«ក្នុងពេលបច្ចុប្បន្ននេះ មិន​មាន​ការ​បង្កាត់​ពូជ​ថ្មី​ណា​មួយ​ នៃ​សត្វ​ខ្លា​ធំ​ទៀតឡើយ ​នៅ​ក្នុង​ប្រទេស​កម្ពុជា។ អម្បូរ​សត្វខ្លាដ៏កម្រនេះ ត្រូវបានចាត់ទុកថា ដូចជាបានផុតពូជអស់ទៅហើយ។» នេះជាការអះអាង របស់​អង្គការ​មូលនិធិសកល សម្រាប់អភិរក្សធនធានធម្មជាតិ ហៅកាត់ថា «WWF» កាលពីថ្ងៃពុធកន្លងមកនេះ។ អង្គការពិភពលោក បានអះអាងថា សត្វខ្លាធំនៅកម្ពុជានេះ ត្រូវបានឃើញជាលើកចុងក្រោយ តាំងពី​ឆ្នាំ២០០៧។

ការបរបាញ់យ៉ាងអាណាធិបតេយ្យ និងកាប់ព្រៃឈើ ជាមូលហេតុ...

បើទោះជាដំណឹងខាងលើ បានធ្លាក់ចុះមក បង្កឲ្យមានភាពសោកស្ដាយយ៉ាងណាក៏ដោយ តែគេនៅមិន​ទាន់​អស់សង្ឃឹមនៅឡើយ។ កាលពីថ្ងៃទី២៣ ខែមីនាកន្លងមកថ្មីៗនេះ រដ្ឋាភិបាលក្រុងភ្នំពេញ បានអនុម័ត​គម្រោង​ឲ្យនាំយកសត្វខ្លាធំ ឲ្យមកធ្វើការបង្កាត់ពូជ និងព្រលែងឲ្យទៅរស់នៅក្នុងព្រៃ ក្នុងប្រទេសកម្ពុជាវិញ។ គម្រោង​នេះ មានរាប់បញ្ចូលទាំងការអភិរក្សព្រៃធំៗ នៅក្នុងខេត្តមណ្ឌលគិរី និងព្រៃដ៏ក្រាស់ៗផ្សេងទៀត នៅតាម​តំបន់​ជួរភ្នំក្រវ៉ាញជាដើម។

លោក កែវ អូម៉ាលីស ប្រធាន​នៃ​នាយកដ្ឋាន​សត្វ​ព្រៃ និង​ជីវៈចម្រុះ​នៃ​រដ្ឋបាល​ព្រៃឈើ របស់ក្រសួង​កសិកម្ម​កម្ពុជា ត្រូវបានសារព័ត៌មានអង់គ្លេស «The Guardian» ស្រង់សម្ដីមកធ្វើការអះអាងថា៖ «ជាដំបូងនេះ យើង​ចង់​នាំ​យក​សត្វខ្លាពីរក្បាល ញ៉ីមួយក្បាល ឈ្មោលមួយក្បាលមកសិន»។ ហើយថា ការចរចាកំពុង​ប្រព្រឹត្តិ​ទៅ​ហើយ ជាមួយនឹងប្រទេសឥណ្ឌា ថៃ និងប្រទេសម៉ាឡេស៊ី ដោយសង្ឃឹមថា ប្រទេសទាំងនេះ អាច​ផ្ដល់​ពូជ​សត្វ​ខ្លាធំ​នេះ មកកម្ពុជា។

ជំហ៊ានទៅរក ការរលត់ផុតពូជ នៃសត្វខ្លាដ៏កម្រ មិនមែនកើតមាន តែនៅក្នុងប្រទេសកម្ពុជាឡើយ។ បន្ថែម​ពីលើ​ការបរបាញ់ យ៉ាងអាណាធិបតេយ្យ និងការកាប់ព្រៃឈើបំផ្លាញជម្រកសត្វ ដូច​នៅក្នុងប្រទេសជាច្រើននោះ ពពួក​សត្វ​ព្រៃ​នៅក្នុងប្រទេសកម្ពុជា ត្រូវរងគ្រោះ ព្រោះព្រឹត្តិការណ៍ដ៏អាណោចអធមជាច្រើនទៀត៖ នោះ​គឺ​សង្គ្រាម​​​បាញ់​បោះ និងគ្រាប់មីនកប់ក្នុងព្រៃ​រាប់ម៉ឺនសែនគ្រាប់ តាំងពីច្រើនទសវត្សន៍មកហើយ។

តាមការប៉ាន់ប្រមាណមួយ របស់សហគមន៍អ៊ឺរ៉ុប បានឲ្យដឹងថា នៅក្នុងពិភពលោកថ្ងៃនេះ សត្វខ្លា​ធំតូច​សរុប​ទាំងអស់ មានចំនួនតែ២១៥៤ក្បាលប៉ុណ្ណោះ។ នៅចំពោះតួលេខ​ដ៏គួរឲ្យបារម្ភនេះ ប្រទេសចំនួន១០ បាន​រួម​គ្នា​បង្កើតនូវផែនការមួយ ដើម្បីធ្វើយ៉ាងណាបង្កាត់ពូជសត្វខ្លា ឲ្យមានចំនួនពីរដងច្រើនជាងពេលនេះ សម្រាប់​ឆ្នាំ២០២២​ខាងមុខ៕