នគរបាលអង់គ្លេស នៅរសៀលថ្ងៃព្រហស្បត្តិ៍ បានសម្រេចចិត្តបំបែកភាពមន្ទិល ចំពោះអត្តសញ្ញាណ របស់​ភេរវករ ដែល​បាន​វាយ​ប្រហារ សម្លាប់មនុស្សបីនាក់ និងធ្វើឲ្យរបួសមនុស្សច្រើននាក់ នៅលើស្ពាន «Westminster» និងនៅមុខ​អាគារ​រដ្ឋសភា​ជាតិ កាលពីល្ងាចថ្ងៃពុធ​កន្លងមក។ ជនបង្ករូប​នេះ មាន​ឈ្មោះ «Khalid Masood» អាយុ​៥២ឆ្នាំ កើត​នៅ​ក្នុង​តំបន់ «Kent» ស្ថិតនៅភាគអាគ្នេយ៍ នៃចក្រភពអង់គ្លេស។

សេចក្ដីប្រកាសព័ត៌មាន របស់នគរបាលអង់គ្លេស បានឲ្យដឹង នៅថ្ងៃព្រហស្បត្តិ៍ថា «Khalid Masood» រស់​នៅចុង​ក្រោយ​បង្អស់ នៅ​ក្នុង​តំបន់ «West Midlands» ស្ថិតនៅភាគ​កណ្ដាល នៃចក្រភព។ បុរសវ័យ​កណ្ដាល​រូប​នេះ មិន​ស្ថិត​ក្រោម​ការស៊ើប​អង្កេតណា​មួយ ពីសំណាក់​នគរបាល​នោះទេ។ ចារកម្មអង់គ្លេស​ក៏ពុំមាន​ដំណឹង​ណា​មួយ ពីជនម្នាក់​​នេះ ពាក់ព័ន្ធនឹងគម្រោង ឬការ​ដឹកនាំ ធ្វើភេរវកម្មនោះ​ដែរ។

ផ្ទុយទៅវិញ ជននេះធ្លាប់រងការចោទប្រកាន់ ជាច្រើនដង ទាក់ទងនឹងការកាន់អាវុធខុសច្បាប់ និង​បទ​ល្មើស​វាយ​តប់ ប្រើ​ហិង្សា ក្នុងពេល​កន្លងមក។ សេចក្ដីប្រកាសព័ត៌មាន បាន​សរសេរ​ឲ្យ​ដឹង​ថា៖ «នគរបាល​បាន​ស្គាល់​ជន​នេះ តាម​រយៈ​ការផ្ដន្ទាទោស​មួយចំនួន ទាក់ទងនឹង​ការប្រើអំពើហិង្សា (...) ការកាន់​អាវុធ​ខុស​ច្បាប់ និង​ការ​បង្ក​ឲ្យ​ខូច​សណ្ដាប់​ធ្នាប់​សាធារណៈ។ (...) ជននេះ មិនដែលត្រូវបាន​ផ្តន្ទាទោស ទាក់ទង​នឹង​បទល្មើស​ភេរវនិយម​នោះ​ទេ។»។

ក្នុងរសៀលថ្ងៃព្រហស្បត្តិ៍ដដែល ក្រុម​រដ្ឋ​អ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) បាន​ចេញមុខ​មកប្រកាស​ទទួលស្គាល់ ថាជនបង្កខាង​លើ គឺជាយុទ្ធជន​ម្នាក់ របស់ពួកគេ។ សេចក្ដី​ប្រកាស​ព័ត៌មាន​មួយ របស់ទីភ្នាក់ងារ «Amaq» ដែលជាម៉ាស៊ីន​ឃោសនា របស់អង្គការ​ភេរវនិយម​មួយ​នេះ បាន​ចេញ​ផ្សាយ​ឲ្យ​ដឹង​ថា៖ «អ្នកវាយប្រហារ នៅមុខរដ្ឋសភាអង់គ្លេស កណ្ដាល​រាជធានីឡុង គឺជា​យុទ្ធជន​ដ៏​អង់អាច​ របស់​ក្រុម​រដ្ឋអ៊ីស្លាម ហើយប្រតិបត្តិការនេះ ត្រូវបាន​ដឹកនាំធ្វើ ដើម្បីឆ្លើយតប​ទៅនឹង​ការអំពា​វនាវ ឲ្យ​ធ្វើការ​សង​សឹក ទៅលើ​ក្រុម​ប្រទេសសម្ព័ន្ធមិត្ត (Editor's Note: ដែលបានធ្វើប្រតិបត្តិការយោធា ប្រឆាំងក្រុម​រដ្ឋអ៊ីស្លាម ​នៅ​ក្នុង​ប្រទេស​ស៊ីរី និងអៀរ៉ាក់)»។

