រដ្ឋសភា​អនុម័ត្រ​សេចក្តី​ព្រាង​ច្បាប់ គម្រោង​សាង​សង់«វារី​អគ្គិសនី​សេសាន្ត​ក្រោម២»

សេចក្តីព្រាងច្បាប់ស្តីពី ការយល់ព្រម​លើ​ការធានា​ទូទាត់ ​របស់​រាជរដ្ឋាភិបាលកម្ពុជាឲ្យទៅ​ក្រុមហ៊ុន ហាយ​ដ្រូ ផៅ​វ័រ ឡូ​វើរ សេ​សាន្ត​២ ត្រូវបានអនុម័ត្រ នាព្រឹកថ្ងៃទី១៥ ខែកុម្ភៈនេះ ដោយរដ្ឋសភាជាតិ ក្នុងសម្លេង៨២លើ៩០។ បន្ទាប់ពីរាជរដ្ឋាភិបាលបានសម្រេចឲ្យក្រុមហ៊ុនចម្រុះ ដែលមានក្រុមហ៊ុនក្នុងស្រុក និងក្រុមហ៊ុនមកពីប្រទេសវៀតណាម រួមជាមួយក្រុមហ៊ុនអគ្គិសនីដ៏ធំ មកពីប្រទេសចិនឈ្មោះ ឡាង ចាង ហាយដ្រូ ផៅវ័រ ដែលត្រូវសាងសង់ក្នុងគម្រោងទឹកប្រាក់សរុបជាង៧៨១លានដុល្លារ។
Loading...
  • ដោយ: អ៊ុម វ៉ារី
  • កែប្រែចុងក្រោយ: February 15, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បើទោះជាមានការតវ៉ា ពីប្រជាពលរដ្ឋ ព្រមទាំងកិច្ចអន្តរាគមន៏ ពីអង្គការសង្គមស៊ីវិល និងការជំទាស់ពីបក្សប្រឆាំង យ៉ាង​ណាក៏ដោយ ក៏រដ្ឋាភិបាលនៅតែបន្តគម្រោងរបស់ខ្លួន ក្នុងការសាងសង់ «វារីអគ្គិសនីសេសាន្តក្រោម២» រហូតឈានមក​ដល់ការអនុម័ត្រ ដោយរដ្ឋសភាជាតិនៅថ្ងៃនេះ។


ការអនុម័ត្ររបស់រដ្ឋសភា លើគម្រោងរបស់រដ្ឋាភិបាល ថ្ងៃទី១៥ខែកុម្ភះ។ MONOROOM.info photo/ O.Vary។

សេចក្តីព្រាងច្បាប់ស្តីពី ការយល់ព្រម​លើ​ការធានា​ទូទាត់ ​របស់​រាជរដ្ឋាភិបាលកម្ពុជាឲ្យទៅ​ក្រុមហ៊ុន ហាយ​ដ្រូ ផៅ​វ័រ ឡូ​វើរ សេ​សាន្ត​២ ត្រូវបានអនុម័ត្រ នាព្រឹកថ្ងៃទី១៥ ខែកុម្ភៈនេះ  ដោយរដ្ឋសភាជាតិ ក្នុងសម្លេង៨២លើ៩០។ បន្ទាប់ពីរដ្ឋាភិបាល​បានសម្រេចឲ្យក្រុមហ៊ុនចម្រុះ ដែលមានក្រុមហ៊ុនក្នុងស្រុក និងក្រុមហ៊ុនមកពីប្រទេសវៀតណាម រួមជាមួយក្រុមហ៊ុន​អគ្គិសនីដ៏ធំ មកពីប្រទេសចិនឈ្មោះ ឡាង ចាង ហាយដ្រូ ផៅវ័រ ដែលត្រូវសាងសង់ ក្នុងគម្រោងទឹកប្រាក់​សរុប​ជាង ៧៨១​លានដុល្លារ។

លោក យឹម សុវណ្ណ អ្នកតំណាងរាស្ត្រគណបក្សសមរង្ស៊ី បានលើកឡើងក្នុងអង្គប្រជុំរដ្ឋសភា ស្នើរឲ្យពន្យារពេល​ចំពោះ​ការ​អនុម័តនេះ ដើម្បីឲ្យអ្នកជំនាញ អង្គការសង្គមស៊ីវិល និងតំណាងរាស្ត្រ ធ្វើការសិក្សាស្រាវជ្រាវឲ្យបានល្អិតល្អន់ លើគម្រោង​សាងសង់វារីអគ្គិសនីនេះ។ លោកបន្តថា គម្រោងសាងសង់វារីអគ្គិសនី សេសាន្តក្រោម២ ធ្វើឡើងដោយគ្មាន«តម្លាភាព»។

