ប្រធានគណបក្សអំណាចខ្មែរ លោក សួន សេរីរដ្ឋា បានយកព្រឹត្តិការណ៍នៃការបិតផ្លូវជាតិលេខ៥ របស់ពលរដ្ឋ កាលពីព្រឹកថ្ងៃអាទិត្យ ទី១៨ ខែកញ្ញា ឆ្នាំ២០១៦ម្សិលម៉ិញ មកធ្វើអត្ថាធិប្បាយ និងអំពាវនាវឲ្យពលរដ្ឋ ធ្វើការ​ក្រោក​ឡើង ដើម្បីតវ៉ាពីការធ្លាក់តម្លៃស្រូវ ដ៏គំហុកនេះ។ ការអំពាវនាវរបស់លោក បានធ្វើឡើង នៅមុន​មន្ត្រី​រដ្ឋាភិបាល លោក ផៃ ស៊ីផាន ចេញមុខមកព្រមាន ដល់នរណាក៏ដោយ ដែលយកហេតុការណ៍បិតផ្លូវនេះ ធ្វើការ​ញុះ​ញង់ បង្កចល្លាចល និងអសន្តិសុខសង្គម។

លោក សេរីរដ្ឋា បានសរសេរនៅលើទំព័រហ្វេសប៊ុករបស់លោកថា៖ «យើងជាកសិករ ត្រូវការតែម្យ៉ាងគាត់ គឺ​ការ​ធានានូវតំលៃកសិកផល ដែលពួកយើងផលិតបាន (ស្រូវ ដំឡូង ល្ពៅ និងផលដំណាំគ្រប់ប្រភេទ)។ បើ​រដ្ឋាភិបាល​នេះ អសមត្ថភាព គ្មានលទ្ធភាពដោះស្រាយរកទីផ្សាឲ្យ បងប្អូនទេ សូម​បងប្អូន​ប្រជា​កសិករ​ក្រោក​ឡើង​តវ៉ា ទាមទារឲ្យរដ្ឋាភិបាលនេះ ទទួលខុសត្រូវ ឲ្យខាងតែបានដាច់ខាត!»។

លោក សួន សេរីរដ្ឋា បានថ្លែងអំពាវនាវ ឲ្យពលរដ្ឋ​ក្រោក​ឡើង​តវ៉ា ដូច្នេះថា៖ «សូមប្រជាកសិករ ខេត្តភាគ​ខាង​លិច រួមគ្នាប្រើយុទ្ធនាការបិទផ្លូវជាតិលេខ ៥ ទាមទារតំលៃថ្លៃស្រូវទាំងអស់គ្នា! ទាមទារតម្លៃស្រូវ ឲ្យបាន​ចន្លោះ​ពី ១តោន ៣០០ដុល្លា ទៅ ៤០០ដុល្លា ទើបអាចទទួលយកបាន»។

ប៉ុន្តែសេចក្ដីអំពាវនាវ​របស់​លោក ទំនងជាបង្កក្ដីបារម្ភ ទៅដល់រដ្ឋាភិបាលដែលដឹកនាំ ដោយលោក ហ៊ុន សែន។ អ្នកនាំពាក្យ​ទីស្ដីការគណៈរដ្ឋមន្ត្រី លោក ផៃ ស៊ីផាន បានសរសេរប្រកាស នៅលើបណ្ដាញសង្គម ដោយ​មិន​ចំ​ឈ្មោះ ព្រមានទៅ​ «ជន ឬក្រុមទុច្ចរិត​ទាំងឡាយណា ដែលយករបៀបវារៈតម្លៃស្រូវនេះ ជាមធ្យោបាយគៀង​គរ ដើម្បីបង្ករភាពចលាចល ប្រឆាំងនឹងសណ្តាប់ធ្នាប់សង្គម និងត្រូវតែទទួលខុសត្រូវ ចំពោះមុខច្បាប់»។ មន្ត្រី​អ្នក​នាំ​ពាក្យ បានបន្តទៀតថា៖ «រដ្ឋាភិបាល​នឹងចាត់វិធានការ​ដ៏ម៉ឺងម៉ាត់ ចំពោះភាពញុះញ៉ុងនេះ»។