នេះ ជាការវាយប្រហារ លើកដំបូងបង្អស់ នៅលើទឹកដីចក្រភពអង់គ្លេស ដែលក្រុមរដ្ឋអ៊ីស្លាម បានចេញ​មុខ​ប្រកាស​ទទួល​ស្គាល់។ ក្នុងពេលកន្លងមក ក្រុមភេរវនិយមមួយនេះ បានអំពាវនាវ ឲ្យមានការសង​សឹក ឬ​ការ​ងើប​ឡើង​ប្រយុទ្ធ ប្រឆាំង​នឹងក្រុម​ប្រទេស​សម្ព័ន្ធមិត្ត ដែលបានចូលរួម ក្នុងប្រតិបត្តិការ​យោធា​​កំទេច​ក្រុម​ខ្លួន ដែល​បាន​មក​តាំង «ទឹកដី​ព្រះ​ជាម្ចាស់» របស់ពួកគេ នៅក្នុង​ប្រទេសស៊ីរី និងប្រទេស​អៀរ៉ាក់។

ចាប់ខ្លួនជនសង្ស័យ សរុបបាន៩នាក់...

នៅក្នុងយប់ថ្ងៃពុធ ចូលមកព្រឹកថ្ងៃព្រហ្បត្តិ៍ នគរបាលអង់គ្លេស ដែលជឿថា ជនខាងលើ​បាន​ធ្វើ​ភេរវកម្ម​នេះ តែ​ម្នាក់​ឯង​នោះ បានតាមប្រមាញ់ ស្វែង​រក​ចាប់​ខ្លួន បានជនសង្ស័យ៨នាក់ ពី៦កន្លែងផ្សេងគ្នា នៅលើ​ផ្ទៃប្រទេស ជា​ពិសេស​នៅ​រាជធានី ឡុងដ៍ និង​នៅ​ក្រុង «Birmingham» ដែលស្ថិត​នៅភាគ​ពាយ័ព្យ នៃរាជធានី ឡុងដ៍។ នៅ​ព្រឹក​ថ្ងៃសុក្រនេះ អាជ្ញាធរបានប្រកាស ឲ្យដឹងទៀតថា ជនពីរនាក់ទៀត ត្រូវបានចាប់ខ្លួនបន្ថែម ខណៈ​ស្ត្រី​មួយ​រូប ត្រូវ​បាន​ដោះលែង​វិញ។

អ្នកស្រី ថេរីសា មេ (Theresa May) នាយករដ្ឋមន្ត្រីអង់គ្លេស បានថ្លែងនៅមុខរដ្ឋសភាជាតិ កាលពី​ព្រឹក​ថ្ងៃ​ព្រហស្បត្តិ៍​ថា៖ «តាំងពីច្រើនឆ្នាំមកហើយ ជននេះធ្លាប់ត្រូវបានអង្កេត ដោយចារកម្មលើផ្ទៃប្រទេស របស់​ក្រសួង​មហាផ្ទៃ (Military Intelligence - section 5 ហៅកាត់ថា MI5) ទាក់ទងនឹងនឹង "អំពើ​ជ្រុល​និយម ដែល​មាន​ចរិត​​ហិង្សា"»។ ប៉ុន្តែអ្នកស្រី​បាន​អះអាង​បន្តថា នៅក្នុងអង្កេត នាពេលនោះ ជននេះ​គ្រាន់​តែជា តួអង្គ​បន្ទាប់​បន្សំ​ម្នាក់​​ប៉ុណ្ណោះ៕