនេះ ក៏ត្រូវរងគ្រោះនឹងភាពហេវហត់ អស់កម្លាំង ខូចខាត​ទ្រព្យសម្បត្តិ ព្រាត់ប្រាស់គ្រួសារ និងមានវិបត្តិផ្លូវចិត្តយ៉ាងធ្ងន់ធ្ងរ។

ស្ថានភាពសុខភាព របស់ជនជាប់ចោទ ដែលសុទ្ធសឹងជាមេដឹកនាំគ្រាក់ៗនៃកម្ពុជាប្រជាធិបតេយ្យ និងមានវ័យកាន់តែ​ជរាទាំងនេះ ធ្វើអោយមានការបារម្ភជាទូទៅ ពីយុត្តិធម៌​ចេញការកាត់ក្ដីរបស់សាលាក្ដីនេះ។ បុរសទាំងនេះ អាចនឹងស្លាប់​បាត់បង់ជីវិត មុនការកាត់ក្ដីត្រូវបញ្ចប់ ហើយនឹងយក​ទៅជាមួយ នូវរាល់ការពិតទាំងឡាយ ដែលកើតមាននៅក្នុង​អំឡុង​ពេល នៃការកាន់អំណាចរបស់ខ្លួន។ តាំងពីសាលាក្ដី​នេះបានកើតចេញជារូបរាងមក មានសាលក្រមតែមួយគត់ ដែល​តុលាការបានសម្រេចកាត់ទោស អតីតមេគុកទួលស្លែង អោយជាប់ពន្ធនាគារអស់មួយជីវិត៕

-----------------------------------------------
ដោយ ៖ កេសរកូល - ភ្នំពេញ ថ្ងៃទី២៩ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