ភេវរកម្មនៅ​ប៊ូស្តុន៖ ជន​​សង្ស័យ​ទី​ពីរ ត្រូវ​​បាន​ចាប់​ខ្លួន តែ​របួស​ពេញ​ខ្លួន

ការចាប់ខ្លួនជនសង្ស័យទីពីរ ដែលជាប់ទាក់ទងនឹងភេវរកម្មនៅប៊ូស្តុន ត្រូវបានធ្វើនៅម៉ោងប្រមាណជា៨និង៤៥នាទី យប់​ថ្ងៃសុក្រទី១៩ខែមេសា នៅបន្ទាប់ពីប្រភពពីខាងអាជ្ញាធរបានបង្ហើបឲ្យដឹងថា ជននេះ បានទៅលាក់ខ្លួនក្នុងទូកមួយ ដែល​ចតនៅក្នុងសួនច្បារនៃគេហដ្ឋានមួយ នៅក្រុង វ័តធើថោន (Watertown)។
Loading...
  • ដោយ: សេក មនោរកុមារ
  • កែប្រែចុងក្រោយ: April 20, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ការចាប់ខ្លួនជនសង្ស័យទីពីរ ដែលជាប់ទាក់ទងនឹងភេវរកម្មនៅប៊ូស្តុន ត្រូវបានធ្វើនៅម៉ោងប្រមាណជា៨និង៤៥នាទី យប់​ថ្ងៃសុក្រទី១៩ខែមេសា នៅបន្ទាប់ពីប្រភពពីខាងអាជ្ញាធរបានបង្ហើបឲ្យដឹងថា ជននេះ បានទៅលាក់ខ្លួនក្នុងទូកមួយ ដែល​ចតក្នុងសួនច្បារនៃគេហដ្ឋានមួយ នៅក្រុង វ័តធើថោន (Watertown)។


ជនសង្ស័យទីពីរ ក្នុងសម្លៀកបំពាក់ជានិស្សិតទទួលសញ្ញាប័ត្រ។

ប្រភពដែលមិនបញ្ចេញឈ្មោះ បានពន្យល់ប្រាប់អ្នកសារព័ត៌មាន អោយដឹងពីបច្ចុប្បន្នភាពនៃស្ថានការណ៍ ដោយបញ្ជាក់​ថា ជនសង្ស័យដែលគេស្គាល់ថា មានឈ្មោះ ជ័កហារ ត្សាណី (Dzhokhar Tsarnaev) អាយុ១៩ឆ្នាំ ត្រូវបានចាប់ខ្លួន និង​មានរបួសធ្ងន់ជាប់ខ្លួន មិនដឹងថាជននេះ រស់ឬក៏ស្លាប់នោះទេ។ ទោះជាយ៉ាងណាក៏ដោយ ក្នុងពេលនេះ ជនសង្ស័យត្រូវ​បានបញ្ជូនទៅមន្ទីពេទ្យ និងដាក់ក្នុងការឃ្លាំមើល របស់នគរបាល។

សូមរំលឹកថា សភាពវិវត្តន៍ថ្មីៗ បានធ្លាក់ចុះបន្តមកទៀត នៅពេញមួយថ្ងៃសុក្រនេះ តែនៅម៉ោងប្រមាណជា៧យប់ ស្នូរ​កាំភ្លើង​បានលាន់លឺឡើង ហើយរថយន្ដជួយសង្គ្រោះ និងកងកម្លាំងប្រដាប់អាវុធ បានចល័តនៅតាមបណ្ដាផ្លូវនានា ពេញ​ទាំងក្រុងវ័តធើថោន។ ជាថ្មីម្ដងទៀត អាជ្ញាធរបានសុំទៅបណ្ដាជនរស់នៅ ក្នុងក្រុងនេះ ឲ្យសម្ងំនៅក្នុងលំនៅដ្ឋានរៀងៗ​ខ្លួន។

ហើយប្រហែលជាមួយម៉ោងក្រោយមកទៀត ក្នុងការថ្លែងទៅកាន់អ្នកសារព័ត៌មាន អាជ្ញាធររដ្ឋម៉ាស្សាឈូសេត និងក្រុង​ប៊ូស្តុន បានប្រាប់អោយដឹងពីការចាប់ខ្លួន ជនសង្ស័យទីពីររូបនេះ បន្ទាប់ពីបានតាមរុករកអស់រយៈពេលជាច្រើនថ្ងៃ និង​ត្រួតពិនិត្យក្រុងវ័តធើថោន អស់ពេញមួយថ្ងៃមក។ នៅក្នុងឱកាសនោះដដែល លោកអភិបាលរដ្ឋម៉ាស្សាឈូសេត ដើវាល់ ប៉ាទ្រីក (Deval Patrick) បានប្រាប់ទៅអ្នករស់នៅក្នុងក្រុង ថាអាចចេញពីលំនៅដ្ឋានបាន ប៉ុន្តែគប្បីត្រូវរក្សាការប្រុង​ប្រយ័ត្ន​ជាប់ជានិច្ច ព្រោះជនសង្ស័យដែលចាប់ខ្លួនបាន នៅតែជាជនម្នាក់ដែលមានគ្រោះថ្នាក់ជាទីបំផុត។ អាជ្ញាធរគិតថា នឹងរក្សាវត្តមានរបស់កងកម្លាំងប្រដាប់អាវុធ នៅក្នុងទីក្រុងនេះ ក្នុងមួយរយៈពេលខ្លីបន្ថែមទៀត ដើម្បីធានាឲ្យបាន នូវ​សភាពស្ងប់ស្ងៀមពិតប្រាកដ។

