អេង ឆៃអ៊ាង និយាយពីរឿងប្លែកៗ ករណីចាប់ខ្លួន ញឹក ប៊ុនឆៃ
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០៣ សីហា ២០១៧
- កែប្រែចុងក្រោយ: August 03, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ដំណឹងដែលបង្កការភ្ញាក់ផ្អើល នៅរសៀលថ្ងៃព្រហស្បត្តិ៍ទី ៣ ខែសីហានេះ គឺការចាប់ខ្លួនលោក ញឹក ប៊ុនឆៃ អតីតឧត្ដមសេនីយ៍យោធា មកពីគណបក្សរាជនិយក ហ្វុនស៊ិនប៉ិច និងបច្ចុប្បន្ន ជាប្រធានគណបក្សរួបរួមជាតិ។ លោក ញឹក ប៊ុនឆៃ ដែលទើបត្រូវបានដកហូតតំណែង ពីទីប្រឹក្សារដ្ឋាភិបាល (មានថានៈស្មើឧបនាយករដ្ឋមន្ត្រី) ត្រូវបានឃាត់ខ្លួន នៅក្នុងសំនុំរឿង«ផលិតគ្រឿងញៀន»មួយ ក្នុងស្រុកភ្នំស្រួច ខេត្តកំពង់ស្ពឺ ដែលបានកើតឡើង តាំងពីឆ្នាំ២០០៧ និងកំពុងត្រូវបានសាកសួរ នៅក្នុងស្នងការរាជធានីភ្នំពេញ។
ការចាប់ខ្លួននេះ បានទទួលប្រតិកម្មដំបូងបំផុត ពីលោក អេង ឆៃអ៊ាង អនុប្រធានគណបក្សសង្គ្រោះជាតិ ដោយបានហៅរឿងរ៉ាវ ដែលកើតឡើង ក្នុងរយៈពេល២ខែចុងក្រោយ ទៅលើលោក ញឹក ប៊ុនឆៃ ថាជារឿងដ៏ចម្លែក។ មេដឹកនាំគណបក្សប្រឆាំងរូបនេះ ដែលជាមនុស្សស្និត នឹងអតីតប្រធានគណបក្ស លោក សម រង្ស៊ី នោះ បានសរសេរ នៅលើគណនេយ្យហ្វេសប៊ុក របស់លោក ពន្យល់ឡើងពីរចំណុចថា៖
«- កាលពីថ្ងៃទី៣ ខែមិថុនា ២០១៧ [លោក ញឹក ប៊ុនឆៃ] ត្រូវសង្ស័យថាក្បត់សម្ព័ន្ធ [ភាពជាមួយគណបក្សប្រជាជនកម្ពុជា] ដោយសារ[បាន]ទូរស័ព្ទមកខ្ញុំ ហើយត្រូវបានដកតំណែង [ពី]ទីប្រឹក្សារាជរដ្ឋាភិបាល។»
«- ថ្ងៃទី៣/០៨/២០១៧ [លោក ញឹក ប៊ុនឆៃ] ត្រូវសមត្ថកិច្ចចាប់ខ្លួន ពីបទជាប់ពាក់ព័ន្ធនឹងការផលិតគ្រឿងញៀន កាលពីឆ្នាំ២០១២។»
លោក អេង ឆៃអ៊ាង បានលើកឡើងថា៖ «ចេះតែមានរឿងប្លែកៗ នៅស្រុកខ្ញុំ»។
រឿងរ៉ាវកើតឡើងតាំងពី១០ឆ្នាំមុន...
ការឃាត់-នាំខ្លួនលោក ញឹក ប៊ុនឆៃ ត្រូវបានមន្ត្រីនគរបាលអះអាង ថាបានធ្វើឡើង នៅក្នុងសំណុំរឿងខាងលើ ដែលកើតឡើង នៅឆ្នាំ២០១២។ តែបើតាមដីការឲ្យឃាត់-នាំខ្លួន ចេញដោយលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបញ្ជាក់ថា សំណុំរឿងនេះ កើតឡើងតាំងពីឆ្នាំ២០០៧មកម្លេះ ពោលគឺអស់រយៈពេល១០ឆ្នាំ មកហើយ។
កាលពីខែមិថុនាកន្លងទៅ តាមការទូលស្នើ ពីសំណាក់លោកនាយករដ្ឋមន្ត្រី ហ៊ុន សែន ព្រះមហាក្សត្រកម្ពុជា បានឡាយព្រះហស្តលេខា លើព្រះរាជក្រឹត្យ ដកតំណែងលោក ញឹក ប៊ុនឆៃ ជាទីប្រឹក្សារដ្ឋាភិបាល ដែលមានឋានៈស្មើឧបនាយករដ្ឋមន្ត្រី។ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានពន្យល់ពីការដកតំណែងនេះ ថាលោក ញឹក ប៊ុនឆៃ បានក្បត់សម្ព័ន្ធភាព ជាមួយគណបក្សប្រជាជនកម្ពុជា ទៅចាប់ដៃជើង ជាមួយគណបក្សប្រឆាំង។
នៅពេលនោះ លោក អេង ឆៃអ៊ាង បានចេញមកអះអាងថា លោក ញឹក ប៊ុនឆៃ បានទូរស័ព្ទមកលោក កាលពីមុនការបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៤ ជុំវិញការស្នើឲ្យអ្នកគាំទ្រ របស់គណបក្សខ្មែររួបរួមជាតិ បោះឆ្នោតឲ្យគណបក្សសង្គ្រោះជាតិ នៅក្នុងឃុំដែលគណបក្សខ្មែររួបរួមជាតិ មិនមានលទ្ធភាព ដាក់បេក្ខជនឲ្យឈរឈ្មោះ។
តែការលើកឡើងនោះ ត្រូវបានលោក ញឹក ប៊ុនឆៃ បដិសេធថា ជាការភ័ន្ដច្រឡំ។
យ៉ាងណាក៏ដោយ ក៏តាំងពីពេលនោះមក សមាជិកគណបក្សខ្មែររួបរួមជាតិ ជាច្រើននាក់ បាត់បង់តំណែង ពីក្នុងជួររដ្ឋាភិបាល ហើយប្រព័ន្ធផ្ទៃក្នុង របស់គណបក្សខ្មែររួបរួមជាតិ បានរង្គោះរង្គើរ ដោយសមាជិកគណបក្សមួយចំនួន បានចាកចេញទៅចុះចូល ជាមួយគណបក្សប្រជាជនកម្ពុជា និងគណបក្សហ្វុនស៊ីនប៉ិច។
សម្រាប់អ្នកវិភាគនយោបាយវិញ បានយល់ថា ការចាប់ខ្លួនលោក ញឹក ប៊ុនឆៃ នៅពេលនេះ ជាសារព្រមានមួយ ទៅកាន់មន្ត្រីផ្សេងទៀត ដែលមានបំណង ចង់ផ្ដាច់ខ្លួន ពីគណបក្សកាន់អំណាច ទៅចូលរួមជាមួយគណបក្សប្រឆាំង៕