សេចក្ដីប្រកាសព័ត៌មាន របស់គណបក្សសង្គ្រោះជាតិ និងរបស់សហជីពសេរីកម្មករ នៃ​ព្រះរាជា​ណាចក្រ​កម្ពុជា ​ដែល​ទើប​នឹង​ធ្លាក់​មកដល់ ក្នុងពេលមុននេះ បានប្រកាសព្រមានរួចជាស្រេច ក្នុងការប្រើ«សិទ្ធិ»ធ្វើ​មហា​បាតុកម្ម ​និង​កូដកម្ម ប្រសិនណាជាមានការចាប់ខ្លួន លោក កឹម សុខា អនុប្រធាន (សព្វថ្ងៃប្រធានស្ដីទី) គណបក្ស​សង្គ្រោះ​ជាតិ ដែល​ជា​គណបក្សប្រឆាំងធំជាងគេ មានអសនៈសភាជិតពាក់កណ្ដាល នៅក្នុងប្រទេស។ សេចក្ដី​ប្រកាស​ព័ត៌មាន​ទាំង​នោះ សុទ្ធតែបានអះអាង ថាបុព្វហេតុរបស់ពួកគេ គឺដើម្បីទាមទារឲ្យមាន​ការ​គោរព​ច្បាប់​ ជា​ពិសេស​នៅ​ត្រង់ ការ​គោរព​អភ័យឯកសិទ្ធិ របស់​សមាជិក​សភា។

លោក កឹម សុខា បានរងការចោទប្រកាន់ថា បានប្រព្រឹត្តិបទល្មើសជាក់ស្ដែង ដោយសារមិន​ចូល​បំភ្លឺ តាម​ការ​កោះ​ហៅ​របស់​តុលាការ។ ការចោទប្រកាន់នេះ បានឈានទៅដល់ ការឃាត់រថយន្ដ​របស់​លោក និង​ការ​សំរុក​ចូល​ទីស្នាក់ការ​​កណ្ដាល របស់គណបក្ស​សង្គ្រោះ​ជាតិ ពីសំណាក់​កង​កម្លាំង​ប្រដាប់​ដោយ​អាវុធ (ធុន​ធ្ងន់) សឹង​គ្រប់​ដៃ កាល​ពី​ថ្ងៃ​ព្រហស្បត្តិ៍ ទី២៦ ខែឧសភាម្សិលម៉ិញ។ នេះបើតាមសេចក្ដីថ្លែងការណ៍មួយ ពី​សំណាក់​អយ្យការ​អម​សាលា​ដំបូង​រាជធានីភ្នំពេញ ដែលចេញផ្សាយនៅយប់ថ្ងៃទី២៦ ខែឧសភា ឆ្នាំ២០១៦ ម្សិលម៉ិញ។

ប៉ុន្តែក្រុមមន្ត្រីគណបក្សប្រឆាំង បានចាត់ទុកសកម្មភាពនេះ របស់តុលាការនិងកងកម្លាំង​ទាំង​នោះ ថា​បាន​រំលោភ​ទៅ​លើ​ស្មារតី​រដ្ឋធម្មនុញ្ញ ត្រង់មាត្រា៨០ ដែលបានចែងការពារសមាជិកសភា ពីរាល់​ការ​ចាប់​ចង់​ទាំង​ឡាយ ដោយ​គ្មាន​ការ​ដកអភ័យឯកសិទ្ធិជាមុន រៀរលែងតែករណីបទល្មើសជាក់ស្ដែង។ កិច្ចប្រជុំគណៈ​កម្មាធិការ​​អចិន្ដ្រៃយ៍​គណបក្ស​សង្គ្​រោះជាតិ នៅព្រឹកថ្ងៃសុក្រនេះ ដែលធ្វើឡើងក្រោម​អធិបតីភាព របស់​លោក សម រង្ស៊ី និង លោក កឹម សុខា ប្រធាន​និង​អនុប្រធាន​គណបក្ស បានវាយតម្លៃ​លើ​«ស្ថានភាព​នយោបាយ​បច្ចុប្បន្ន» ថា​មាន​សភាព​ធ្ងន់ធ្ងរ​ទៅៗ។ នេះបើគេបានអាន សេចក្ដីប្រកាសរបស់គណបក្សសង្គ្រោះជាតិ ដែល​ចេញ​ផ្សាយ​នៅ​ក្នុង​ថ្ងៃទី២៧ ខែឧសភានេះ។

សេចក្ដីប្រកាសព័ត៌មាននោះ បានប្រាប់ឲ្យថ្នាក់ដឹកនាំគណបក្សនៅតាមមូលដ្ឋានគ្រប់រាជធានី-ខេត្ត ដង្ហែញត្តិ​មក​រាជធានី​ភ្នំពេញ ដើម្បីថ្វាយព្រះមហាក្សត្រ និងប្រើសិទ្ធិធ្វើ«មហាបាតុកម្ម»អហិង្សា ក្នុង​ករណី​ដែល​មាន​ការ​ចាប់​ខ្លួនលោ​ក កឹម សុខា។ ភ្លាមៗនៅថ្ងៃទី២៧ ខែឧសភានេះ នៅមុខទីស្នាក់ការរបស់​គណបក្ស គេ​ឃើញ​មាន​តាំង​បង្ហាញ នូវរូបថតក្រុមអ្នកជាប់ឃុំ (មានទាំងអ្នកកាត់ទោសហើយ និងមិនទាន់កាត់ទោស) ដោយ​មាន​សារ​មួយ​សរសេរ​ថា៖ «សូមដោះលែងអ្នកទោសមនសិការ»។

សម្រាប់សេចក្ដីជូនដំណឹង របស់សហជីពសេរីកម្មករ ដែលមានចុះហត្ថលេខា​ដោយ​ប្រធាន​សហជីព លោក ជា មុនី បាន​អំពាវនាវ​ទៅ​ដល់«បងប្អូន»​កម្មករកម្មការិនី នៅតាមបណ្ដារាជធានី-ខេត្តទាំងអស់ ឲ្យ​ប្រើប្រាស់សិទ្ធិ​«ស្រប​ច្បាប់»​របស់ផងខ្លួន ដើម្បីធ្វើកូដកម្ម មិនចូលធ្វើការ។ សេចក្ដីជូនដំណឹង បាន​សរសេរ​ថា៖ «សូម​បងប្អូន​កម្មករ-កម្មការិនី មេត្តា​ជ្រាប និងត្រៀមប្រើសិទ្ធិស្របច្បាប់របស់ខ្លួន តាមការជូនដំណឹងនេះ ដើម្បី​ជំរុញ​ឲ្យ​មាន​ការ​អនុវត្ត​ច្បាប់​នៅ​កម្ពុជា ពាក់ព័ន្ធនឹងអភ័យឯកសិទ្ធិសភាតំណាងរាស្ត្រ»៕