សួន សេរីរដ្ឋា៖ នេះជាបុណ្យសព កែម ឡី មិនមែនសព កឹម សុខា ទេ
- ដោយ: ដារី អត្ថបទ៖ ដាវី ([email protected]) - ភ្នំពេញ ថ្ងៃទី១២ កក្កដា ២០១៦
- កែប្រែចុងក្រោយ: July 12, 2016
- ប្រធានបទ: បុណ្យសព
- អត្ថបទ: មានបញ្ហា?
- មតិ-យោបល់
-
បន្ទាប់ពីវគ្គ«ស្បែកជើងហោះ» ឥឡូវនេះប្រធានគណបក្សមួយ បានចេញមុខមកបកស្រាយ និងពន្យល់ថា ហេតុការណ៍នេះ ជារឿងគួរឲ្យសោកស្ដាយ និងមិនគួរគប្បីទេ។ វគ្គ«ស្បែកជើងហោះ»នោះ បានកើតឡើង កាលពីរសៀលម្សិលម៉ិញ នៅខណៈពេលដែលកញ្ញា ធី សុវណ្ណថា និងលោក ស្រី ចំរើន បានព្យាយាមចូលទៅគោរពវិញ្ញាណក្ខន្ធ សពលោក កែម ឡី ដល់ តែត្រូវបានក្រុមពលរដ្ឋ ដែលមានវត្តមាននៅទីតំកល់សព ប្រតិកម្មខ្លាំងក្លា រហូតដល់អ្នកទាំងពីរ ត្រូវបានសមាជិកគ្រួសារសព និងព្រះសង្ឃជាច្រើនអង្គ ជម្លៀសខ្លួនចេញ ព្រមទាំងបានហែរហមមកកាន់រថយន្ដ មុននឹងបានបើកចាកចេញ ពីវត្តដោយសុវត្ថិភាព។
» អានអត្ថបទដែលទាក់ទង៖ នៅពេលដែលពលរដ្ឋស្វាគមន៍ ធី សុវណ្ណថា នឹងស្បែកជើង...
នៅព្រឹកថ្ងៃទី១២ ខែកក្កដានេះ លោក សួន សេរីរដ្ឋា បានសម្ដែងការសោកស្ដាយ ចំពោះហេតុការណ៍នោះ និងបានហៅសកម្មភាពនោះ ថាជាការហួងហែង របស់ក្រុម «អ្នកផ្កាប់មុខ» ជាមួយនឹងគណបក្សសង្គ្រោះជាតិ។ ប្រធានគណបក្សអំណាចខ្មែរ បានសរសេរនៅលើទំព័រហ្វេសប៊ុករបស់លោកថា៖ «ខ្ញុំសោកស្តាយ ដែលក្រុមអ្នកផ្កាប់មុខ ជាមួយនឹងគណបក្សសង្គ្រោះជាតិ នាំគ្នាហួងហែង ត្រួតត្រាគ្រប់គ្រង ពីធីបុណ្យសពលោក កែម ឡី ដោយមិនខ្លាចរអារចិត្តភរិយា និងកូនៗ ព្រមទាំងសាច់ញាតិរបស់សព ដែលពួកគេកំពុងមានទុក្ខជាទម្ងន់»។
លោក បានបន្តទៀតថា៖ «នេះគឺបុណ្យសពលោក កែម ឡី មិនមែនជាបុណ្យសពលោក កឹម សុខា ប្រធានស្តីទី គណបក្សសង្គ្រោះជាតិទេ»។
ប្រធានគណបក្សអំណាចខ្មែរ ដែលបានទៅចូលរួមគោរពសពលោក កែម ឡី កាលពីម្សិលម៉ិញដែរនោះ បានពន្យល់ករណីនេះថា៖ «រឿង ធី សុវណ្ណថា និង កឹម សុខា ជារឿងដោយឡែក។ តែខ្ញុំមិនដែលឮថា ធី សុវណ្ណថា នាងមានបញ្ហា ឬមានទំនាស់ ជាមួយនឹងលោកបណ្ឌិត កែម ឡី ទេ។ តែក្រុមអ្នកផ្កាប់មុខ ជាមួយ សម រង្ស៊ី និង កឹម សុខា ក្នុងគណបក្សសង្គ្រោះជាតិនេះវិញទេ ដែលធ្លាប់លាបពណ៌ថា លោក កែម ឡី លក់ក្បាលឲ្យ ហ៊ុន សែន នោះ។ សូមចេះខ្មាសខ្លួន ហើយក្លាហានហ៊ានងើបមុខ ទទួលយកការពិតផង កុំយកសពបុគ្គលឯករាជ្យម្នាក់ ដែលជាអ្នករងគ្រោះ ដោយពួកអ្នកនយោបាយ មកធ្វើអាជីវកម្មនយោបាយថែមទៀត។»
ការលើកឡើង របស់លោក សួន សេរីរដ្ឋា បានរងប្រតិកម្មមកវិញយ៉ាងច្រើន ពីសំណាក់អ្នកប្រើប្រាស់បណ្ដាញសង្គម។ ម្ចាស់គណនី «ជាតិ ខ្មែរ» បានសរសេរថា៖ «រឿងដែលគេដេញពួកវាចេញ គឺទាក់ទងនឹងជនដែលស្លាប់ (លោក កែម ឡី) និងបក្សពួក ដែលគេសង្ស័យថាជាអ្នកធ្វេីឃាត និងពួក ធី សុុវណ្ណថា ដែលគាំទ្រជនសង្ស័យទាំងនោះ មិនមែនទាក់ទងនឹងគណបក្សណាទេ»។ រីឯគណនី «Heang Ratheany» បានសរសេរថា៖ «ប្រជាពលរដ្ឋ ដែលទៅបុណ្យសពលោក កែម ឡី មិនមែនសុទ្ធ តែជាអ្នកគាំទ្រគណបក្សសង្រ្គោះជាតិនោះទេ។ ខ្ញុំថា បើលោកមិននិយាយពាក្យទាំងនេះ ប្រហែលចំណេញច្រើន។ ក្នុងកាលៈទេសៈនេះ លោកនិយាយពាក្យទាំងនេះ ក្រោយពីលោកបានទៅ(រួច)ហើយ។ សំណាងហើយ ដែលលោកមិនខ្មាស់គេ ដូច ធី សុវណ្ណថា...។»
សម្រាប់លោក ខៀវ កាញារីទ្ធ រដ្ឋមន្ត្រីក្រសួងព័ត៌មានវិញ បានសរសេរថា៖ «ទើបសម័យនេះទេ ដែលឃើញមានគេកាងបុណ្យសព! សម័យដើម បើបុណ្យការគេមិនហៅ គឺមិនទៅ តែបុណ្យសពវិញ ទោះគ្មានការអញ្ជើញ ក៏ខ្មែរតែងទៅចូលរួមដែរ។ ហេតុអ្វីបានជាខ្មែរខ្លះ ដូរប្រពៃណីដ៏ល្អ របស់ខ្លួនយ៉ាងនេះ?»៕