បន្ទាប់ពីចេញ ពីប្រជុំនៅរដ្ឋសភា លោក គង់ សភា តំណាងរាស្រ្តមណ្ឌលស្វាយរៀង និងលោក ញ៉យ ចំរើន តំណាងរាស្រ្តមណ្ឌលកំពង់ចាម មកពីគណបក្សសង្គ្រោះជាតិ ត្រូវបានក្រុមបាតុករច្រើននាក់ វាយដំទាត់ធាក់  រហូតរងរបួសជាទំងន់។

តាមរូបភាពជាវីដេអូ ដែលថតដោយអ្នកសារព័ត៌មាន នៅនឹងកន្លែងកើតហេតុ បានបង្ហាញថា ក្រុមបាតុករបាន បើកទ្វារថយន្ត ហើយចូលទៅចាប់អូល អ្នកតំណាងរាស្ត្រម្នាក់ ពីក្នុងចំណោមអ្នកទាំងពីរ ទម្លាក់ពីក្នុង​រថយន្ត ហើយបាននាំគ្នាព្រួតវាយ យ៉ាងចាស់ដៃ។ ហេតុការណ៍បានកើតឡើង បន្ទាប់ពីអ្នកតំណាងរាស្ត្រទាំងពីររូប បាន​ជិះ​រថយន្ដ​ចេញ មកដល់​មាត់​របងច្រកចេញ នៃរដ្ឋសភាជាតិ នាវេលាម៉ោងជាង១២ថ្ងៃត្រង់ ថ្ងៃទី២៦ ខែតុលា​នេះ។

លោក ញ៉យ ចំរើន បានរងគ្រោះរហូតដល់សន្លប់ ដេកដួលនៅលើថ្នល់ ដោយគ្មានក្រុមមន្ត្រីសមត្ថកិច្ចណាម្នាក់ បានចូលជួយអន្តរាគមន៍ឡើយ ខណៈក្រុមបាតុករដៃដល់ បានរត់គេចខ្លួនអស់ ដោយសុវត្ថិភាព។

បន្ទាប់ពីហេតុការណ៍នេះ អ្នកតំណាងរាស្ត្រទាំងពីររូប ត្រូវបានបញ្ជូនទៅសង្គ្រោះបន្ទាន់ នៅក្នុង​ទីស្នាក់ការ​កណ្ដាល នៃគណបក្សសង្គ្រោះជាតិ។

លោក ហ៊ូ វ៉ាន់ អ្នកតំណាងរាស្ត្រភ្នំពេញ មកពីគណបក្សសង្គ្រោះជាតិ មិនបានឆ្លើយ នឹងការសាកសួរលំអិត របស់ទស្សនាវដ្តីមនោរម្យ.អាំងហ្វូ ទេ ដោយបានលើកហេតុផល ថារវល់។ រហូតមកទល់ នឹងម៉ោង២រសៀល ថ្ងៃទី២៦ ខែតុលានេះ ទស្សនាវដ្តី ក៏មិនអាចសុំការបញ្ជាក់ករណីនេះ ពីលោក វ៉ាត ម៉ានី លោក ប្រាក់ ហាក់ និង​លោក ទិត្យ ត្រៃវេទ ដែល ជាតំណាងបាតុករ ចុះហត្ថលេខាក្នុង«ញត្តិស្នើសុំ»ទម្លាក់លោក កឹម សុខា ពី​តំណែង​ជាអនុប្រធានទីមួយ នៃរដ្ឋសភានោះដែរ ដោយគ្មានអ្នកទទួលទូរសព័្ទ និងមិនអាចភ្ជាប់​ទំនាក់ទំនងបាន។

ទំព័រហ្វេសប៊ុក របស់ប្រធានគណបក្សសង្គ្រោះជាតិ លោក សម រង្ស៊ី បានលើកយករូបថតប៉ុន្មានសន្លឹក ទាក់​ទងនឹងករណីនេះ មកបង្ហោះ ប៉ុន្តែបានលប់ចេញទៅវិញ នៅបន្តិចក្រោយមក។ អមនឹងរូបថតនោះ មាន​សរសេរ​ថា៖ «នៅម៉ោងប្រមាណ១២ និង៣០នាទី ថ្ងៃនេះ តំណាងរាស្ត្រគណបក្សសង្គ្រោះជាតិពីររូប គឺលោក ញ៉យ ចំរើន និងលោក គង់ សភា ត្រូវបានក្រុមបាតុករ របស់គណបក្សប្រជាជនកម្ពុជា ព្រួតគ្នាវាយយ៉ាងដំណំ នៅ​មុខ​មន្ទីររដ្ឋសភាធ្វើឲ្យរងរបួស ខូចខាតរថយន្ត និងបាត់សម្ភាមួយចំនួនទៀត ក្នុងរថយន្ត បន្ទាប់ពីពួកគាត់​ចេញ​ពី​ប្រជុំ។»៕