ដំបូងឡើយ អាជ្ញាធរគិតថា យុវជនជាជនជាតិឆេកឆិក មានសញ្ជាតិរ៉ូស្សី រូបនេះ ស្ថិតក្នុងក្រោលសេះមួយ នៅក្នុងក្រុង​វ័តធើថោន ដែលមានចម្ងាយ១៦គីឡូម៉ែត្រខាងលិចទីក្រុងប៊ូស្តុន។ រថពាសដែក និងឧទ្ធម្ភាគចក្រ បានធ្វើការត្រួតពិនិត្យ និងគ្រប់គ្រងលើសភាពការណ៍នេះយ៉ាងដិតដល់ ក្រោមការដឹកនាំពីនគរបាលសហព័ន្ធអេហ្វប៊ីអាយ (FBI)។ ប្រតិបត្តិការ​តាមប្រមាញ់ជនសង្ស័យទីពីរនេះ បានធ្វើពេញមួយថ្ងៃ បន្ទាប់ពីបានបាញ់សម្លាប់ ជនសង្ស័យទីមួយ កាលពីយប់ថ្ងៃ​ព្រហស្បត្តិ៍ទីកន្លងមក។

ដំណើរដើមទងខ្លះៗ

ជនសង្ស័យបងប្អូនបង្កើតទាំងពីរនាក់ ត្រូវបានសង្ស័យថា បានគម្រាមបុរសម្នាក់ នៅជិតសកលវិទ្យាល័យ និងបានបាញ់​ជាច្រើនគ្រាប់ សម្លាប់ភ្នាក់ងារនគរបាលម្នាក់ នៅយប់ថ្ងៃព្រហស្បត្តិ៍ ម៉ោងប្រមាណជា១០កន្លះ។ នគរបាលរូបនោះ​អាយុ​២៦ឆ្នាំ ត្រូវបានរកឃើញស្លាប់ នៅក្នុងរថយន្ថរបស់ខ្លួន។

ជនសង្ស័យទាំងពីរ ក៏ទំនងជាបានធ្វើអោយរបួសយ៉ាងធ្ងន់ធ្ងរ អ្នកធ្វើការក្នុងបណ្ដាញដឹកជញ្ជូនសាធារណៈម្នាក់ នៅពេល​ជាមួយគ្នានោះដែរ។ បន្ទាប់មកទៀត ជនសង្ស័យនេះ បានផ្ជុងកាំភ្លើងម្ចាស់រថយន្ត គម្រាមយករថយន្ដនោះមកបើក ដើម្បីរត់គេចខ្លួន ខណៈពេលកងនគរបាលបានបើកយុទ្ធនាការ តាមប្រមាញ់អ្នកដែលបានសម្លាប់សហសេវិករបស់ខ្លួន។ ដោយមានជំនួយពីឧទ្ធម្ភាគចក្រផង ជនសង្ស័យបានធ្វើឲ្យគេកត់សម្គាល់បាន ហើយការជួបប្រយុទ្ធតតាំងគ្នា ដោយអាវុធ និងគ្រាប់បែក នៅតាមដងផ្លូវក៏បានចាប់ផ្ដើមពីពេលនោះមក។

អាជ្ញាធរនិយាយថា ជនសង្ស័យទាំងពីរបានបោះបំផ្ទុះ គ្រាប់បែកជាច្រើនគ្រាប់ នៅពេលមានការប្រដេញគ្នានោះ រហូត​ដល់ទីក្រុងវ័តធើថោន។ ជនសង្ស័យទីមួយ អាយុ២៦ឆ្នាំ បានរងរបួសធ្ងន់នៅក្នុងពេលតតាំងគ្នានោះ តែជនសង្ស័យ​ទីពីរ​បានគេចខ្លួនរួច។ ក្រោយពីបានបញ្ជូនទៅដល់មន្ទីពេទ្យ គ្រូពេទ្យបាននិយាយថា ជនសង្ស័យទីមួយ បានស្លាប់ ដោយ​សារបានរងច្រើនកន្លែង នូវគ្រាប់កាំភ្លើង និងអំបែងគ្រាប់ផ្ទុះ៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៩ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...