បុគ្គលិកមួយរូប របស់ស្ថាប័នជាតិ «រូបិយវត្ថុ» របស់ប្រទេសកាណាដា ត្រូវបានតុលាការក្រុង «Ottawa» រក​ឃើញ​កាល​ពីថ្ងៃពុធ​សប្ដាហ៍មុន ថាមានទោស ពីបទ«លួចមាស» របស់ស្ថាប័នរបស់ខ្លួន។ បុគ្គលិកម្នាក់នេះ ជា​បុរស​ស្បែក​ខ្មៅឈ្មោះ «Lester Lawrence»។ រវាងពីខែវិច្ឆិកា ឆ្នាំ២០១៤ មកទល់នឹងខែមិនា ឆ្នាំ២០១៥ លោក «Lester Lawrence» បានលួចមាស​មានតម្លៃ​ជា​ទឹក​ប្រាក់ ប្រមាណជា១៨០ ០០០ដុល្លារ។

វិធីសាស្ត្រលួចមាស ដ៏អស្ចារ្យ!

នៅក្នុងរយៈពេលនោះ លោក «Lester Lawrence» អាយុ៣៥ឆ្នាំ តែងធ្វើការតែឯង នៅក្នុងរោងជាង​ចម្រាញ់​មាស ដែលដាក់ក្រោម​ការត្រួតពិនិត្យ ផ្នែកសន្តិសុខ​ដ៏ខ្ពស់បំផុត។ សឹងជារៀងរាល់ថ្ងៃ បុរសរូបនេះ តែង​លួច​មាស​​ដាក់​ក្នុង​ខ្លួន​ចំនួន ២១០ក្រាម យក​ចេញ​ទៅ។ អ្នកស៊ើបអង្កេតបានរកឃើញ ស្រោមដៃធ្វើ​ពី​សារជាតិ​​ជ័រទន់ជាច្រើន និង​​ប្រេង​រំអិល នៅក្នុងទូ ដាក់សម្ភារៈបុគ្គលិក​ផ្ទាល់ខ្លួន របស់លោក «Lester Lawrence»។

តាមពិតទៅ បុគ្គលិកកំហិលរូបនេះ បានប្រើរបស់របរខាងលើ ដើម្បីចាប់ញាត់កាសមាស ដាក់ចូល​ទៅ​ក្នុង​«រន្ធគូថ»​របស់ខ្លួន។ វាប្រាកដណាហើយថា នៅពេល​ចេញ​ពីធ្វើការម្ដងៗ ទ្វាត្រួតពិនិត្យលោហធាតុ របស់​មន្ត្រី​សន្តិសុខ បានលោតឲ្យសញ្ញាឡើង។ ប៉ុន្តែលោក «Lester Lawrence» បានពន្យល់ភ្នាក់ងារសន្តិសុខថា ទ្វា​ត្រួត​ពិនិត្យនោះ បានឲ្យសញ្ញាខុស។

មន្ត្រីធនាគារឆ្ងល់

រឿងរ៉ាវបានបែកធ្លាយ នៅពេលដែលបុរស «Lester Lawrence» តែងយកមូលប្បទានប័ត្រ ដែលមាន​ទឹក​ប្រាក់ ៧០០០ដុល្លារ មកដាក់នៅក្នុងគណនីធនារគាររបស់ខ្លួន ជាញឹកញាប់។  ជាពិសេសទៅទៀតនោះ មូលប្បទាន​ប័ត្រ​ទាំង​នោះ ត្រូវបានចេញ ដោយហាង​ទទួលទិញ​មាស​មួយ​កន្លែង ដែលស្ថិតនៅក្បែរនោះដែរ។ ហេតុការណ៍​នេះ បានបង្កជាចម្ងល់ ទៅដល់មន្ត្រីធនាគារ ឲ្យចោទជាសំនួរឡើង និងសម្រេចប្ដឹងនគរបាល​នៅ​ទី​បំផុត បន្ទាប់​ពី​មន្ត្រី​រូប​នោះ​ដឹងថា បុរសដែលយកមូលប្បទានប័ត្រមកដាក់ ជាបុគ្គលិករបស់ស្ថាប័ន «រូបិយវត្ថុជាតិ» របស់​ប្រទេស​កាណាដា៕

» បទយកការណ៍ របស់ទូរទស្សន៍កាណាដា ពីករណីដ៏ហួសចិត្តនេះ៖