កាលពីព្រឺក​ថ្ងៃអាទិត្យ ថ្ងៃទី១៨ ខែកញ្ញា ឆ្នាំ២០១៦នេះ នៅ​វេលា​ម៉ោង​១០​ និង​៤៥​នាទី ពលរដ្ឋជាច្រើននាក់ បាន​នាំគ្នាបើក​គោ​យន្ត​​ដឹកស្រូវ យកមកចាក់ចោល នៅលើ​កំណាត់​ផ្លូវជាតិ​លេខ​៥ មុខ​សាលាឃុំ​កំពង់​ព្រៀង ស្រុក​សង្កែ ខេត្តបាត់ដំបង ​តវ៉ារឿងតម្លៃស្រូវធ្លាក់ថ្លៃ ដើម្បីជាប្រតិកម្ម ទៅនឹងការមិនអនុវត្តន៍ តាម​ចំណាត់​ការ​របស់​រដ្ឋាភិបាល ដែលអះអាងកាលពីមួយថ្ងៃមុន ថានឹង​ទម្លាក់​ថវិកាជាតិ​ប្រមាណជាង ​២០​លាន​ដុល្លា​អាមេរិក ​ដើម្បី​ទិញ​​ស្រូវ​​អង្ករ​​ពី​ប្រជា​​កសិករ ក្នុង១តោន តម្លៃលើសពី ៩៤ម៉ឺនរៀល។ ចំណាត់ការនោះ របស់រដ្ឋាភិបាល ត្រូវ​បាន​អះអាង​ថា បានធ្វើឡើង ​​ដើម្បី​ទប់ស្កាត់​​ការ​ធ្លាក់​ចុះ ​នៃ​តម្លៃ​ស្រូវ​អង្ករ។

ករណីនេះ ក៏ត្រូវបានលោក ផៃ ស៊ីផាន សរសេរទទួលស្គាល់ដែរ។ លោក សរសេរទៀតថា៖ «ព្រឹតិ្តការណ៍នេះ បានស្តែងនូវរលក នៃប្រតិកម្ម ដែលមិនឆ្លើយតប និងអ្វីដែលជាចំណុច សម្តេចអគ្គមហាសេនាបតីតេជោ ហ៊ុន សែន ក៏ដូចជា ក្រសួង ពាក់ព័ន្ធ បានប្រកាស កាលពីថ្ងៃសុក្រ ដែលនឹងទម្លាក់លុយជួយទិញយកស្រូវពី កសិករ​ផ្ទាល់។ ចំណាត់ការ កាលពីចុងសប្តាហ៍នេះ របស់សម្តេចនាយករដ្ឋមន្រ្តី ដែលលោកបានថ្លែង​ប្រកាស​ជា​សាធារណៈ កាលពីថ្ងៃសុក្រ​រួចស្រេច​មកហើយ នូវកិច្ចអន្តរាគមន៍ ជាបន្ទាន់ ចំពោះ​តម្លៃ​ស្រូវនេះ។»។

យ៉ាងណាក៏ដោយ ក៏ហេតុការណ៍បិតផ្លូវនេះ បានស្ងប់ស្ងាត់ទៅវិញហើយ បន្ទាប់ពីមានការចុះអន្តរគមន៍ ពី​សំណាក់​លោក ច័ន្ទ សុផល អភិបាលខេត្តបាត់ដំបង។ ប៉ុន្តែសម្រាប់លោក សួន សេរីរដ្ឋា នៅតែអះអាងទៀតថា៖ «តំលៃស្រូវ ត្រូវឈ្មួញ (ថៅកែយួន) វាយទម្លាក់រហូតដល់ ១ តោន ថ្លៃត្រឹម តែ ១៧០ដុល្លាអាមេរិក ក្នុងពេល​ដែល​អង្ករ​នៅ​ភ្នំពេញ មានតំលៃថ្លៃ រហូតដល់ចន្លោះ ៥០០​ដុល្លា ទៅ ៨៥០ដុល្លា ក្នុង ១ តោន! វា​អយុត្តិធម៌​ណាស់ សម្រាប់​ពួក​យើងជា កសិករ ដែលធ្វើស្រែហត់​ពេញ​មួយ​រដូវ ចំណាយទុនសន្ធឹក លក់បានតែតែ ១ តោន ១៧០ដុល្លា ទៅ ២០០ដុល្លា តែពួកឈ្មួញយួន និងបក្ខពួក គ្រាន់​តែ​ចំណាយ​ពេល ទិញ កិនចេញជាអង្ករ​ច្រក​ការ៉ុង យកមកដល់​ផ្សារ​លក់​ថ្លៃ​រហូតដល់ ៥០០ដុល្លា ទៅ ៨៥០ដុល្លា ក្នុង ១ តោន។»៕