ចំពោះលោក ជាម យៀប តំណាងរាស្រ្ត មកពីគណបក្សប្រជាជនកម្ពុជា បានការពារលើសេចក្តីព្រាងច្បាប់ និងគាំទ្រដល់​រដ្ឋសភា ក្នុងការអនុម័តយល់ព្រមលើសេចក្តីព្រាងច្បាប់នោះ។ ដោយលោកអះអាងថា រាជរដ្ឋាភិបាល និងក្រុមហ៊ុន បានធ្វើ​ការសិក្សាពីផលប៉ះពាល់ និងការផ្តល់សំណង់ជូនដល់ពលរដ្ឋរួចរាល់អស់ហើយ។

រដ្ឋមន្ត្រីក្រសួងឧស្សាហកម្មរ៉ែនិងថាមពល លោក ស៊ុយ សែម ដែលតំណាងឲ្យរាជរដ្ឋាភិបាល មកធ្វើការការពារសេចក្តី​ព្រាងច្បាប់នេះ បានលើកឡើងថា គម្រោងសាងសង់វារីអគ្គិសនី សេសាន្តក្រោម២ បានសិក្សា ពិនិត្យពិចារណាយ៉ាងលម្អិត និងយកចិត្តទុកដាក់ ធ្វើឡើងជាច្រើនដងច្រើនសារ ក្នុងនោះក៏មានការចូលរួមពីសហគមន៍ ប្រជាពលរដ្ឋ ការចូលរួមពី​សង្គមស៊ីវិល និងភាគីពាក់ព័ន្ធមួយចំនួនទៀត។ លោកបន្តថា «គម្រោងសាងសង់ទំនប់វារីអគ្គិសនី សេសាន្ត២ ត្រូវបាន​វាយតម្លៃ ពីផលប៉ះពាល់ចំនួនពីរលើក និងក៏មានការពិភាក្សា គ្រប់ជ្រុងជ្រោយជាច្រើនលើកដែរ មិនមែនចេះតែធ្វើៗ ហើយ​ក៏មិនមែនដើម្បីធ្វើបាបប្រជាជនយើងទេ»។

លោក ឈិត សំអាត នាយកប្រតិបត្តិនៃវេទិកាអង្គការមិនមែនរដ្ឋាភិបាល ស្ដីពីកម្ពុជា បានសង្កត់ធ្ងន់ថា រាជរដ្ឋាភិបាល​កម្ពុជា មិនគួរប្រញាប់ប្រញាល់ផ្តល់សម្បទាន ឲ្យវិនិយោគ លើគម្រោងវារីអគ្គិសនី«សេសាន្ដ ក្រោម២» លឿនពេកទេ ព្រោះរាល់ការសិក្សានូវផលប៉ះពាល់ ពីការសាងសង់នេះ នៅមិនទាន់បានច្បាស់លាស់នៅឡើយ ក្នុងនោះមានដូច ការ​រស់នៅរបស់ប្រជាពលជន ការរក្សាបរិស្ថាន និងជីវចម្រុះជាដើម ដែលត្រូវពឹងផ្អែកទាំងស្រុងលើទន្លេបី មានទន្លេសែ្រពក ទន្លេសេសាន និងទន្លេសេកុង។ លោកមានការព្រួយបារម្មណ៍ថា«កម្ពស់ទឹករហូតដល់៧៥ម៉ែត្រ អាចធ្វើឲ្យលិចផ្ទៃដី រហូតទៅដល់បីម៉ឺនហិកតារនៃផ្ទៃដីសរុប ដែលនៅក្នុងផ្ទៃដីនោះអាចបណ្តាលឲ្យប៉ះពាល់ទៅដល់ព្រៃឈើ សត្វព្រៃ ជីវចម្រុះ និងសត្វមួយចំនួនដែលនឹងត្រូវផុតពូជដែរ»។

លោកនាយកប្រតិបត្តិ បានបន្តថា ក្តីបារម្ភណ៍មួយទៀត ទាក់ទងនឹងប្រជាពលរដ្ឋ ជាងមួយពាន់គ្រួសារ ដែលត្រូវរុះរើ​លំនៅដ្ឋាន និងបាត់បង់ដីស្រែចំការ ជាពិសេស បងប្អូនជនជាតិដើមភាគតិច ត្រូវបាត់បង់ព្រៃអារក្ស និងផ្នូរបុព្វបុរស ជាដើម។ រីឯសំណង សម្រាប់ប្រជាពលរដ្ឋ ដែលរងផលប៉ះពាល់ទាំងនោះ ក៏ពុំទាន់បានដោះស្រាយយ៉ាងណានោះដែរ មានតែគម្រោង ផ្តល់សំណងជាទីតាំងដីថ្មី និងគម្រោងសាងសង់ផ្ទះ សម្រាប់ប្រជាពលរដ្ឋប៉ុណ្ណោះ។

ឯលោក សៀក មេគង្គ មេឃុំស្រែគរ ក៏បានលើកឡើងប្រហាក់ប្រហែលគ្នានេះដែរ តែលោកបញ្ជាក់ថា ប្រជាពលរដ្ឋបាន​តវ៉ាជាច្រើន ដោយមិនចង់ចាកចេញពីភូមិនោះទេ ដោយសារតែអាជ្ញាធរមិនទាន់បានឆ្លើយតប ឲ្យមានដំណោះស្រាយ ឬ​សំណងផលប៉ះពាល់ ទាក់ទិន ផលដំណាំ និងទ្រព្យសម្បត្តិរបស់ប្រជាពលរដ្ឋ បានជាក់លាក់នៅឡើយ។

ក្នុងសេចក្តីព្រាងច្បាប់នេះមានបីមាត្រា ដោយតម្រូវឲ្យរាជរដ្ឋា ភិបាលកម្ពុជា ផ្តល់ការធានា លើការទូទាត់ថ្លៃទិញ​ថាមពល​អគ្គិសនី ក្នុងករណីអគ្គិសនីកម្ពុជា មិនធ្វើការទូទាត់ ការធានាលើការទូទាត់ថ្លៃទិញមធ្យោបាយគម្រោង ក្នុងករណីដែល​ក្រុមហ៊ុន មិនអាចអនុវត្តគម្រោងបាន ដែលបណ្តាលមកពីព្រឹត្តិការណ៍ប្រធានសក្តិផ្នែកនយោបាយ និងតម្រូវឲ្យច្បាប់​នេះ​ប្រកាសជាការប្រញាប់។

សូមរំលឹកកថា កាលពីថ្ងៃទី២ ខែវិច្ឆិកា ឆ្នាំ២០១២ គណៈរដ្ឋមន្ត្រី បានប្រជុំ អនុម័តជាឯកច្ឆ័ន្ទ លើគម្រោងវិនិយោគ​សាង​សង់ស្ថានីយវារីអគ្គិសនី សេសាន្តក្រោមទី២ អនុភាពដំឡើង ៤០០ មេហ្គាវ៉ាត់ នៅខេត្តស្ទឹងត្រែង ដែលត្រូវអនុវត្តដោយ​ក្រុមហ៊ុន ហាយដ្រូ ផៅវ័រ ឡូវើរ សេសាន្ត២ ដែលបង្កើតឡើងដោយក្រុមហ៊ុនចិន និងក្រុមហ៊ុនរបស់លោកឧកញ៉ា គិត ម៉េង ប្រធានក្រុមហ៊ុន រ៉ូយ៉ាល់ គ្រុប ដែលមានតម្លៃជាង ៧៨១ លានដុល្លារដែលវិនិយោគក្រោមរូបភាព សាងសង់ធ្វើអាជីវកម្ម និងផ្ទេរក្នុងរយៈពេលសម្បទាន៤៥ឆ្នាំ ដែលក្នុងនោះសម្រាប់ការសាងសង់មានរយៈពេលប្រាំឆ្នាំ និងការធ្វើអាជីវកម្ម មាន​រយៈពេលសែសិបឆ្នាំ។

តាមកិច្ចព្រមព្រៀងនេះ ក្រុមហ៊ុនក៏ត្រូវចំណាយ ៣៨,៧១ លានដុល្លារ ដើម្បីដោះស្រាយផលប៉ះពាល់ សំណងជាគោល​នយោបាយ សាងសង់លំនៅដ្ឋានថ្មី និងហេដ្ឋារចនាសម្ព័ន្ធចាំបាច់នានា នៅតំបន់តាំងពីលំនៅថ្មី។ គម្រោងនោះ ត្រូវបាន​រាជរដ្ឋាភិបាលអះអាងថា មានប្រជាជនរងផលប៉ះពាល់ សរុបតែ៧៩៧ គ្រួសារ ហើយរាជរដ្ឋាភិបាលរំពឹងថា ការអភិវឌ្ឍន៍​ស្ថានីយវារីអគ្គិសនីនេះ នឹងទទួលបានចំណូលពន្ធសរុបជាមធ្យមប្រមាណជាង ២៩លានដុល្លារអាមេរិកក្នុងមួយឆ្នាំ ដោយ​មិនគិតដល់ពន្ធដទៃទៀតនៃការការចែកចាយថាមពលអគ្គិសនីលក់បន្តឲ្យអ្នកប្រើប្រាស់ឡើយ។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៥ កុម្ភៈ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...